ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.)ប្រកាសឱ្យនាំចូល និងចែកចាយឡើងវិញនូវផលិតផលម្សៅលាបទារក និងកុមារជាង ១០ ប្រភេទដែលត្រូវបានផ្អាកបណ្ដោះអាសន្ន បន្ទាប់ពីទទួលបានលទ្ធផលពីមន្ទីរពិសោធន៍ប្រទេសអូស្ត្រាលីថា ផលិតផលទាំងនោះមិនមានសារធាតុអាសបេស្តូសនោះទេ។
កាលពីថ្ងៃទី ២៣ ខែសីហា អគ្គនាយកដ្ឋាន ក.ប.ប. បានជូនដំណឹង និងដាក់ចេញនូវវិធានការការផ្អាកជាបណ្តោះអាសន្នការនាំចូលនិងចែកចាយផលិតផលម្សៅលាបទារក និងកុមារចំនួន ១២ លេខកូដ ឬ ១២ ប្រភេទនៅក្នុងទីផ្សារ ទូទាំងប្រទេស ក្រោយពីមានការសង្ស័យថា មានវត្តមានសារធាតុអាសបេស្តូស (Asbestos)។
អគ្គនាយកដ្ឋាន ក.ប.ប. បានអះអាងនៅក្នុងសេចក្តីជូនដំណឹងរបស់ខ្លួននៅថ្ងៃទី ៥ កញ្ញាថា បន្ទាប់ពីបានបន្តការពិនិត្យ និងវិភាគយ៉ាងល្អិតល្អន់លើគំរូផលិតផលក្រោមកិច្ចសហការយ៉ាងជិតស្និទជាមួយដៃគូអភិវឌ្ឍន៍នៃប្រទេសអូស្ត្រាលី អគ្គនាយកដ្ឋាន ក.ប.ប. សូមប្រកាសអនុញ្ញាតឱ្យក្រុមហ៊ុនអាចនាំចូលនិងចែកចាយឡើងវិញនូវផលិតផលម្សៅលាបសម្រាប់ទារក និងកុមារទាំង ១២ លេខកូដ ឡើងវិញ។
ពាក់ព័ន្ធនឹងកិច្ចការនេះ អគ្គនាយកដ្ឋាន ក.ប.ប. បញ្ជាក់ថា វិធីសាស្ត្រវិភាគរកសារធាតុអាសបេស្តុស (Asbestos) ដែលមន្ទីរពិសោធន៍អគ្គនាយកដ្ឋាន ក.ប.ប. យកមកអនុវត្ត ត្រូវបានផ្ដល់ និងបណ្ដុះបណ្តាលដោយក្រុមអ្នកជំនាញនៃប្រទេសអូស្ត្រាលី ដោយប្រើប្រាស់ប្រព័ន្ធឧបករណ៍ polarized Light Microscopy (PLM)។
ស្ថាប័នដដែលនេះបានបន្តថា តាមគោលការណ៍នេះ សារធាតុអាសបេស្តុស និងសារធាតុរ៉ែដែលស្រដៀងអាសបេស្តុស (Asbestos look like minerals) ដែលមាននៅក្នុងម្សៅតាល់ស៍ អាចត្រូវបានកំណត់រកឃើញដូចគ្នា ដែលតម្រូវឱ្យមានការវិភាគ ដោយប្រើវិធីសាស្ត្រដែលមានលក្ខណៈទំនើប និងជាក់លាក់ជាងនេះបន្ថែមទៀត។
