មន្ត្រីជាន់ខ្ពស់នៅនៃរដ្ឋសភា និងតំណាងក្រសួងបរិស្ថាន បានចុះទស្សនកិច្ចនៅទីតាំងមួយចំនួននៅក្នុងខេត្តកែប ដើម្បីស្វែងយល់ពីវិស័យកសិកម្ម និងការចិញ្ចឹមសត្វ ដែលកំពុងទទួលពីផលប៉ះពាល់នៃការប្រែប្រួលអាកាសធាតុ ដើម្បីរួមគ្នារកដំណោះស្រាយឱ្យបានទាន់ពេលវេលា។
ដំណើរទស្សនកិច្ចនោះ ដឹកនាំដោយប្រធានគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា លោកឡូយ សុផាត និងអមដំណើរដោយលោក នេត្រ ភក្ត្រា រដ្ឋលេខាធិការក្រសួងបរិស្ថាន និងក្រុមការងារកម្មវិធី សម្ព័ន្ធភាពប្រែប្រួលអាកាសធាតុកម្ពុជាដំណាក់កាលទី៣ (CCCA3) ដើម្បីស្វែងយល់តំបន់មួយចំនួន ដែលទទួលរងផលប៉ះពាល់បណ្តាលមកពីការប្រែប្រួលអាកាសធាតុកាលពីថ្ងៃទី ១ ខែកញ្ញានេះ។
មន្ត្រីពាក់ព័ន្ធបានចុះពិនិត្យទីតាំងមួយចំនួនដែលទទួលពីផលប៉ះពាល់នៃការប្រែប្រួលអាកាសធាតុក្នុងនោះរួមមាន ១- វាលស្រែពលរដ្ឋនៅសង្កាត់អង្កោល ស្រុកដំណាក់ចង្អើដែលត្រូវបានទឹកប្រៃហូរជ្រាបចូលដីស្រែ និងរងគ្រោះដោយខ្យល់កន្ត្រាក់។ ទី២-កន្លែងវារីវប្បកម្មចិញ្ចឹមបង្គា ត្រីនិងក្តាមរបស់ពលរដ្ឋនៅដំណាក់ចង្អើ។ ទី៣-ទស្សនកិច្ចនៅតំបន់ទំនប់ទឹកប៉ោហេង និងទី ៤ ឧទ្យានជាតិកែបដើម្បីស្វែងយល់ពីការគ្រប់គ្រងនិងអភិរក្សធនធានធម្មជាតិ។
លោក ឡូយ សុផាត ប្រធានគណៈកម្មការទី ៣ នៃរដ្ឋសភា បានថ្លែងថា គោលបំណងបេសកកម្មរបស់គណៈកម្មការ គឺដើម្បីស្វែងយល់នូវវិស័យពាក់ព័ន្ធ គឺផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក និងប្រមូលព័ត៌មានអំពីប្រសិទ្ធភាពនៃការអនុវត្តន៍ច្បាប់របស់ខេត្ត ក៏ដូចជាបញ្ហាប្រឈមដែលខេត្តបានជួបប្រទះ ដើម្បីរួមគ្នារកដំណោះស្រាយឱ្យបានទាន់ពេលវេលា។
ជាមួយគ្នានេះ លោក បានកោតសរសើរ និងវាយតម្លៃខ្ពស់ ចំពោះកិច្ចខិតខំប្រឹងប្រែងបំពេញភារកិច្ចយ៉ាងសកម្មរបស់រដ្ឋបាលខេត្តកែប និងមន្ទីរអង្គភាពពាក់ព័ន្ធ ដែលបានសម្រេចលទ្ធផល គួរឱ្យកោតសរសើរ ដែលធ្វើឱ្យចំនួនភ្ញៀវទេសចរមានសន្ទុះកើនឡើងវិញ បន្ទាប់ពីទទួលរងវិបត្តិកូវីដ ១៩ ។
លោកក៏បានជំរុញដល់ថ្នាក់ដឹកនាំខេត្ត ត្រូវគិតគូរពីការរៀបចំផែនការរយៈពេលវែងខ្លី ក្នុង ការអភិវឌ្ឍខេត្ត ដោយផ្តោតការយកចិត្តទុកដាក់លើការការពារបរិស្ថានជាចម្បង ព្រោះខេត្តកែបជាខេត្តទេសចរណ៍ ដែលរាជរដ្ឋាភិបាលកំណត់ទុកជាតំបន់ទេសចរណ៍សម្រាកលម្ហែប្រណីតកម្រិតខ្ពស់។
ក្នុងដំណើរទស្សនកិច្ចនោះដែរ អភិបាលខេត្តកែប លោក សោម ពិសិដ្ឋ និង លោក សំ សារីន ប្រធានក្រុមប្រឹក្សាខេត្ត បានរាយការណ៍ជូនគណៈប្រតិភូរដ្ឋសភា អំពីសភាពការណ៍រួមទូទៅ វឌ្ឍនភាពការងារ និងសមិទ្ធផលសម្រេចបានរបស់រដ្ឋបាលខេត្ត បញ្ហាប្រឈមមួយចំនួន និងស្នើសុំគណៈកម្មការរដ្ឋសភា ជួយធ្វើអន្តរាគមន៍រកដំណោះស្រាយ ពិសេសលើវិស័យទទួលបន្ទុករបស់គណៈកម្មការទី ៣ នៃរដ្ឋសភា៕