.jpg)
គ្រូបង្គោលចុះផ្សព្វផ្សាយយុទ្ធនាការគ្រួសាររឹងមាំដល់ពលរដ្ឋនៅក្រុងបានលុង ខេត្តរតនគិរី ពីថ្ងៃទី ១៣ កក្កដា។រូប គ្រួសាររឹងមាំ
ភ្នំពេញៈ យុទ្ធនាការ «គ្រួសាររឹងមាំ» គឺជាការសហការរវាងក្រសួងសង្គមកិច្ច អតីតយុទ្ធជន និងយុវនីតិសម្បទា ក្រសួង ស្ថាប័នពាក់ព័ន្ធ អង្គការយូនីសេហ្វ និង ដៃគូអង្គការមិនមែនរដ្ឋាភិបាល រួមមាន អង្គការ Friend International អង្គការ Save the Children អង្គការភ្លែនអន្តរជាតិ អង្គការ Child Fund អង្គការទស្សនៈពិភពលោក អង្គការ APLE អង្គការទំនុកចិត្តកុមារកម្ពុជា អង្គការម្លប់ឫស្សី និងបណ្តាញទូរស័ព្ទជំនួយកុមារកម្ពុជា។
តើអ្វីទៅជាយុទ្ធនាការ គ្រួសាររឹងមាំ? ដើម្បីចាត់ទុកជាគ្រួសាររឹងមាំ តើត្រូវមានធាតុផ្សំអ្វីខ្លះ។ ភ្នំពេញប៉ុស្តិ៍ មានបទសម្ភាស ១ ជាមួយ លោក ភី ណូ ប្រធាននាយកដ្ឋានសុខុមាលភាពកុមារនៃក្រសួងសង្គមកិច្ច អតីតយុទ្ធជន និងយុវនីតិសម្បទា ជុំវិញយុទ្ធនាការនេះ។
តើយុទ្ធនាការគ្រួសាររឹងមាំ គឺជាអ្វី? បង្កើតឡើងក្នុងគោលបំណងអ្វី?
ឃើញថា អំពើហិង្សា គឺជាកង្វល់ដ៏ធំមួយ និងជះឥទ្ធិពលអវិជ្ជមានយូរអង្វែងដល់សុខុមាលភាព និងការអភិវឌ្ឍកុមារក្នុងទិដ្ឋភាពផ្សេងៗគ្នាទាក់ទងនឹងអាកប្បកិរិយា ផ្លូវចិត្ត និងរាងកាយនៅក្នុងវ័យជំទង់ និងនៅពេលពេញវ័យ។ ទន្ទឹមគ្នានេះក្រសួងសង្គមកិច្ច អតីតយុទ្ធជន និងយុវនីតិសម្បទាបានបង្កើត និងអនុវត្តផែនការសកម្មភាពធ្វើឱ្យប្រសើរឡើងនូវការថែទាំកុមារ និងសមាហរណកម្មកុមារចំនួន ៣០ ភាគរយ ពីមណ្ឌលថែទាំកុមារទៅកាន់គ្រួសាររបស់ពួកគេវិញដោយសុវត្ថិភាព។
មានការសិក្សាមួយចំនួនបានបង្ហាញថា ការដាក់កុមារនៅមណ្ឌលថែទាំដែលមិនគោរពតាមគោលនយោបាយ បទដ្ឋាន និងគតិយុត្តរបស់រាជរដ្ឋាភិបាល អាចធ្វើឱ្យកុមារប្រឈមមុខនឹងហានិភ័យនៃអំពើហិង្សា ការកេងប្រវ័ញ្ច និងការមិនអើពើ ដែលអាចបង្កផលប៉ះពាល់ធ្ងន់ធ្ងរដល់ការអភិវឌ្ឍកុមារ។ ដូច្នេះយុទ្ធនាការ គ្រួសាររឹងមាំត្រូវបានបង្កើតឡើងក្នុងគោលបំណង ដើម្បីដោះស្រាយនូវបញ្ហាសង្គម និងវប្បធម៌ ដែលធ្វើឱ្យមានអំពើហិង្សាលើកុមារ និងរាល់ជំនឿ ដែលយល់ថា មណ្ឌលថែទាំជាទីកន្លែងផ្តល់អត្ថប្រយោជន៍ជាច្រើនដល់កុមារ។
