ភ្នំពេញៈអង្គការកម្មវិធីអភិវឌ្ឍន៍ធនធានយុវជន (YRDP) រៀបចំវេទិកាជជែកដេញដោលជាសាធារណៈលើប្រធានបទ «ដើម្បីបង្កើនឱកាសនិងប្រសិទ្ធភាពការងារក្នុងទីផ្សារការងារនិស្សិតនៅក្នុងគ្រឹះស្ថានឧត្តមសិក្សាត្រូវកែតម្រូវឱ្យមានបទពិសោធហាត់ការទៅតាមជំនាញ» បន្ទាប់ពីមើលឃើញថា យុវជនកម្ពុជាកំពុងប្រឈមនឹងការចាប់យកឱកាសការងារខុសទៅនឹងជំនាញ។
វេទិកាជជែកដេញដោលនេះ ត្រូវបានធ្វើឡើងកាលពីថ្ងៃទី៤កញ្ញា នៅរាជធានីភ្នំពេញ ដោយមានយុវជនជាង១០០នាក់ចូលរួមក្នុងគោលបំណងដើម្បីផ្តល់ឱកាសឱ្យយុវជនបានស្វែងយល់ និងបង្កើនសមត្ថភាពក្នុងការវិភាគ និងជជែកដេញដោលគ្នាទៅលើការវិវត្តនៃសង្គម សេដ្ឋកិច្ច និងនយោបាយដែលប៉ះពាល់ដល់ការងាររបស់យុវជន។
អង្គការ YRDP បានឱ្យដឹងបន្ថែមថា វេទិកានេះ ក៏មានបំណងដើម្បីទទួលបានការឆ្លើយតបពីភាគីពាក់ព័ន្ធក្នុងការធានា ការការពារ និងការលើកកម្ពស់ភាពមានការងារធ្វើ និងមុខរបរត្រឹមត្រូវទៅដល់ប្រជាពលរដ្ឋទូទៅ ជាពិសេសយុវជនផងដែរ។
អង្គការ YRDP បានបញ្ជាក់ថា«យុវជន២ក្រុមដែលមានចំនួន៦នាក់បានចូលរួមជជែកដេញដោលទៅលើប្រធានបទនេះ។ជាការមើលឃើញយុវជនជជែកដេញដោលច្រើន ដោយផ្ដោតទៅលើគុណតម្លៃនៃការអប់រំដោយផ្តោតទៅលើសមត្ថភាព និងចំណេះដឹង និងជំនាញដែលនិស្សិតគួរតែមានក្នុងពេលដែលពួកគេកំពុងសិក្សាសម្រាប់ការត្រៀមខ្លួនចូលក្នុងវិស័យការងាររបស់ពួកគេ»។
កញ្ញា ស៊ូ ម៉ាឡៃ (Sou Malay) បុគ្គលិកនៃអង្គការ YRDP បានប្រាប់ភ្នំពេញប៉ុស្តិ៍នៅថ្ងៃទី៤ កញ្ញា បន្ថែមថា ហេតុ-ផលដែលអង្គការ YRDP បានលើកយកប្រធានបទនេះមកជជែកដេញដោល ព្រោះតែមើលឃើញអំពីការវិវត្តនូវសង្គម សេដ្ឋកិច្ច និងនយោបាយរបស់កម្ពុជា ដែលមានការវិវត្តច្រើនទៅមុខ ហើយក្នុងនោះ YRDP ក៏មើលឃើញពីគន្លងនៃទីផ្សារការងាររបស់យុវជនផងដែរ។
បន្ថែមពីនេះ កញ្ញា បន្តថា វេទិកានេះ ក៏ចង់ផ្ដល់ឱកាសឱ្យយុវជនសិក្សាស្វែងយល់អំពីតម្រូវការ និងបញ្ហាប្រឈមរបស់ពួកគេតាមរយៈការសិក្សាស្រាវជ្រាវ ប្រមូលនូវព័ត៌មាន ទិន្នន័យ និងការវិភាគបែបលក្ខណៈវិទ្យាសាស្ត្រទៅលើប្រធានបទខាងលើផងដែរ។
កញ្ញា ស៊ូ ម៉ាឡៃ បានបញ្ជាក់ថា៖«ស្របគ្នាជាមួយនឹងការព្រួយបារម្ភនៅពេលដែលពួកគេបញ្ចប់ការសិក្សាហើយពិបាកក្នុងការស្វែងរកការងារដែលត្រូវទៅនឹងជំនាញរបស់ពួកគេ ខណៈពេលដែលពួកគេខ្វះនូវបទពិសោធការងារ និងការហ្វឹកហាត់ការងារមិនទាន់គ្រប់គ្រាន់ទៅលើជំនាញដែលខ្លួនបានរៀន ហើយទីផ្សារការងារខ្លះមិនបានឆ្លើយតបទៅនឹងជំនាញដែលយុវជនកំពុងតែសិក្សានៅសាកលវិទ្យាល័យពេលបច្ចុប្បន្នទេ។ យើងមើលឃើញថា មានភាពមិនស៊ីគ្នារវាងតម្រូវការទីផ្សារការងារ និងការផ្គត់ផ្គង់កម្លាំងពលកម្មជាដើម»។
