សៀមរាបៈ គិតត្រឹមថ្ងៃទី ២ ខែកញ្ញា ឆ្នាំ ២០២២ នេះ ប្រជាពលរដ្ឋដែលគ្រប់លក្ខខណ្ឌ និងស្ម័គ្រចិត្តរុះរើសំណង់ខុសច្បាប់ស្ថិតក្នុងតំបន់រណីយដ្ឋានអង្គរ ចំនួន ១៨១ គ្រួសារបន្ថែមទៀតបានចាប់ឆ្នោតជ្រើសរើសដីឡូត៍នៅតំបន់រុនតាឯកធ្វើឱ្យចំនួនសរុបកើនដល់ ១ ១១៧ គ្រួសារ។ នេះ បើតាមលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារចុះវាស់វែង។
បើតាម លោក ជា សុផារ៉ា គិតត្រឹមថ្ងៃទី ២៩ ខែសីហា ឆ្នាំ ២០២២ ការអនុវត្តយុទ្ធនាការចុះវាស់វែង កំណត់និយាមកាក្បាលដី និងអត្តសញ្ញាណអ្នកកាន់កាប់ដី និងសំណង់ខុសច្បាប់ក្នុងតំបន់រមណីយដ្ឋានអង្គរ និងតំបន់ដទៃទៀតស្ថិតក្រោមការគ្រប់គ្រងរបស់អាជ្ញាធរជាតិអប្សរាទទួលបានលទ្ធផល ១. វាស់វែងក្បាលដីនៅភូមិចំនួន ៧៩ ភូមិ នៃភូមិគោលដៅចំនួន ១១៤, ២. រៀបចំដីឡូត៍ សម្រេចបានទំហំ ១១១,១០ ហិកតា, ៣. ផ្លូវក្រួសក្រហម សម្រេចបានប្រវែង ៣ ២៣០ ម៉ែត្រ ស្មើ ១៩,១៣%, និង ៤. បោះបង្គោល ព្រំដីឡូត៍នៅភូមិធម្មជាតិរុនតាឯកបានចំនួន ៨១៩ ឡូតិ៍៕