យុទ្ធនាការនេះគឺជាការលើកកម្ពស់ការយល់ដឹង ដើម្បីបង្ការទប់ស្កាត់ និងលុបបំបាត់អំពើហិង្សាលើកុមារ និងទប់ស្កាត់ការបំបែកកុមារចេញពីគ្រួសារដោយមិនចាំបាច់ និងធានាឱ្យប្រជាជនយល់ដឹងថា បរិយាកាសគ្រួសារមានសុវត្ថិភាព គឺជាទីកន្លែងដ៏ល្អប្រសើរបំផុត សម្រាប់កុមារលូតលាស់ និងអភិវឌ្ឍ។
យុទ្ធនាការគ្រួសាររឹងមាំនេះ បង្ហាញពីការប្តេជ្ញាចិត្តដ៏ខ្លាំងក្លារបស់រាជរដ្ឋាភិបាល ដើម្បីបញ្ចប់អំពើហិង្សាលើកុមារ និងជាការចូលរួមជាមួយបណ្តាប្រទេសជាដៃគូសកល ដើម្បីបញ្ចប់អំពើហិង្សាលើកុមារ ដែលជាផ្នែកមួយនៃចលនាសកលដែលកំពុងបន្ត អនុវត្ត ដើម្បីបញ្ចប់អំពើហិង្សាលើកុមារ។ យុទ្ធនាការនេះក៏បង្ហាញអំពីការបង្កើនការយកចិត្តទុកដាក់ក្នុងការអនុវត្តផែនការ សកម្មភាព ដើម្បីទប់ស្កាត់ និងឆ្លើយតបចំពោះ អំពើហិង្សាលើកុមារ ២០១៧-២០២១។
តើយុទ្ធនាការនេះ បង្កើតឡើងតាំងពីពេលណា មានភាគីណាចូលរួមខ្លះ?
ក្រសួងសង្គមកិច្ច អតីតយុទ្ធជន និងយុវនីតិសម្បទាបានប្រកាសបើកយុទ្ធនាការ “គ្រួសាររឹងមាំ” ដើម្បីបញ្ចប់អំពើហិង្សាលើកុមារ និងការបំបែកកុមារចេញពីគ្រួសារដោយមិនចាំបាច់នៅកម្ពុជា នៅថ្ងៃទី ១៩ ខែកុម្ភៈ ឆ្នាំ ២០២០ ដែលជាយុទ្ធនាការផ្សព្វផ្សាយថ្នាក់ជាតិលើកដំបូង។ យុទ្ធនាការនេះមានការចូលរួមពីក្រសួង ស្ថាប័ន និងអង្គការដៃគូ ដែលមានគោលដៅរួមគ្នាក្នុងការលុបបំបាត់អំពើហិង្សាលើកុមារ។ យុទ្ធនាការនេះជាការបោះជំហានទៅមុខដ៏វិជ្ជមានមួយផ្សេងទៀតក្នុងកិច្ចខិតខំប្រឹងប្រែងរបស់កម្ពុជា ដើម្បីបញ្ចប់រាល់ទម្រង់នៃអំពើហិង្សាលើកុមារ និងការបំបែកកុមារចេញពីគ្រួសារដោយមិនចាំបាច់។
តើយុទ្ធនាការនេះ ធ្វើនៅកន្លែងណាខ្លះ? មានក្រុមគោលដៅ ឬពលរដ្ឋចូលរួមប៉ុន្មាន?