ដូច្នេះដើម្បីធានាបាននូវលទ្ធផលជាក់លាក់ អគ្គនាយកដ្ឋានក.ប.ប.បានស្វែងរកជំនួយពីស្ថាប័ន OCCSAFE Australia ដើម្បីបញ្ជូនសំណាកគំរូដែលសង្ស័យទាំងនោះ ទៅវិភាគនៅមន្ទីរពិសោធន៍ COHLABS នៃប្រទេសអូស្ត្រាលី ដើម្បីបញ្ជាក់ពីភាពត្រឹមត្រូវ ព្រោះជាមន្ទីរពិសោធន៍ភាគីទី៣ មានការទទួលស្គាល់ជាលក្ខណៈអន្តរជាតិ។
អគ្គនាយក ក.ប.ប. បានសង្កត់ធ្ងន់ថា៖ «មន្ទីរពិសោធន៍ COHLABS បានដំណើរការវិភាគដោយប្រើប្រាស់វិធីសាស្ត្រ Transmission Electron Microscopy (TEM) ដែលជាបច្ចេកទេសទំនើប និងបានបង្ហាញលទ្ធផលថា សំណាកគំរូទាំង ១២ នៃផលិតផលម្សៅលាបទារក និងកុមារ មិនត្រូវបានរកឃើញមានសារធាតុអាសបេស្តុស»។
លោក ផាន អូន ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប. ប្រាប់ ភ្នំពេញ ប៉ុស្តិ៍ នៅថ្ងៃទី ៥ កញ្ញាថា អាណាព្យាបាល និងឪពុកម្តាយ អាចប្រើប្រាស់ផលិតផលទាំង ១២ ប្រភេទនេះបានធម្មតាវិញ ព្រោះផលិតផលទាំងនោះ ត្រូវបានបញ្ជាក់ច្បាស់ហើយថា មិនមានផលប៉ះពាល់នោះទេ។
បន្ថែមពីនេះ លោកបានបញ្ជាក់ថា វិធានការដែលបានអនុវត្តកន្លងមកនេះគឺគ្រាន់តែជាវិធានការបង្ការជាមុន ដោយហេតុថា សារធាតុអាសបេស្ដុសដែលអាចមាននៅក្នុងម្សៅតាល់ស៍ (Talcum Powder) គឺជាសារធាតុគ្រោះថ្នាក់ និងជាការព្រួយបារម្ភសកល ដែលចាំបាច់តម្រូវឱ្យមានភ័ស្តុតាងវិទ្យាសាស្ត្របញ្ជាក់ឱ្យបានត្រឹមត្រូវ និងច្បាស់លាស់។
លោកបានថ្លែងថា៖ «បាទត្រូវហើយ ក្មេងៗ ឬទារក ដែលទម្លាប់ប្រើប្រាស់ផលិតផលទាំងនេះ អាចបន្តប្រើប្រាស់បានជាធម្មតាវិញ ព្រោះព័ត៌មានទាំងអស់ដែលយើងទទួលបានពីមន្ទីរពិសោធន៍របស់ប្រទេសអូស្ត្រាលី គឺល្អទាំងអស់។ យើងឃើញលទ្ធផលល្អពីមន្ទីរពិសោធន៍របស់គេ ព្រោះពួកគេ (TEM) បានប្រើប្រាស់ឧបករណ៍ទំនើបជាងយើង ហើយមន្ទីរពិសោធន៍របស់យើង ពិនិត្យឃើញបែបនេះ ព្រោះតែប្រភេទសារធាតុរ៉ែដែលប្រើប្រាស់ក្នុងម្សៅ មានភាពស្រដៀងនឹងអាសបេស្តុស»។
