.jpg)
ប្លង់បង្ហាញទីតាំង ដែលស្នើឡើងដោយក្រុមហ៊ុន នៅសង្កាត់កំពង់ឆ្នាំង ក្រុងកំពង់ឆ្នាំង។ រូបថត សហការី
កំពង់ឆ្នាំងៈ រដ្ឋបាលក្រុងកំពង់ឆ្នាំងបានលុបចោលសំណើសុំស្ដារបឹងទំហំជាង៥០០ហិកតា ក្នុងភូមិសាស្ត្រសង្កាត់កំពង់ឆ្នាំង ដែលស្នើឡើង ដោយលោកច័ន្ទ វិចិត្រ អគ្គនាយក ក្រុមហ៊ុន បុរី វីឡា វិចិត្រ ហាយលែន ដោយសារសំណើស្តារបឹងនោះត្រួតលើគម្រោងគ្រប់គ្រងកែលម្អបរិស្ថានជុំវិញបឹងទន្លេសាបជំហាន១។
យោងលិខិតចុះថ្ងៃទី២ ខែកញ្ញា ឆ្នាំ២០២២ របស់រដ្ឋបាលក្រុងកំពង់ឆ្នាំង ដែលភ្នំពេញប៉ុស្តិ៍ ទើបតែទទួលបាន ក្រុមហ៊ុន បុរី វីឡា វិចិត្រ ហាយលែន កាលពីថ្ងៃទី១៥ ខែសីហា ឆ្នាំ២០២២ បានដាក់សំណើសុំបូមស្ដារបឹងទំហំជាង៥២៦ហិកតា នៅភូមិដំណាក់ពពូល ភូមិស្រែព្រីង ភូមិកណ្ដាល សង្កាត់កំពង់ឆ្នាំង ក្រុងកំពង់ឆ្នាំង ដែលមានសភាពគោករាក់ខ្លាំងក្នុងរដូវប្រាំង ដែលចាំបាច់ត្រូវធ្វើការបូមស្ដារដើម្បីជួយសម្រួលដល់ប្រជាពលរដ្ឋក្នុងមូលដ្ឋានក្នុងការទទួលបានទឹកគ្រប់គ្រាន់សម្រាប់ស្រោចស្រពស្រូវប្រាំង និងដាំដុះដំណាំចម្ការ។
ប៉ុន្តែសំណើនេះ ត្រូវបានអភិបាលក្រុងកំពង់ឆ្នាំង លោកយិន សាវ៉េន ពិនិត្យឃើញមានភាពមិនច្បាស់លាស់ ដែលក្នុងនោះទីតាំងស្នើសុំរៀបចំបូមស្តារបឹងបានត្រួតលើគម្រោងគ្រប់គ្រងកែលម្អបរិស្ថានជុំវិញបឹងទន្លេសាបជំហាន១ (គម្រោងអាងប្រព្រឹត្តិកម្មទឹកកខ្វក់ក្រុងកំពង់ឆ្នាំង)។ រីឯប្លង់បង្ហាញពីទីតាំងស្នើសុំបានធ្វើឡើងដោយឯកតោភាគី មិនមានការឯកភាពពីអង្គភាពជំនាញពាក់ព័ន្ធ ជាពិសេស ពីមន្ទីរធនធានទឹក និងឧតុនិយម មន្ទីរកសិកម្ម និងមន្ទីរសាធារណការ និងដឹកជញ្ជូនខេត្តកំពង់ឆ្នាំង។
លោកយិន សាវ៉េន បញ្ជាក់ថា៖«ពេលគាត់[ច័ន្ទ វិចិត្រ] មកសុំការចុះហត្ថលេខា ដើម្បីបញ្ជូនសំណើទៅរដ្ឋបាលខេត្តបន្តនោះ គាត់បានបំភ្លឺថា ឯកសារដែលគាត់បានដាក់ស្នើមកនេះ ខាងភាគីក្រុមហ៊ុន នឹងធ្វើការស្នើសុំអនុលោមភាពដល់ក្រសួងពាក់ព័ន្ធ មិនបង្កឱ្យមានបញ្ហាផ្លូវច្បាប់ ប៉ះដល់គម្រោង ADB និងផលដំណាំប្រជាពលរដ្ឋឡើយ»។
លោកបន្ថែមថា៖«ប៉ុន្តែក្រោយពីយើងពិនិត្យភាពជាក់ស្ដែងទៅ គឺ គាត់នៅមិនទាន់មានការស្នើសុំអនុលោមភាពពីក្រសួង និងស្ថាប័នជំនាញពាក់ព័ន្ធនៅឡើយទេ ដូច្នេះរដ្ឋបាលក្រុងកំពង់ឆ្នាំងយើងមានតែលុបចោលសំណើរបស់គាត់»។
ជុំវិញការលុបចោលសំណើនេះ លោកច័ន្ទ វិចិត្រ អគ្គនាយកក្រុមហ៊ុន បុរី វីឡា វិចិត្រ ហាយលែន បានប្រាប់ភ្នំពេញប៉ុស្តិ៍ថា សំណើនោះ លោកធ្វើតាមសំណូមពររបស់ប្រជាពលរដ្ឋក្នុងមូលដ្ឋាន ដែលបានស្នើសុំឱ្យក្រុមហ៊ុនរបស់លោកជួយអន្តរាគមន៍បូមស្ដារបឹង ដែលអ្នកភូមិក្នុងតំបន់នោះ បានអះអាងថា មានភាពគោករាក់ខ្លាំងក្នុងរដូវប្រាំង ។
