ភ្នំពេញៈ ភ្លៀងលាយឡំខ្យល់ និងផ្គររន្ទះបានបណ្ដាលឱ្យពលរដ្ឋម្នាក់ស្លាប់និងខូចខាតផ្ទះអស់ ៩ ខ្នង នៅស្រុកមោងឫស្សី ខេត្តបាត់ដំបង ខណៈក្រសួងធនធានទឹកនិងឧតុនិយមបានព្រមានថា ខេត្តចំនួន១២ ដែលស្ថិតនៅក្នុងភូមិសាស្ត្រជាប់តំបន់ភ្នំ ជួរភ្នំ និងទីទំនាបជាប់ផ្លូវទឹកតំបន់ផ្ទៃរងទឹកភ្លៀងអាចនឹងមានជំនន់ទឹកភ្លៀងកើតឡើងសាជាថ្មីនៅក្នុងសប្ដាហ៍នេះ។
លោក ស គឹមឡុង អធិការស្រុកមោងឫស្សីបានប្រាប់ ភ្នំពេញ ប៉ុស្តិ៍ នៅរសៀលថ្ងៃទី ៤ ខែ កញ្ញា ឆ្នាំ ២០២២ ថា ភ្លៀងលាយឡំខ្យល់កន្ត្រាក់បានបំផ្លាញផ្ទះប្រជាពលរដ្ឋ ៩ ខ្នង នៅភូមិព្រៃស្វាយនិងភូមិកាឡោមភ្លុក នៃឃុំព្រៃស្វាយ ខណៈបាតុភូតរន្ទះបាញ់បានបង្កឱ្យស្លាប់បុរសម្នាក់ឈ្មោះ ធិញ ធឿត អាយុ ៥៦ ឆ្នាំនៅភូមិចកតូច នៃឃុំកកោះ។
លោក គឹមឡុង បាននិយាយថា៖«ក្នុងរយៈពេល២ថ្ងៃមកនេះ មានភ្លៀងខ្យល់បក់បោកខ្លាំង និងមានរន្ទះបាញ់កើតឡើងច្រើនគួរឱ្យខ្លាច ប៉ុន្តែនៅមិនទាន់មានគ្រោះជំនន់ទឹកភ្លៀងកើតឡើងនៅឡើយទេ»។
ជុំវិញបញ្ហាគ្រោះធម្មជាតិដែលបណ្ដាលមកពីការប្រែប្រួលអាកាសធាតុនេះ លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយម កាលពីថ្ងៃទី ២ ខែ កញ្ញា ឆ្នាំ ២០២២ បានព្រមានថា ចាប់ពីថ្ងៃទី ៥ ដល់ថ្ងៃទី ៩ ខែកញ្ញាខាងមុខនេះ ខេត្តចំនួន ១២ ដែលស្ថិតនៅក្នុងភូមិសាស្ត្រជាប់តំបន់ភ្នំ ជួរភ្នំ និងទីទំនាបជាប់ផ្លូវទឹក រួមមាន ខេត្តព្រះវិហារ រតនគិរី កំពង់ធំ ឧត្តរមានជ័យ បន្ទាយមានជ័យ បាត់ដំបង សៀមរាប ប៉ៃលិន ពោធិ៍សាត់ កំពង់ស្ពឺ កោះកុង និងខេត្តព្រះសីហនុ នឹងមានហានិភ័យខ្ពស់ចំពោះជំនន់ទឹកភ្លៀង។
ការព្រមាននេះបានធ្វើឡើងបន្ទាប់ពីលោកបានពិនិត្យឃើញប្រព័ន្ធសម្ពាធទាបដែលអូសកាត់លើភាគខាងជើងប្រទេសថៃ ឡាវ និងវៀតណាម បានរំកិលចុះមកក្រោម ហើយបង្កើនឥទ្ធិពលមកគ្របដណ្ដប់លើប្រទេសកម្ពុជា និងអូសបន្លាយក្នុងរយៈពេលវែង ដែលស្ថានភាពនេះនឹងធ្វើឱ្យមានភ្លៀងធ្លាក់រាយប៉ាយលើផ្ទៃប្រទេសជាមួយនឹងទឹកភ្លៀងដែលមានលក្ខណៈធ្លាក់ជាប់ជាបន្តក្នុងកម្រិតពីមធ្យមទៅបង្គួរ និងមានលាយឡំដោយខ្យល់កន្ត្រាក់បក់បោកខ្លាំង ព្រមជាមួយនឹងផ្គររន្ទះផងដែរ។
ទន្ទឹមនឹងនេះ លោកបានគូសបញ្ជាក់ថានៅតំបន់ផ្ទៃរងទឹកភ្លៀងនៃអាងមេគង្គអាចនឹងមានភ្លៀងធ្លាក់ច្រើន ដែលអាចធ្វើឱ្យទឹកទន្លេមេគង្គមានការងើបឡើងវិញ៕