កញ្ញា មឿន វិច្ឆិកា ជានិស្សិតឆ្នាំទី៥ សាលាតិចណូ និងជាបេក្ខជនចូលរួមការជជែកដេញដោល១រូប បានប្រាប់ភ្នំពេញប៉ុស្តិ៍ នៅថ្ងៃទី៤ កញ្ញាថា ការជជែកទៅលើប្រធានបទនេះ គឺជារឿងមួយដែលល្អ ព្រោះបច្ចុប្បន្ន យុវជន កំពុងជួបប្រទះនូវបញ្ហានេះ។ កញ្ញា រំពឹងថា ការចូលរួមរបស់យុវជន និងការជជែកដេញរបស់ខ្លួនក្នុងពេលនេះ អាចជាមធ្យោបាយមួយសម្រាប់ឱ្យស្ថាប័នពាក់ព័ន្ធបានដឹង បានឮ និងចូលរួមដោះស្រាយទាំងអស់គ្នា។
កញ្ញា បានបញ្ជាក់ថា៖ «សព្វថ្ងៃនេះ យើងឃើញយុវជនជាច្រើន គាត់មានបញ្ហាពិបាករកការងារធ្វើ និងធ្វើការមិនត្រូវជំនាញដែលគាត់បានបញ្ចប់ថ្នាក់បរិញ្ញាបត្រ។ខ្ញុំគិតថា ក្នុងនាមជាយុវជន គឺត្រូវតែសម្រួចសមត្ថភាពរបស់គាត់ឱ្យបានល្អប្រសើរ ដើម្បីចាប់យកការងារផ្សេង។ ខ្ញុំគិតថា ការចូលរួមពីភាគីពាក់ព័ន្ធ គឺពិតជាសំខាន់មែន ដើម្បីឱ្យពួកគាត់ ធានាថា យុវជនយើងភាគច្រើន ត្រូវតែរកការងារ ហើយត្រូវជំនាញបាន»។
ជាមួយនឹងក្តីសង្ឃឹមបែបនេះ កញ្ញា មឿន វិច្ឆិកា សំណូមពរដល់ស្ថាប័នពាក់ព័ន្ធឱ្យជំរុញការបង្កើន និងយកចិត្តដាក់ផ្តល់នូវដំណោះស្រាយរួមគ្នា ដើម្បីធ្វើឱ្យយុវជនកម្ពុជា អាចទទួលបានឱកាសការងារ ដែលត្រូវនឹងជំនាញរបស់ពួកគេ ជាពិសេសទទួលនូវអ្វីដែលយុវជន បានលើកយកមកជជែកក្នុងវេទិកានេះ។
លោក រស់ សុវាចា អ្នកនាំពាក្យក្រសួងអប់រំយុវជន និងកីឡា បានប្រាប់ភ្នំពេញប៉ុស្តិ៍ថា ក្រសួងស្វាគមន៍ និងលើកទឹកចិត្តចំពោះកិច្ចសហការវិជ្ជមានចំពោះស្ថាប័នដៃគូអភិវឌ្ឍន៍ និងគ្រប់ភាគីពាក់ព័ន្ធទាំងអស់ក្នុងការលើកកម្ពស់ការអនុវត្តគោលនយោបាយអភិវឌ្ឍន៍យុវជន និងកម្មវិធីសិក្សាផ្សេងទៀតដែលស្របនឹងផែនការយុទ្ធសាស្ត្រវិស័យអប់រំ ក្នុងន័យចូលរួមលើកកម្ពស់គុណភាពយុវជនសម្រាប់ការចូលរួមការអភិវឌ្ឍសេដ្ឋកិច្ចកម្ពុជា។
លោកបានបន្តថា យុវជនសតវត្សរ៍ទី២១ ជាយុវជនបន្តវេន និងជាសសរទ្រូងសម្រាប់ការអភិវឌ្ឍសង្គម និងសេដ្ឋកិច្ចកម្ពុជាឆ្ពោះទៅសម្រេចចក្ខុវិស័យកម្ពុជានៅឆ្នាំ២០៣០ និង២០៥០។ដូចនេះ លោកថា យុវជនត្រូវបន្តទទួលបាននូវការអភិវឌ្ឍលើគ្រប់ទិដ្ឋភាពនិងតាមគ្រប់រូបភាព ជាពិសេសដូចជា ការចូលរួមរបស់យុវជនក្នុងវេទិកាដែលរៀបចំដោយអង្គការនេះ។
លោកបានបញ្ជាក់ថា៖«ក្រសួងគាំទ្រ រាល់កម្មវិធីអភិវឌ្ឍន៍យុវជនទាំងបំណិនបច្ចេកទេស និងបំណិនទន់ ដោយផ្តោតលើបំណិនសតវត្សរ៍ទី២១ និងការលើកកម្ពស់ភាពជាអ្នកដឹកនាំ។ ក្រសួងគាំទ្រដល់ការបណ្តុះបណ្តាលជំនាញវិជ្ជា-ជីវៈ ទាំងការអប់រំ ការបណ្តុះបណ្តាលវិជ្ជាជីវៈ និងបំណិនទន់ ដើម្បីឱ្យយុវជនមានសមត្ថភាពចូលរួមដោះស្រាយបញ្ហារួមរបស់ប្រទេសជាតិ មានភាពក្លាហាន និងមានភាពឈ្លាសវៃក្នុងការបញ្ចេញមតិ មានសមត្ថភាពត្រិះរិះពិចារណា សិក្សាស្រាវជ្រាវ ចែករំលែកគំនិត និងជំនាញក្នុងការនិយាយជាសាធារណៈប្រកបដោយក្រមសីលធម៌ និងចំណេះដឹងពិតប្រាកដ »៕