អាជ្ញាធរខ្មែរបានអំពាវនាវឱ្យពលរដ្ឋប្រុងប្រយ័ត្ន ចំពោះករណីឆបោក ក្រោមរូបភាពផ្ញើលុយ ឬ សម្ភារមានតម្លៃមកពីក្រៅប្រទេស ក្រោយជនសង្ស័យ ២ នាក់ ត្រូវបានកម្លាំងនាយកដ្ឋាននគរបាលព្រហ្មទណ្ឌស្រាវជ្រាវឃាត់ខ្លួនបាន។ នេះបើតាមការចុះផ្សាយរបស់នាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិក្រសួងមហាផ្ទៃកាលពីថ្ងៃទី ០១ កញ្ញាម្សិលមិញ។
អាជ្ញាធរបានលើកឡើងថា កាលពីខែសីហា ឆ្នាំ ២០២២ នេះមានគណនីហ្វេសប៊ុកឈ្មោះ PARIMAL បានអះអាងថា ខ្លួនជាប់គាំងនៅប្រទេសអ៊ុយក្រែន ហើយត្រូវការផ្ញើប្រាក់មកទុកនៅស្រុកខ្មែរ ដើម្បីរកមនុស្សចិត្តល្អជួយរក្សាទុកឱ្យ។ ឈ្មោះ PARIMAL បានជ្រើសរើសយកជនរងគ្រោះឈ្មោះ ឯក ពិសិដ្ឋ ភេទប្រុស រស់នៅសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។ បន្ទាប់ពីនោះ មានស្ត្រីជនជាតិខ្មែរម្នាក់អះអាងខ្លួនជាមន្ត្រីគយ ដែលបានឃាត់ប្រាក់ខាងលើ ហើយស្ត្រីរូបនោះបញ្ជាក់ទៀតថា ទាល់តែបង់ប្រាក់ពិន័យចំនួន ១៧ ៥០០ ដុល្លារ តាមរយៈវីងសិន ទើបអាចទទួលបានកញ្ចប់ប្រាក់ដែលផ្ញើពីប្រទេសអ៊ុយក្រែននោះបាន។
នាយកដ្ឋាននរគបាលព្រហ្មទណ្ឌបញ្ជាក់ដូច្នេះថា៖ «ដោយចាញ់ល្បិចកលរបស់ក្រុមឆបោកខាងលើ នៅថ្ងៃទី ២៩ ខែសីហា ឆ្នាំ ២០២២ លោក ឯក ពិសិដ្ឋ បានផ្ញើប្រាក់ជាបន្តបន្ទាប់សរុប ៩ ១២០ ដុល្លារ»។
ប៉ុន្តែក្រោយពីផ្ញើប្រាក់រួច ជនរងគ្រោះទាក់ទងទៅលែងបាន។ ចំណែកគណនីហ្វេកប៊ុកឈ្មោះ PARIMAL ក៏មិនអាចទាក់ទងបានទៀត។ គឺនៅពេលនោះហើយ ដែលជនរងគ្រោះដឹងថា ខ្លួនចាញ់បោកគេ។ នៅថ្ងៃទី ៣០ ខែសីហា ឆ្នាំ ២០២២ ឈ្មោះ PARIMAL បានទាក់ទងមកឱ្យជនរងគ្រោះ ផ្ញើប្រាក់ឱ្យបន្ថែម ៥ ០០០ ដុល្លារ ទៀតទើបអាចទទួលបានកញ្ចប់ប្រាក់នោះ។
យ៉ាងណាក៏ដោយ មុនពេលផ្ញើប្រាក់តាមការទាមទារ ជនរងគ្រោះបានរាយការណ៍មកនាយកដ្ឋាននគរបាលព្រហ្មទណ្ឌ ដើម្បីជួយអន្តរាគមន៍ ដែលឈានដល់ការឃាត់ខ្លួនជនសង្ស័យបាន ខណៈពេលកំពុងចូលទៅដកប្រាក់នៅទីតាំងវីងមួយកន្លែង ស្ថិតនៅសង្កាត់វាលវង់ ខណ្ឌ៧មករា រាជធានីភ្នំពេញ។
ជនសង្ស័យដែលឃាត់ខ្លួនបានឈ្មោះ N’ CHO MARCEL ភេទប្រុស ជនជាតិ កូដូវ័រ និងម្នាក់ទៀតឈ្មោះ ដូង ធារី ភេទស្រី ជនជាតិខ្មែរ ហើយសមត្ថកិច្ចបានដកហូតសម្ភារដកហូតមួយចំនួនដូចជា ប្រាក់ដុល្លារចំនួន ៥ ៨០០ ដុល្លារ ដែលជាប្រាក់ជនរងគ្រោះ និងទូរស័ព្ទចំនួន ០៤ គ្រឿង។
បច្ចុប្បន្ន ជនសង្ស័យទាំង ២ នាក់ខាងលើត្រូវឃាត់ខ្លួននាំយកទៅសាកសួរដោយនាយកដ្ឋាននគរបាលព្រហ្មទណ្ឌ ដើម្បីកសាងសំណុំរឿងបញ្ជូនទៅអយ្យការអមសាលាដំបូងរាជធានីភ្នំពេញចាត់ការបន្តតាមនីតិវិធី។
លោក អំ សំអាត នាយកប្រតិបត្តិនៃអង្គការលីកាដូបានប្រាប់ទីភ្នាក់ងារ CPA នៅថ្ងៃទី ០២ កញ្ញានេះថា បច្ចុប្បន្នជាសម័យឌីជីថលទំនើបមួយ ហើយប្រព័ន្ធឌីជីថលនេះក៏អាចក្លាយទៅជាអាវុធគ្រោះថ្នាក់មួយ សម្រាប់ពលរដ្ឋរងគ្រោះផងដែរ។
លោកថ្លែងដូច្នេះថា៖ «ការប្រព្រឹត្តបទល្មើសឆបោកផ្សេងៗ ឬក៏ការកម្ចីអនឡាញខុសច្បាប់ជាដើមហ្នឹង ពលរដ្ឋយើងសព្វថ្ងៃនេះកំពុងរងគ្រោះច្រើនទៅលើបញ្ហាទាំងអស់ហ្នឹង។ ដូច្នេះយើងទាមទារឱ្យមានចំណាត់ការ ផ្លូវច្បាប់ ដើម្បីទប់ស្កាត់ទៅលើការប្រើប្រាស់ការឆបោកតាមអនឡាញនេះ»។
លោកបន្តថា ដើម្បីទប់ស្កាត់ការចាញ់បោកតាមប្រព័ន្ធអនឡាញនេះ ពលរដ្ឋត្រូវមានការពិចារណាឱ្យបានហ្មត់ចត់ថា អ្វីដែលគួរជឿ អ្វីដែលមិនគួរជឿ។ ហើយតាមរយៈករណីឃាត់ខ្លួនជនសង្ស័យឆបោកទាំង ២ នាក់ខាងលើនេះរួច លោកសង្ឃឹមថា អាជ្ញាធរនឹងបង្កើនការទប់ស្កាត់ និងអនុវត្តផ្លូវច្បាប់ឱ្យបានតឹងរ៉ឹង ដើម្បីកុំឱ្យពលរដ្ឋរងគ្រោះបន្តទៀត៕