សៀមរាបៈ ប្រជាពលរដ្ឋមួយចំនួនដែលជឿលើការឃោសនារបស់លោក ខឹម វាសនា ប្រធានគណបក្សសម្ព័ន្ធ ដើម្បីប្រជាធិបតេយ្យ (LDP) បានចាប់ផ្តើមរំសាយការប្រមូលផ្តុំ និងវិលត្រឡប់ទៅគេហដ្ឋានវិញជាបន្តបន្ទាប់ ខណៈមន្ត្រីបក្សនេះ ៦ រូបចេញទទួលកំហុសនៅពីក្រោយការបំផុសបំផុលឱ្យទៅភ្នំគូលែន។
ពលរដ្ឋចាប់ផ្តើមចាកចេញពីចម្ការរបស់លោក ខឹម វាសនា នៅស្រុកបន្ទាយស្រី ខេត្តសៀមរាបពីថ្ងៃទី ៣០ ខែសីហា បន្ទាប់ពីពួកគេអស់ជំនឿលើមេបក្សរូបនេះ គួបផ្សំអាជ្ញាធរខេត្តសៀមរាបណែនាំឱ្យបញ្ឈប់សកម្មភាពប្រមូលផ្តុំ បើពុំនោះទេប្រឈមនឹងវិធានការផ្លូវច្បាប់។
អ្នកនាំពាក្យរដ្ឋបាលខេត្តសៀមរាប លោក លីវ សុខុន ប្រាប់ភ្នំពេញប៉ុស្តិ៍ នាថ្ងៃទី ១ កញ្ញា ថា ប្រជាពលរដ្ឋចាប់ផ្តើមវិលត្រឡប់ទៅផ្ទះវិញជាបណ្តើរៗហើយ ដោយសារពួកគេអស់ជំនឿ និងមិនមានទឹកជន់លិច ដូចការលើកឡើងរបស់លោក ខឹម វាសនា។
លោកថ្លែងថា៖ «កាលពីថ្ងៃទី ៣០ សីហា ពលរដ្ឋវិលទៅផ្ទះវិញមានចំនួនតិចតួច ប៉ុន្តែថ្ងៃទី ៣១ សីហា ពលរដ្ឋវិលត្រឡប់ខ្ទង់ ១ ពាន់ ហើយនៅថ្ងៃទី ១ ខែកញ្ញានេះ ពលរដ្ឋកាន់តែច្រើនបានសម្រុកនាំគ្នាចេញបន្តទៀត»។
ថ្លែងចេញពីទីតាំងប្រមូលផ្តុំលោក លីវ សុខុន ប្រាប់ថា អាជ្ញាធរខេត្តបាននិងកំពុងយកចិត្តទុកដាក់ និងត្រៀមរថយន្តបញ្ជូនពលរដ្ឋទៅផ្ទះរៀងៗខ្លួន ត្រៀមឡានសង្គ្រោះបន្ទាន់ ឡានពន្លត់អគ្គិភ័យ និងបានផ្តល់អាហារដល់ពលរដ្ឋថែមទៀតផង។ លោកថា វិធានការចំពោះមុខអាជ្ញាធរមិនអនុញ្ញាតឱ្យប្រជាពលរដ្ឋចូលទៅក្នុងចម្ការរបស់លោក ខឹម វាសនា ទេ ប៉ុន្តែអនុញ្ញាតឱ្យពលរដ្ឋចេញបាន។
លោកថា ភាគច្រើនពលរដ្ឋធម្មតាដែលជឿតាមការឃោសនាបែបអបិយជំនឿ បានចាកចេញពីទីតាំងប្រមូលផ្តុំជាបណ្តើរៗហើយ នៅសល់មនុស្សដែលជាសមាជិកស្នូលរបស់គណបក្សប៉ុណ្ណោះ។
ពាក់ព័ន្ធករណីនេះមនុស្ស ៦ នាក់បានចេញសារភាពកំហុស ដោយថា ពួកគេនៅពីក្រោយការបំផុសបំផុលនេះ និងព្រមទទួលស្គាល់កំហុស ហើយអះអាងថា បញ្ឈប់សកម្មភាពប្រមូលផ្តុំ។
ក្នុងកិច្ចសន្យាធ្វើនៅចំពោះមុខអាជ្ញាធរសៀមរាបចុះថ្ងៃទី ៣១ ខែសីហា ឆ្នាំ ២០២២ មានខ្លឹមសារ ថា៖ «យើងខ្ញុំសូមទទួលស្គាល់ថា ពិតជាមានកំហុសដែលបានកៀរគរ ប្រមូលផ្តុំប្រជាពលរដ្ឋ ដោយពុំមានច្បាប់អនុញ្ញាតបានប្រព្រឹត្តនៅថ្ងៃទី ២៣ ខែសីហា ឆ្នាំ ២០២២ រហូតដល់ថ្ងៃទី ៣០ ខែសីហា ឆ្នាំ ២០២២ នៅចំណុចចម្ការទំហំ ១២ ហិកតា និង ២៥ ហិកតា ជាកម្មសិទ្ធិរបស់ ឈ្មោះ នី ចាន់ពិនិត្យ ស្ថិតនៅភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប»។
ក្នុងកិច្ចសន្យា ពួកគេទាំង ៦ រូបអះអាងថា បញ្ឈប់ការសាងសង់ជម្រក និងរោងខុសច្បាប់ផ្សេងៗ សម្រាប់ឱ្យប្រជាជនទាំងនោះបន្តរស់នៅតទៅទៀតហើយ។ ចំណែកជម្រក និងរោងខុសច្បាប់ដែលបានសង់រួចហើយក៏ត្រូវរុះរើចេញដែរ។