ជាមួយនឹងការអះអាងនេះ លោក ផាន អូន ក៏បានបញ្ជាក់ដែរថា អគ្គនាយកដ្ឋាន ក.ប.ប. នឹងនៅតែបន្តតាមដាន និងស្រាវជ្រាវករណីនេះដោយសហការជាមួយគ្រប់ភាគីពាក់ព័ន្ធបន្ថែមទៀតដើម្បីធានាថា រាល់ផលិតផលដែលកំពុងចរាចរចែកចាយលើទីផ្សារ មានអនុលោមភាពស្របតាមបទដ្ឋានជាតិ និងអន្តរជាតិ។
លោកអំពាវនាវបន្ថែមថា៖ «សូមសាធារណជន និងធុរកិច្ចទាំងអស់ បន្តទទួលយកផលិតផលទាំងនោះសម្រាប់គោលដៅអាជីវកម្ម និងប្រើប្រាស់ក្នុងគោលបំណងផ្សេងៗតាមតម្រូវការរៀងៗខ្លួន។ យើងអរគុណចំពោះបងប្អូនប្រជាពលរដ្ឋ និងធុរជនពាក់ព័ន្ធ ដែលបានចូលរួមសហការជាមួយ ក.ប.ប. ដើម្បីបង្ការជាមុននូវគ្រោះថ្នាក់ដែលអាចកើតមានជាយថាហេតុដល់សុខុមាលភាពរបស់អ្នកប្រើប្រាស់»។
បើតាមការប្រកាសរបស់អគ្គនាយក ក.ប.ប. បានឱ្យដឹងថា សារធាតុអាសបេស្តុស គឺជាពពួកសារធាតុគីមីគ្រោះថ្នាក់ដល់សុខភាពម្យ៉ាង ដែលមានផ្ទុកនៅក្នុងរបស់របរប្រើប្រាស់ប្រចាំថ្ងៃ ដូចជា ស៊ីម៉ងត៍ ក្បឿង ហ្វ៊ីប្រូស៊ីម៉ងត៍ និងពិតានម្នាងសិលា ជាដើម។ សារធាតុអាសបេស្តុស មិនត្រូវបានអនុញ្ញាតឱ្យមានវត្តមាននៅក្នុងផលិតផល គ្រឿងសម្អាងនោះទេ ខណៈវត្តមាននៃសារធាតុនេះ អាចនឹងបង្កគ្រោះថ្នាក់ខ្លាំងដល់សុខភាពមនុស្ស ជាពិសេសអាចបណ្ដាលឱ្យកើតជំងឺមហារីក។
ប្រភពពីក្រុមហ៊ុន DKSH បានឱ្យដឹងថា យោងទៅតាមលទ្ធផលនៃការវិភាគដែលត្រូវបានធ្វើឡើងដោយ ក.ប.ប. តាមរយៈមន្ទីរពិសោធន៍និងសេចក្តីប្រកាសដោយ ក.ប.ប. នៅថ្ងៃទី ៥ ខែកញ្ញា ដែលបានបង្ហាញយ៉ាងច្បាស់ថា ផលិតផលម្សៅទារកទាំងអស់គ្មានបង្កគ្រោះថ្នាក់ណាមួយនោះ ក្រុមហ៊ុន DKSH ត្រូវបានផ្តល់សិទ្ធិឱ្យនាំចូល និងចែកចាយផលិតផលទាំងនេះឡើងវិញ។
អ្នកស្រី ពុំ ពេញ អាណាព្យាបាលម្នាក់ដែលតែងតែប្រើប្រាស់ម្សៅហុយសម្រាប់កូនៗ បានប្រាប់ ភ្នំពេញ ប៉ុស្តិ៍ នៅថ្ងៃទី ៥ កញ្ញាថា អ្នកស្រីបានផ្អាកប្រើប្រាស់ផលិតផលម្សៅហុយនេះលើកូនអ្នកស្រី បន្ទាប់មានការប្រកាសពីអាជ្ញាធរមានសមត្ថកិច្ច។
អ្នកស្រីបានបន្តថា ការសម្រេចចិត្តផ្អាកនេះ ព្រោះតែពិនិត្យឃើញថា ផលិតផលដែលអ្នកស្រីប្រើសម្រាប់កូន គឺមានក្នុងចំណោមផលិតផលដែលត្រូវបានប្រកាសថា មានការសង្ស័យមានសារធាតុគីមីនេះ។
