សមត្ថកិច្ចជំនាញនៃមន្ទីរប្រឆាំងគ្រឿងញៀន ឃាត់ខ្លួនជនជាតិចិនម្នាក់ ករណីដឹកជញ្ជូន និងជួញដូរគ្រឿងញៀនឆ្លងដែនជាង ១០០ គីឡូក្រាម និងត្រៀមបញ្ជូនទៅតុលាការដើម្បីបន្តនីតិវិធីតាមផ្លូវច្បាប់។ នេះបើយោងតាមមន្ទីរប្រឆាំងគ្រឿងញៀន។
យោងតាមសមត្ថកិច្ចនៃមន្ទីរប្រឆាំងគ្រឿងញៀនបានឱ្យដឹងថា ប្រតិបត្តិការបង្ក្រាបនេះត្រូវបានធ្វើឡើង កាលពីថ្ងៃទី ៣០ ខែ សីហា ឆ្នាំ ២០២២ នៅចំណុចផ្លូវដើមឈើចាំស្នេហ៍ ស្ថិតក្នុងភូមិគគី ឃុំបិតត្រាង ស្រុកព្រៃនប់ ខេត្តព្រះសីហនុ។
លទ្ធផលបង្ក្រាបបានរួមមាន ឃាត់បានជនសង្ស័យម្នាក់ ជនជាតិចិន ភេទប្រុស អាយុ ៣៦ឆ្នាំ និង ចាប់យកបានវត្ថុតាង កេតាមីន (KETAMINE) ១០០ ដុំ ស្មើទម្ងន់ ១០០ គ.ក្រ និង ៨០ ក្រាម រថយន្ត ០១ គ្រឿង និងទូរស័ព្ទដៃ ០១ គ្រឿង។
ក្នុងប្រតិបត្តិការបង្ក្រាបនេះមានការចូលរួមពីសមត្ថកិច្ចពាក់ព័ន្ធជាច្រើនរួមមាន លោក យិន បញ្ញារិទ្ធ លោក លោក អ៊ិន សុង. លោក ដុសវណ្ណា សុវឌ្ឍន: នាយករងមន្ទីរប្រឆាំងគ្រឿងញៀន និងមានការចូលរួមពីស្នងការដ្ឋាននគរបាលខេត្តព្រះវិហារ ខេត្តស្ទឹងត្រែង និងខេត្តព្រះសីហនុ ព្រមទាំងមានការសម្របសម្រួលពីព្រះរាជអាជ្ញានៃអយ្យការអមសាលាដំបូងខេត្តព្រះវិហារ-ខេត្តស្ទឹងត្រែង និង ព្រះរាជអាជ្ញារងនៃអយ្យការអមសាលាដំបូងខេត្តព្រះសីហនុផងដែរ។
បច្ចុប្បន្ន ជនសង្ស័យ និងវត្ថុតាងចាប់យកខាងលើ សមត្ថកិច្ចជំនាញបានបញ្ជូនទៅស្នងការដ្ឋាននគរបាលខេត្តព្រះវិហារ ដើម្បីកសាងសំណុំរឿង បន្តទៅសាលាដំបូងខេត្តព្រះវិហារតាមនីតិវិធី៕