លោកថ្លែងថា៖«ក្រោយស្ដាប់ប្រជាពលរដ្ឋក្នុងមូលដ្ឋានរៀបរាប់ពីការលំបាក រឿងខ្វះទឹកស្រោចស្រពស្រូវ និងដំណាំចម្ការរួមផ្សំផ្សេងទៀត នៅក្នុងរដូវប្រាំងនោះ ក្រុមហ៊ុនយើង ក៏បានទទួលយល់ព្រមថា នឹងជួយអន្តរាគមន៍បូមស្ដារបឹងនោះ ហើយក៏រៀបចំធ្វើសំណើសុំទៅអាជ្ញាធរក្រុង និង ខេត្តដើម្បីពិនិត្យនិងសម្រេច»។
លោកច័ន្ទ វិចិត្រ បន្តថា៖«ប៉ុន្តែឥឡូវនេះអាជ្ញាធរបានសម្រេចលុបចោលសំណើរបស់ក្រុមហ៊ុនយើងទៅហើយ។ ដូច្នេះក្រុមហ៊ុនយើង មិនអាចជួយអន្តរាគមន៍បូមស្ដារបឹងនោះជូនពួកគាត់បានទេ»។
បើតាមលោកវិចិត្រ សំណើ និងគំរូប្លង់ទីតាំងដែលត្រូវបូមស្ដារបឹងនោះ លោកបានដាក់ស្នើទៅរដ្ឋបាលក្រុងកំពង់ឆ្នាំង ដើម្បីស្នើសុំចំណារឯកភាពពីគណៈអភិបាលខេត្តកំពង់ឆ្នាំង ពិនិត្យ និងសម្រេច។ ប៉ុន្តែគំរូប្លង់ទីតាំងដែលត្រូវបូមស្ដារនោះ គឺខាងភាគីក្រុមហ៊ុនរបស់លោក ធ្វើឡើងតាមតែអ្នកភូមិអះអាងថា មានភាពគោករាក់ខ្លាំងនៅរដូវប្រាំង មិនទាន់បានឆ្លងការឯកភាពពីក្រុមមន្ត្រីបច្ចេកទេស នៃក្រសួង ស្ថាប័នជំនាញ ដែលពាក់ព័ន្ធនៅឡើយទេ។
ទោះយ៉ាងណា លោកនិយាយថា ក្រុមហ៊ុនរបស់លោក នៅតែស្វាគមន៍គាំទ្រ និងបន្តកិច្ចសហការជាមួយអាជ្ញាធរមូលដ្ឋានជានិច្ច ប្រសិនបើអាជ្ញាធរមានការស្នើសុំឱ្យជួយអន្តរាគមន៍ បូមស្ដារបឹងនៅទីតាំងណាមួយ ដែលពុំមានផលប៉ះពាល់ដល់គម្រោងអភិវឌ្ឍន៍ផ្សេងរបស់រដ្ឋ ។
ជុំវិញករណីនេះ អ្នកស្រីកែវ សុផាត ចៅសង្កាត់កំពង់ឆ្នាំង ប្រាប់ភ្នំពេញប៉ុស្តិ៍ថា ការពិត ផ្ទៃបឹងក្នុងតំបន់ភូមិសាស្ត្រដែលក្រុមហ៊ុនបានលើកឡើងជាសំណើសុំឱ្យមានការបូមស្ដារនោះ មានកន្លែងខ្លះបានគោករាក់ពិតប្រាកដមែន។
អ្នកស្រីថ្លែងថា៖«នៅរដូវប្រាំងប្រជាពលរដ្ឋយើងនៅក្នុងតំបន់នោះតែងតែជួបប្រឈមបញ្ហាខ្វះទឹកស្រោចស្រពស្រូវប្រាំង និងដំណាំរួមផ្សំផ្សេងទៀត។ ដូច្នេះបើក្រុមហ៊ុនអាចជួយបូមស្ដារបាននោះ វាគឺជារឿងល្អខ្លាំងណាស់»។
ទោះយ៉ាងណា អ្នកស្រីចៅសង្កាត់ បានសំណូមពរឱ្យភាគីក្រុមហ៊ុនមានការសហការជាមួយក្រុមមន្ត្រីបច្ចេកទេសនៃស្ថាប័នជំនាញ និងអង្គភាពពាក់ព័ន្ធនានា ជាពិសេស មន្ទីរធនធានទឹក មន្ទីរកសិកម្ម និងមន្ទីរសាធារណការនិងដឹកជញ្ជូនខេត្តកំពង់ឆ្នាំង ដើម្បីសិក្សាឡើងវិញលើគំរូប្លង់ទីតាំង ដែលត្រូវបូមស្ដារ ដើម្បីកុំឱ្យជាន់គ្នាទៅលើគម្រោងផ្សេងទៀតរបស់រដ្ឋ៕
