ភ្នំពេញៈ បន្ទាប់ពីស្ងៀមស្ងាត់មួយរយៈធំ កញ្ញា កឹម មនោវិទ្យា នៅថ្ងៃទី ៣ កញ្ញានេះបានសរសេររៀបរាប់លើបណ្ដាញសង្គមហ្វេសប៊ុករបស់ខ្លួន ដើម្បីរំឭកខួប ៥ ឆ្នាំនៃការចាប់ខ្លួន លោក កឹម សុខា ដែលជាឪពុកជាមួយនឹងក្ដីសង្ឃឹមថា ឪពុករបស់កញ្ញានឹងទទួលបានសេរីភាពពេញលេញឡើងវិញ។
កញ្ញាសរសេររៀបរាប់ថា «នាកណ្ដាលអធ្រាត្រថ្ងៃទី ២ កញ្ញាឆ្នាំ ២០១៧ កងកម្លាំងប្រដាប់អាវុធរាប់រយនាក់បានវាយលុកចូលគេហដ្ឋានគ្រួសារខ្ញុំយ៉ាងកំរោលដោយគ្មានដីកា ហើយចាប់ខ្លួនឪពុកខ្ញុំ ដែលជាមេបក្សប្រឆាំង និងកំពុងមានអភ័យឯកសិទ្ធិជាតំណាងរាស្ត្រ»។
កញ្ញាក៏បានប្រដូចហេតុការណ៍កាលណោះ មិនខុសពីសម័យ ប៉ុល ពត ដែលពេលនោះហើយ គឺជាចំណុចផ្ដើមនៃការកំចាត់លទ្ធិប្រជាធិបតេយ្យ។ កញ្ញាសរសេរថា៖ «ពួកយើងខ្ញុំជាអ្នកប្រជាធិបតេយ្យបាននិងកំពុងតស៊ូមតិបែបអហិង្សាជាសកល ដើម្បីទាមទារស្ដារលទ្ធិប្រជាធិបតេយ្យឡើងវិញ ដោយផ្ដើមពីការផ្ដល់សេរីភាពពេញលេញជូនមេដឹកនាំអតីតបក្សប្រឆាំង លោក កឹម សុខា» ។
បើតាមកូនស្រីរបស់លោក កឹម សុខា រូបនេះ សំណុំរឿងរបស់ឪពុកខ្លួនផ្សារភ្ជាប់នឹងវិធានការផ្សេងៗរបស់សហគមន៍អន្តរជាតិ ដែលនឹងកើតមានជាបន្តបន្ទាប់រហូតទាល់តែកម្ពុជាបើកផ្លូវប្រជាធិបតេយ្យឡើងវិញ។ «៥ ឆ្នាំកន្លងផុតទៅ ការតស៊ូរបស់យើងមិនទាន់បានដល់គោលដៅនៅឡើយ ប៉ុន្តែយើងបានទទួលលទ្ធផលជាវិជ្ជមានខ្លះ ដូចជាការផ្លាស់ប្ដូរលោក កឹម សុខា ចេញពីពន្ធនាគារជាដើម…»។
លោក សុខ ឥសាន អ្នកនាំពាក្យគណបក្សប្រជាជនកម្ពុជានៅថ្ងៃទី ០៣ កញ្ញានេះបានលើកឡើងថា នៅក្នុងសំណុំរឿងនេះ កញ្ញា កឹម មនោវិទ្យា បន្តរក្សាភាពស្ងៀមស្ងាត់ជារឿងល្អ ហើយភាពស្ងៀមស្ងាត់អាចនឹងមានដំណោះស្រាយ។
