ភ្នំពេញៈ អន្តរក្រសួងបានណែនាំដល់ម្ចាស់ផលិតកម្មមហាហង្សឱ្យស្វែងយល់បន្ថែមទៀតពីវប្បធម៌ ប្រពៃណី ព្រមទាំងគុណតម្លៃនៃស្ត្រីខ្មែរ ដើម្បីចៀសវាងនូវកំហុសឆ្គងដោយចេតនា ឬអចេតនាណាមួយនៅថ្ងៃមុខ ខណៈភាគីផលិតកម្មសន្យានឹងរៀបចំកម្មវិធីបវរកញ្ញាឱ្យកាន់តែល្អប្រសើរ ដើម្បីលើកស្ទួយតម្លៃស្ត្រីខ្មែរ។
ការណែនាំនេះធ្វើនៅក្នុងកិច្ចប្រជុំដោយផ្ទាល់រវាងអន្តរក្រសួងរួមមាន ក្រសួងវប្បធម៌ និងវិចិត្រសិល្បៈ ក្រសួងកិច្ចការនារី និងក្រសួងព័ត៌មាន និងអគ្គនាយកផលិតកម្មមហាហង្ស នៅថ្ងៃទី ១ ខែកញ្ញា ឆ្នាំ ២០២២ បន្ទាប់ពីមានប្រតិកម្មពីលោកនាយករដ្ឋមន្ត្រី ហ៊ុន សែន ជុំវិញកម្មវិធីប្រកួតកញ្ញាឯកដ៏អស្ចារ្យនៃកម្ពុជាឆ្នាំ ២០២២ (Miss Grand Cambodia 2022)។
សេចក្តីប្រកាសព័ត៌មានរបស់ក្រសួងវប្បធម៌ និងវិចិត្រសិល្បៈបានឱ្យដឹងថា ក្នុងកិច្ចប្រជុំនោះក្រុមការងារអន្តរក្រសួងបានពិភាក្សា និងស្តាប់របាយការណ៍ពីភាគីពាក់ព័ន្ធទាំងចំណុចវិជ្ជមានក្តី និងអវិជ្ជមានក្នុងកម្មវិធីប្រកួតកញ្ញាឯកដ៏អស្ចារ្យនៃកម្ពុជាឆ្នាំ ២០២២។
សេចក្តីប្រកាសបន្តថា «ស្ថាប័នពាក់ព័ន្ធបានធ្វើការណែនាំដល់អគ្គនាយកផលិតកម្មមហាហង្សឱ្យស្វែងយល់គ្រប់ជ្រុងជ្រោយបន្ថែមទៀតពីវប្បធម៌ទំនៀមទម្លាប់ប្រពៃណីអត្តសញ្ញាណព្រមទាំងគុណតម្លៃនៃស្ត្រីខ្មែរ ហើយសហការឱ្យបានស៊ីជម្រៅជាមួយស្ថាប័នពាក់ព័ន្ធ ដើម្បីចៀសវាងនូវកំហុសឆ្គងដោយចេតនា ឬអចេតនាណាមួយដែលនាំទៅដល់ការប៉ះពាល់ និងធ្វើឱ្យអាប់ឱននូវវប្បធម៌ជាតិ និងគុណតម្លៃស្ត្រីខ្មែរ»។
តាមរយៈកិច្ចប្រជុំនេះ ផលិតកម្មមហាហង្សក៏បានសុំអភ័យទោសចំពោះសាធារណជននូវកំហុសឆ្គងដែលបានកើតឡើងក្នុងដំណើរកម្មវិធីប្រកួត Miss Grand Cambodia 2022 ហើយសន្យាថានឹងបង្កើនកិច្ចសហការជាមួយស្ថាប័នពាក់ព័ន្ធក្នុងការរៀបចំព្រឹត្តិការណ៍វប្បធម៌នានាក្នុងពេលអនាគត ចៀសវាងកំហុសឆ្គងជាយថាហេតុដូចក្នុងឆ្នាំនេះ។
លោក អ៊ិន សុភិន អគ្គនាយកផលិតកម្មមហាហង្សបានថ្លែងក្រោយកិច្ចប្រជុំថា តាមពិតក្រុមការងារពុំមានចេតនាធ្វើឱ្យមានកំហុសនោះទេ មានតែចង់ផ្សព្វផ្សាយអ្វីៗដែលល្អពីកម្ពុជា ប៉ុន្តែផ្ទុយទៅវិញមានតែទទួលលទ្ធផលអវិជ្ជមាន ដោយសារមានបញ្ហាកំហុសបច្ចេកទេស តែលោកសន្យាថា នឹងខិតខំធ្វើឱ្យល្អនៅឆ្នាំបន្តបន្ទាប់។
លោក ឡុង ប៉ុណ្ណាស៊ីរីវត្ថ អ្នកនាំពាក្យក្រសួងវប្បធម៌ និងវិចិត្រសិល្បៈបានថ្លែងថា គោលនយោបាយរាជរដ្ឋាភិបាលតែងគាំទ្រវិស័យឯកជន និងផ្តល់កិច្ចសហការក្នុងការរៀបចំកម្មវិធីនានា ប៉ុន្តែក្នុងករណីមានការខុសឆ្គងក្រសួងសាមី ត្រូវតែហៅមកធ្វើការណែនាំបន្ថែម។
លោកបានឱ្យដឹងថា ចំពោះរូបភាពយកល្បែងតំណាងឱ្យក្រុងបាវិត ខេត្តស្វាយរៀង និងក្រុងប៉ោយប៉ែត ខេត្តបន្ទាយមានជ័យ ដែលមាននៅកម្មវិធីនោះ ត្រូវបានចែកចាយកាលពីយប់ថ្ងៃទី ២៤ ខែសីហា ឆ្នាំ ២០២២ គឺជាថ្ងៃសាកល្បងតែប៉ុណ្ណោះ។ លោកបន្តថា ក្រោយមានការរិះគន់ ក្រសួងវប្បធម៌ ក៏បានចុះណែនាំឱ្យដកចេញ ហើយនៅថ្ងៃប្រកាសលទ្ធផលផ្លូវការគឺនៅថ្ងៃទី ២៧ ខែសីហារូបភាពទាំងនោះក៏ត្រូវបានកាត់ចេញ។
លោកថា៖ «ប៉ុន្តែការខ្វះចន្លោះចៀសមិនផុតទេ អ៊ីចឹងសរុបមកវិញ មានទាំងវិជ្ជមាន និងអវិជ្ជមាន ព្រោះបើយើងអត់ជ្រើសរើសបវរកញ្ញាខ្មែរទេ តើយើងបានកញ្ញាណាក្នុងក្របខ័ណ្ឌអាស៊ានទៅចូលរួមប្រកួតជាមួយគេ វៀតណាម ថៃ ម៉ាឡេស៊ី ឥណ្ឌូនេស៊ី គេមានបេក្ខភាពចូលរួមប្រកួតស្រាប់ តែអត់កម្ពុជាក៏មិនកើតដែរ ពីព្រោះយើងជ្រើសរើស ដើម្បីបង្ហាញពីសម្រស់ស្ត្រីខ្មែរ»៕