ក្នុងកិច្ចសន្យាដដែលនេះ ពួកគេប្រកាសឱ្យពលរដ្ឋរំសាយការជួបជុំក្នុងចម្ការនេះ គិតចាប់ពីថ្ងៃទី ១ ខែកញ្ញា ដល់ថ្ងៃទី ៥ ខែកញ្ញា ឆ្នាំ ២០២២ ត្រឹមវេលាម៉ោង ១៧ និង ៣០ នាទី ជាកំហិត។
សមាជិកគណបក្សសម្ព័ន្ធដើម្បីប្រជាធិបតេយ្យ លោក នី ចាន់ពិនិត្យ ប្រាប់ភ្នំពេញប៉ុស្តិ៍ថា ក្រុមការងារបានប្រកាសឱ្យបញ្ឈប់ការប្រមូលផ្តុំរួចហើយ ប៉ុន្តែករណីពលរដ្ឋមិនព្រមចាកចេញជារឿងបុគ្គល។
លោកថា៖ «រីឯបងប្អូនប្រជាពលរដ្ឋដែលនៅបន្តស្នាក់នៅនេះ យើងមិនដឹងច្បាស់លាស់ពួកគេត្រឡប់ទៅវិញមានចំនួនប៉ុន្មាន ឬស្នាក់នៅប៉ុន្មានទេ ក៏ប៉ុន្តែយើងឃើញមានពលរដ្ឋបានធ្វើដំណើរត្រឡប់ទៅវិញបណ្តើរៗហើយ»។
លោកបន្តថា៖ «ខ្ញុំបានប្រាប់ទៅ [បងប្អូន] ដោយសារតែរដ្ឋបាលខេត្តតម្រូវអត់ឱ្យមានការជួបជុំ។ ដូច្នេះ បងប្អូនដែលមកនៅចម្ការ ខ្ញុំមិនបានអំពាវនាវទេ ហើយបងប្អូនដែលមកជាការទទួលខុសត្រូវរបស់គេ។ ពួកយើងមិនទទួលខុសត្រូវបងប្អូន ដែលមកទេ អ្នកដែលមកស្នាក់នៅនេះ យើងគ្មានម្ហូប និងបាយគ្រប់គ្រាន់ឱ្យគាត់ទេ»។
អ្នកនាំពាក្យក្រសួងការងារ និងបណ្ដុះបណ្តាលវិជ្ជាជីវៈ លោក ហេង សួរ ឱ្យដឹងថា ក្នុងចន្លោះថ្ងៃទី ២៣ ដល់ថ្ងៃទី ២៥ ខែសីហា មានពលរដ្ឋខ្មែរនៅក្រៅប្រទេសយ៉ាងហោច ៥០០ នាក់បានវិលត្រឡប់មកប្រទេសកម្ពុជាវិញ។ ក្នុងនោះ ពីប្រទេសកូរ៉េខាងត្បូងមានពលករជាង ៤០០ នាក់ ពីប្រទេសជប៉ុនមានប្រហែលជា ១០០ នាក់។ លោកអំពាវនាវឱ្យពលរដ្ឋប្រយ័ត្នប្រយែង កុំជឿលើការឃោសនាអកុសលណាមួយថ្មីទៀត នៅពេលអនាគត។
លោកថា៖ «រាល់សកម្មភាពបោះបង់ការងាររបស់បងប្អូនពលករ ដូច្នេះបានធ្វើឱ្យប៉ះពាល់កិត្តិយស និងកេរ្តិ៍ឈ្មោះរបស់បងប្អូនពលករកម្ពុជាទាំងមូល ហើយក៏ប៉ះពាល់ដល់អ្នកដែលកំពុងរង់ចាំចេញទៅធ្វើការងារនៅប្រទេសកូរ៉េ និងជប៉ុនផងដែរ។ សំខាន់ជាងនេះ សកម្មភាពរបស់បងប្អូន គឺធ្វើឱ្យប៉ះពាល់ដល់ការងារចំណូល និងផលប្រយោជន៍របស់បងប្អូន និងក្រុមគ្រួសារផ្ទាល់តែម្តង»។
លោកនាយករដ្ឋមន្ត្រី ហ៊ុន សែន ពីថ្ងៃទី ៣១ សីហា បានបញ្ជាទៅអាជ្ញាធរខេត្តសៀមរាបត្រូវតាមដាននៅចម្ការលោក ខឹម វាសនា និងអំពាវនាវដល់ពលរដ្ឋផ្សេងទៀត កុំរើសអើងអ្នកទាំងនោះ។
លោកបញ្ជាក់ថា៖ «អំពាវនាវចំពោះប្រជាពលរដ្ឋ ក៏ដូចជាអំពាវនាវទៅកាន់អាជ្ញាធរ និងកម្លាំងប្រដាប់អាវុធ ត្រូវធ្វើកិច្ចការនេះ និងត្រូវពិនិត្យមើលក្រែងមានអ្នកជំងឺ ហើយខ្ញុំសូមអំពាវនាវសូមឱ្យក្រុមគ្រួសារទាំងឡាយដែលមានការខ្វែងគំនិតគ្នារឿង ខឹម វាសនា សូមឱ្យរួបរួមគ្រួសារវិញ ហើយអ្នកនៅតាមមូលដ្ឋាននានាកុំរើសអើងចំពោះអ្នកដែលចាញ់បោកគេនេះ»៕
ជា សុខនី