យុទ្ធនាការ “គ្រួសាររឹងមាំ” ផ្សព្វផ្សាយនៅទូទាំងប្រទេស តាមរយៈប្រព័ន្ធផ្សព្វផ្សាយមានស្ប៉តទូរទស្សន៍ ស្ប៉តវិទ្យុ កម្មវិធីចាក់ផ្សាយល្ខោននិយាយតាមបណ្តាញព័ត៌មានសង្គម និងការផ្សព្វផ្សាយផ្ទាល់នៅតាមសហគមន៍។
យុទ្ធនាការនេះ ក៏បាននិងកំពុងចាប់ផ្តើមផ្សព្វផ្សាយបន្តនៅតាមបណ្តារាជធានី-ខេត្តគោលដៅចំនួន ៦ រួមមាន រាជធានីភ្នំពេញ ខេត្តកណ្ដាល ព្រះសីហនុ បាត់ដំបង ខេត្តសៀមរាប និងខេត្តរតនគិរី ព្រមទាំងនឹងបន្តខេត្តមួយចំនួនទៀតជាបន្តបន្ទាប់។
សារអប់រំទាំងអស់បង្ហាញថា ប្រទេសកម្ពុជាមិនអនុគ្រោះដាច់ខាតចំពោះអំពើហិង្សាលើកុមារ ហើយចាំបាច់ត្រូវតែបង្ការការបំបែកកុមារពីគ្រួសារដោយមិនចាំបាច់នៅគ្រប់ទីកន្លែងក្នុងប្រទេសកម្ពុជា។ ក្រុមគោលដៅចម្បងៗ រួមមាន កុមារ ឪពុកម្តាយ អាណាព្យាបាល អ្នកមើលថែកុមារ និងសហគមន៍ ធ្វើយ៉ាងណាឱ្យពួកគេអាចបង្ការ និងឆ្លើយតបចំពោះអំពើហិង្សាលើកុមារ និងការបំបែកកុមារពីគ្រួសារដោយមិនចាំបាច់។
ជាលទ្ធផល ក្នុងរយៈពេលកន្លងមកនេះ តើអ្វីជាលទ្ធផល ដែលយុទ្ធនាការនេះបានអនុវត្ត?
បានផលិតស្ប៉តទូរទស្សន៍មួយចំនួន និងចាក់ផ្សាយនៅប៉ុស្តិ៍ CTN និង My TV (ខែកុម្ភៈ ដល់ខែមេសា ឆ្នាំ ២០២០) និង (ខែឧសភា ដល់ខែមេសា ឆ្នាំ ២០២១)។ បានផលិតស្ប៉តវិទ្យុមួយចំនួន និងការផ្សាយតាមវិទ្យុចំនួន ៣ ប៉ុស្តិ៍ គ្របដណ្តប់ទូទាំងប្រទេស និងនៅខេត្តគោលដៅ (ខេត្តសៀមរាប បាត់ដំបង ព្រះសីហនុ និងកណ្តាល)។
បានផលិតលោ្ខនវិទ្យុ ឬ ល្ខោននិយាយចំនួន ៥ រឿងដែលសរុបមានចំនួន ២៥ ភាគ បានធ្វើការផ្សាយផ្ទាល់តាមវិទ្យុទន្លេ ១០២.៥ អេហ្វអឹម និងកំពុងបានចាក់ផ្សាយឡើងវិញនៅតាមបណ្តាស្ថានីយវិទ្យុរាជធានី-ខេត្តគោលដៅទាំង ៦។
បានផ្សព្វផ្សាយសារ (SMS) តាមទូរស័ព្ទដៃ (ពីខែមីនា ដល់ខែមេសា ឆ្នាំ ២០២០) តាមរាជធានី-ខេត្ត គោលដៅតាមប្រព័ន្ធ SMART និងតាមប្រព័ន្ធ CELL- CARD។ បានផលិតរឿងខ្លីស្តីពីការបង្ការ និងទប់ស្កាត់ការរំលោភបំពានកុមារតាមអនឡាញ និងបានធ្វើវីដេអូខ្លីៗជាមួយបុគ្គលមានឥទ្ធិពល ដូចជា ព្រះសង្ឃ ឧទាហរណ៍ ព្រះអង្គគូ សុភាព ជាដើម។
ការផ្សព្វផ្សាយតាមរយៈគេហទំព័រ បណ្តាញសង្គម (facebook) ប្រព័ន្ធផ្សព្វផ្សាយ (វិទ្យុ ទូរទសន៍) ខាងលើនេះ តាំងពីចាប់ផ្តើមរហូតមកដល់ពេលនេះ យុទ្ធនាការគ្រួសាររឹងមាំបានផ្សព្វផ្សាយទៅដល់ប្រជាជនប្រហែល ១០ លាននាក់។
ដោយឡែកដោយសារការរីករាលដាលនៃជំងឺកូវីដ ១៩ ការផ្សព្វផ្សាយយុទ្ធនាការគ្រួសាររឹងមាំនៅតាមសហគមន៍ មានភាពយឺតយ៉ាវ។ រហូតមកដល់ពេលនេះ យុទ្ធនាការគ្រួសាររឹងមាំបានបើកការផ្សព្វផ្សាយ និងធ្វើការបណ្តុះបណ្តាលដល់ថ្នាក់ក្រោមជាតិ ខេត្តសៀមរាប រតនគិរី បាត់ដំបង និងខេត្តផ្សេងទៀតជាបន្តបន្ទាប់។ យ៉ាងហោចណាស់មានឪពុកម្តាយ អាណាព្យាបាល អ្នកថែទាំកុមារ និងកុមារ ព្រមទាំងប្រជាពលរដ្ឋនៅតាមសហគមន៍ជាង ៥០០ នាក់បានចូលរួមការផ្សព្វផ្សាយដោយផ្ទាល់នេះ។
ដោយវាជាយុទ្ធនាការគ្រួសាររឹងមាំ តើនិយមន័យនៃគ្រួសាររឹងមាំមានអ្វីខ្លះ ហើយមើលដូចម្តេចបានយើងអាចទទួលបានគ្រួសាររឹងមាំបាន?