យ៉ាងណាក្ដី អ្នកស្រីបានអះអាងបន្តថា នៅពេលបានទទួលព័ត៌មានថ្មីពីអគ្គនាយកដ្ឋាន ក.ប.ប. អំពីការអនុញ្ញាតឱ្យប្រើប្រាស់វិញ អ្នកស្រីនឹងបន្តប្រើប្រាស់វិញ ដោយសង្ឃឹមថា ការបន្តប្រើរបស់ខ្លួនគឺពិតជាមិនមានហានិភ័យដូចការប្រកាសរបស់អាជ្ញាធរមានសមត្ថកិច្ចនេះ។
អ្នកស្រី ពុំ ពេញ បានលើកឡើងថា៖«នៅពេលមានការប្រកាសជាថ្មី ខ្ញុំលែងមានការព្រួយបារម្ភវិញ យើងលាបដោយមានទំនុកចិត្ត ព្រោះកន្លងទៅ យើងបារម្ភថា កូនយើងកើតជំងឺនេះ ជំងឺនោះអីអ៊ីចឹងទៅ។ យ៉ាងណាចំពោះការប្រើប្រាស់ម្សៅហុយនេះ ខ្ញុំមិនហ៊ានបញ្ចេញយោបល់ទៅកាន់ម៉ាក់ប៉ាគេផ្សេងថា គួរបន្តប្រើឬមិនប្រើទេ។ ខ្ញុំយល់ថា ការប្រើមិនប្រើ គឺអាស្រ័យលើការមើលឃើញរបស់គាត់ គំនិតរបស់គាត់»។
លោក ហែន ភារៈ វេជ្ជបណ្ឌិតផ្នែកផ្លូវដង្ហើម និងផ្នែកសើស្បែក បាននិយាយថា សម្រាប់លោកជាអ្នកជំនាញ លោកនៅតែជឿទៅលើមន្ទីរពិសោធន៍របស់កម្ពុជាទៅលើការរកឃើញពីសារភាពគីមីនេះនៅក្នុងផលិតផលមួយចំនួន ព្រោះលោកមើលឃើញថា នៅក្នុងទីផ្សារក្នុងប្រទេសកម្ពុជា អាចនឹងមានផលិតផលក្លែងក្លាយ និងការផលិតនៅក្នុងប្រទេសជិតខាង ដែលស្របតាមស្តង់ដារបស់ក្រុមហ៊ុនទាំងនោះ។
ជាមួយនឹងយល់ឃើញដូចនេះ លោកនៅតែទទូចឱ្យអាណាព្យាបាលទាំងអស់ ចូលប្រើប្រាស់ផលិតសម្រាប់ទារក និងកុមារប្រកបដោយការប្រុងប្រយ័ត្នខ្ពស់ ជាពិសេស គឺការប្រើប្រាស់ម្សៅហុយដោយចៀសមិនបាន ខណៈលោក គាំទ្រ ឱ្យមានការចាត់វិធានការក្នុងការចុះស្រាវជ្រាវផលិតផលទាំងនេះលើទីផ្សារបន្តទៀត។
លោកបានបញ្ជាក់ថា៖ «ម្សៅហុយ លោកគ្រូពេទ្យ គាត់មិនចូលចិត្តឱ្យប្រើទេ ប៉ុន្តែដោយសារម្សៅហ្នឹងធ្វើឱ្យស្ងួតចំពោះក្មេងដែលមានស្បែកសើមដែលងាយរលាក និងងាយប្រតិកម្ម។ អ៊ិចឹងយើងអាចប្រើក្រណាត់ដែលស្ងួតជូតជំនួសឱ្យប្រើម្សៅបាន តែបើចៀសប្រើមិនបានយើងប្រើត្រូវប្រយ័ត្នដោយចៀសវាងចូលផ្លូវដង្ហើម ក៏ដូចថ្ពាល់ ថ្ងាស ដោយយើងប្រើលាបតិចៗកន្លែងសើមបាន»៕