ស្ថាប័នរដ្ឋ និងអង្គការដៃគូអន្តរជាតិចំនួន២សហការគ្នារៀបចំវគ្គបណ្តុះបណ្តាលស្តីពីការរួមបញ្ចូលគ្នានៃធុរកិច្ច ដើម្បីពង្រឹងសមត្ថភាពដល់មន្ត្រីក្នុងការស៊ើបអង្កេតផលិតផលក្លែងក្លាយ និងគ្មានគុណភាពដែលកំពុងចរាចរណ៍ក្នុងស្រុក។
វគ្គបណ្តុះបណ្តាលនេះត្រូវបានប្រារព្ធឡើងក្រោមអធិបតីភាពលោក ផាន អូន ប្រតិភូរាជរដ្ឋាភិបាលកម្ពុជាទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប. លោក Frank Jettke ប្រធានក្រុមការងារអាស៊ាននៃទីភ្នាក់ងារ GIZ រួមជាមួយនឹងតំណាងគណៈកម្មាធិការប្រកួតប្រជែងកូរ៉េ KFTC និងមានការចូលរួមពីសមាជិកនៃគណៈកម្មាធិការប្រកួតប្រជែងកម្ពុជា «គ.ប.ក.» និងប្រធានសាខា ក.ប.ប. រាជធានី-ខេត្ត និងមន្ត្រីនៃអគ្គនាយកដ្ឋាន ក.ប.ប. កាលពីថ្ងៃទី ១ ខែ កញ្ញា ឆ្នាំ ២០២២។
លោក ផាន អូន អគ្គនាយកនៃអគ្គនាយកដ្ឋាន ក.ប.ប. មានប្រសាសន៍ថា គោលបំណងនៃការរៀបចំវគ្គបណ្តុះបណ្តាលនេះឡើង ដើម្បីចែករំលែកបទពិសោធល្អ និងស្វែងយល់អំពីសេចក្តីព្រាងអនុក្រឹត្យស្តីពីលក្ខខណ្ឌនិងនីតិវិធីអំពីការរួមបញ្ជូលគ្នានៃធុរកិច្ចក្រោមច្បាប់ស្តីពីការប្រកួតប្រជែង។
លោកថា៖ «វគ្គបណ្តុះបណ្តាលនេះ ព្រមទាំងដើរតួជាវេទិកាមួយដែលផ្តល់ឱកាស ជូនដល់មន្ត្រីស៊ើបអង្កេតនៃអគ្គនាយកដ្ឋាន ក.ប.ប. អាចស្វែងយល់អំពីធាតុផ្សំ នៃនីតិវិធីនៃការរួមបញ្ចូលគ្នានៃធុរកិច្ច ក្របខ័ណ្ឌសម្រាប់វិភាគការរួមបញ្ចូលគ្នានៃធុរកិច្ច វិធានការកែតម្រូវទប់ស្កាត់នឹងការរួមបញ្ចូលគ្នានៃធុរកិច្ចដែលអាចរារាំង រឹតត្បឹត ឬបង្ខូចដល់ការប្រកួតប្រជែង តាមរយៈការចែករំលែកបទពិសោធក៏ដូចជាការអនុវត្តល្អលើការត្រួតពិនិត្យករណីរួមបញ្ចូលគ្នានៃធុរកិច្ច ពីជំនាញការប្រកួតប្រជែងដែលអញ្ជើញមកពីគណៈកម្មាធិការប្រកួតប្រជែងកូរ៉េ»៕