លោក សុខ ឥសាន ថ្លែងថា៖ «គួរតែក្មួយស្រី កឹម មនោវិទ្យា នៅឱ្យស្ងៀម ហើយទុកឱ្យសំណុំរឿងដំណើរការទៅតាមនីតិវិធីរបស់តុលាការវាល្អជាង។ វាប្រៀបដូចជាការបណ្ដោយឱ្យទឹកចេះតែហូរ ដែលមិនទាក់ជាមួយបន្លា ឬដុំថ្ម ហើយបើកាលណាបន្តអធិប្បាយ យើងថា ខ្លួនយើងនិយាយត្រូវហើយ ក៏ប៉ុន្តែខ្លឹមសារដែលយើងថា វាប្រៀបដូចជាការដាក់បន្ទុកលើរដ្ឋាភិបាល»។
សម្រាប់លោក សុខ ឥសាន លោកធុញនឹងការទាមទារទាំងឡាយណាដែលភ្ជាប់ជាមួយពាក្យថា លម្ហប្រជាធិបតេយ្យ។ «ខ្ញុំសាំត្រចៀកនឹងពាក្យនេះ ហើយរាល់ថ្ងៃនេះ បងប្អូនអ្នកប្រឆាំងនិយាយតែពីរឿងសិទ្ធិមនុស្ស និងលទ្ធិប្រជាធិបតេយ្យ។ តែត្រង់ខ្លួនឯងរំលោភប្រជាធិបតេយ្យ អត់ឮនិយាយទេ។ ការនិយាយដាក់បន្ទុកតែទៅលើរាជរដ្ឋាភិបាលហ្នឹងហើយ ដែលធ្វើឱ្យរាំងស្ទះការងារ»។
គិតចាប់តាំងពីលោក កឹម សុខា អតីតប្រធានអតីតគណបក្សសង្គ្រោះជាតិ ត្រូវបានចាប់ខ្លួននៅយប់ថ្ងៃទី ០២ ឈានចូលថ្ងៃទី ០៣ ខែកញ្ញា ឆ្នាំ ២០១៧ រហូតមកដល់ថ្ងៃទី ០២ ខែកញ្ញា ឆ្នាំ ២០២២ នេះ គឺមានរយៈពេល ៥ ឆ្នាំ។ ថ្វីបើពេលវេលាកន្លងទៅអស់រយៈពេល ៥ ឆ្នាំហើយក្តី តែសំណុំរឿងរបស់លោក នៅតែមិនទាន់អាចរកទីបញ្ចប់ឃើញ ហើយក៏គ្មានភាគីណាមួយអាចអះអាងបានដែរថា សំណុំរឿងនេះនឹងត្រូវអូសបន្លាយរហូតដល់ពេលណា។ ប៉ុន្តែនៅក្នុងសំណុំរឿងក្បត់ជាតិរបស់លោក កឹម សុខា មេធាវីរបស់លោកធ្លាប់បាននិយាយថា គឺទាល់តែមានការដោះស្រាយជាលក្ខណៈនយោបាយទើបមានសង្ឃឹម។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញ ប្រាប់ឱ្យដឹងនៅថ្ងៃទី ៣ ខែកញ្ញាថា លោកមិនបានឃើញសារកូនស្រីរបស់លោក កឹម សុខា ឱ្យពន្លឿននីតិវិធីដើម្បីបញ្ចប់សវនាការនោះទេ។ ប៉ុន្តែ លោកមិនយល់ទាល់តែសោះ ចំពោះការស្នើសុំឱ្យមានការដោះលែងឱ្យមានសេរីភាព ខណៈដែលរាល់ថ្ងៃនេះលោក កឹម សុខា មានសេរីភាព និងមិនត្រូវបានឃាត់ខ្លួន ឬឃុំខ្លួនឯណា ហេតុអីគាត់ទាមទារឱ្យដោះលែង?
លោកធ្លាប់បញ្ជាក់ថា សវនាការលោក កឹម សុខា គឺជាសវនាការព្រហ្មទណ្ឌ ស្របតាមក្រមព្រហ្មទណ្ឌ និងក្រមនីតិវិធីព្រហ្មទណ្ឌ៕