ភ្នំពេញៈ នាយកដ្ឋាននគរបាលព្រហ្មទណ្ឌនៃក្រសួងមហាផ្ទៃ នៅថ្ងៃទី ៣ ខែ កញ្ញា ឆ្នាំ ២០២២ នេះបានអំពាវនាវឱ្យពលរដ្ឋដែលធ្លាប់ចាញ់បោកជនសង្ស័យឈ្មោះ N’ CHO MARCEL ភេទប្រុស ជនជាតិ កូដូវ័រ និងម្នាក់ទៀតឈ្មោះ ដូង ធារី ភេទស្រី ជនជាតិខ្មែរតាមរយៈការផ្ញើលុយឱ្យជននេះជាថ្នូរដើម្បីបានសម្ភារមកពីក្រៅប្រទេស ដាក់ពាក្យប្ដឹងដាក់បន្ទុកបន្ថែម។
នាយកដ្ឋានព្រហ្មទណ្ឌ បញ្ជាក់ថាយោងតាមចម្លើយសារភាពរបស់ជនសង្ស័យទាំង ២ នាក់នេះ ពួកគេធ្លាប់បានបោកប្រាស់ក្នុងរូបភាពផ្ញើលុយ និងសម្ភារមានតម្លៃពីក្រៅប្រទេស ទាំងបានសម្រេច និងមិនបានសម្រេច ចំនួន៧៩១០ លេខទូរស័ព្ទ អាចស្មើនឹងចំនួនជនរងគ្រោះដូចគ្នានេះដែរ។
នាយកដ្ឋានព្រហ្មទណ្ឌបន្តថាលេខទូរស័ព្ទជនរងគ្រោះដែលពួកគេធ្លាប់បានធ្វើសកម្មភាពបោកប្រាស់ ហើយកត់ទុកក្នុងសៀវភៅចំនួន៥ក្បាល ក្នុងនោះសៀវភៅទី១ មានចំនួន ១ ៦៨១ លេខ, សៀវភៅទី២ មានចំនួន ៦៣២លេខ, សៀវភៅទី៣ មានចំនួន ១ ៩៩៤ លេខ និងសៀវភៅទី៤ មានចំនួន ២៩ លេខ សរុបចំនួន ៧ ៩១០ នាក់។
នាយកដ្ឋានព្រហ្មទណ្ឌ បានអំពាវនាវឱ្យ ប្រជាពលរដ្ឋដែលធ្លាប់ចាញ់បោកជនទាំង ២ នាក់នេះ តាមរយៈការផ្ញើលុយឱ្យជននេះជាថ្នូរដើម្បីបានសម្ភារមកពីក្រៅប្រទេស សូមទំនាក់ទំនងមកនាយកដ្ឋាននគរបាលព្រហ្មទណ្ឌ ដើម្បីប្ដឹងដាក់បន្ទុកបន្ថែមទៅលើជនសង្ស័យ។
ក្រោយទទួលបានបទបញ្ជាដ៏ម៉ឺងម៉ាត់ លោក ជាវ វិបុល អនុប្រធាននាយកដ្ឋាននគរបាលព្រហ្មទណ្ឌ បានដឹកនាំកម្លាំងការិយាល័យព្រហ្មទណ្ឌកម្រិតធ្ងន់ សហការជាមួយសមត្ថកិច្ចពាក់ព័ន្ធ បើកការស្រាវជ្រាវយ៉ាងយកចិត្តទុកដាក់ និងឈានរហូតដល់ការឃាត់ខ្លួនជនសង្ស័យទាំង២នាក់ខាងលើ ដើម្បីកសាងសំណុំរឿងបញ្ជូនទៅតុលាការ៕