អត្ថន័យ «គ្រួសាររឹងមាំ» គឺជាគ្រួសារដែលជួយកុមារឱ្យមានអារម្មណ៍សុខ និងសុវត្ថិភាព។ គ្រួសាររឹងមាំផ្តល់នូវភាពកក់ក្តៅ និងការយកចិត្តទុកដាក់ ការប្រាស្រ័យទាក់ទងល្អ ការទស្សន៍ទាយ និងទំនាក់ទំនងដ៏រឹងមាំជាមួយអ្នកដទៃនៅខាងក្រៅគ្រួសារផងដែរ។ រីឯការមើលថែខ្លួនឯង គឺជាផ្នែកមួយដ៏សំខាន់ក្នុងការចិញ្ចឹមគ្រួសារដ៏រឹងមាំមួយ។
គ្រួសាររឹងមាំទាំងអស់ជាទូទៅមានចំណុចរួមដូចគ្នា៖ មានភាពកក់ក្តៅ (ការយកចិត្តទុកដាក់ និងការយកចិត្តទុកដាក់ជាវិជ្ជមាន) មានទំនាក់ទំនងល្អមានបរិយាកាសគ្រួសាររីករាយមានទំនាក់ទំនងជាមួយមនុស្សផ្សេងទៀតនៅខាងក្រៅគ្រួសារ។
គ្រួសាររឹងមាំផ្តល់ឱ្យកុមារនូវកន្លែងដែលមាន [ក្តីសុខ] និងមានសុវត្ថិភាព ដើម្បីក្លាយជាខ្លួនឯង និងស្វែងយល់ថា តើពួកគាត់ជានរណា។ ដោយសារតែកុមារនៅក្នុងគ្រួសាររឹងមាំមានអារម្មណ៍ថា មានសុវត្ថិភាព និង [ក្តី] ស្រឡាញ់ ពួកគាត់មានទំនុកចិត្តក្នុងការស្វែងរកពិភពលោករបស់ពួកគាត់ សាកល្បងអ្វីដែលថ្មី និងរៀន។
ពួកគាត់អាចដោះស្រាយបញ្ហាប្រឈម និងការថយក្រោយបានកាន់តែល្អ ព្រោះពួកគាត់ដឹងថា ពួកគាត់មានការគាំទ្រពីគ្រួសារ។
គ្រួសាររឹងមាំផ្តល់ឱ្យកុមារសុខសុវត្ថិភាព និងស្គាល់ពីខ្លួនឯងជានរណាម្នាក់។ ដោយសារកុមារនៅក្នុងគ្រួសាររឹងមាំ មានអារម្មណ៍ថា សុវត្ថិភាព និងទទួលបាននូវក្តីស្រឡាញ់ ពួកគាត់មានទំនុកចិត្ត ពួកគាត់អាចដោះស្រាយបញ្ហាប្រឈមបានល្អប្រសើរ និងចេះដកថយ ព្រោះតែពួកគាត់ដឹងថា គេមានគ្រួសារចាំជួយគាំទ្រ៕
