.jpg)
ប្រជាពលរដ្ឋមករស់នៅចម្ការលោក ខឹម វាសនា នាពេលកន្លងទៅថ្មីនេះ។ រូបថត TEA Seiha/ទៀ សីហា
សៀមរាបៈ គិតត្រឹមថ្ងៃទី ៥ ខែកញ្ញា សមត្ថកិច្ចខេត្តសៀមរាបបានទទួលពាក្យបណ្តឹងពីប្រជាពលរដ្ឋជាង ១០០ បណ្តឹង ដើម្បីស្នើសុំជួយស្វែងរកសាច់ញាតិដែលរត់ទៅចូលចម្ការរបស់លោក ខឹម វាសនា ខណៈពលរដ្ឋដែលកំពុងបន្តស្នាក់នៅទីនោះនៅមានប្រមាណរយនាក់ប៉ុណ្ណោះ គិតត្រឹមថ្ងៃឱសានវាទថ្ងៃទី ៥ កញ្ញា។ នេះបើតាមលោកអភិបាលខេត្តសៀមរាប។
យោងតាមកិច្ចសន្យារវាងអាជ្ញាធរមានសមត្ថកិច្ច និងគណបក្សសម្ព័ន្ធ ដើម្បីប្រជាធិបតេយ្យបានកំណត់ឱ្យរំសាយការជួបជុំត្រឹមថ្ងៃទី ៥ ខែកញ្ញា ត្រឹមវេលាម៉ោង ១៧ និង ៣០ នាទីជាកំហិត និងបញ្ឈប់ការប្រមូលផ្តុំជាដាច់ខាត។
អភិបាលខេត្តសៀមរាបលោក ទៀ សីហា ថ្លែងប្រាប់ភ្នំពេញប៉ុស្តិ៍ថា គិតត្រឹមថ្ងៃឱសានវាទ ប្រជាពលរដ្ឋជាច្រើនបានវិលត្រឡប់ទៅផ្ទះវិញ រីឯនៅចម្ការនោះក៏ឃើញមានការរុះរើសំណង់ផងដែរ។ ការងារនេះអាជ្ញាធរក៏បានចុះសម្របសម្រួលជាមួយលោក ខឹម វាសនា ហើយឈានដល់ចំណុចឯកភាពគ្នាច្រើន ខណៈសមត្ថកិច្ចបន្តតាមដានឃ្លាំមើលដោយការយកចិត្តទុកដាក់។
លោកបានបញ្ជាក់ថា៖ «យើងអត់ទាន់មានវិធានការអី គ្រាន់តែថា យោងតាមកិច្ចសន្យា ភាគីលោក ខឹម វាសនា បានសហការស្ទើរគ្រប់ចំណុច ឥឡូវនេះមានការឯកភាពគ្នាច្រើនចំណុចហើយ ហើយគាត់ក៏កំពុងរុះរើតាមកិច្ចសន្យាដែរ...បច្ចុប្បន្ននេះ អ្នកបន្តស្នាក់នៅចម្ការនោះ នៅសល់តែប៉ុន្មានរយនាក់ទេ ហើយគាត់ (ខឹម វាសនា) ស្នើឱ្យអ្នកទាំងនោះនៅមើលថែចម្ការ»។
បើតាមលោក ទៀ សីហា ពាក់ព័ន្ធករណីនេះ សមត្ថកិច្ចក៏កំពុងសិក្សាលើពាក្យបណ្តឹង ដើម្បីមានវិធានការតាមផ្លូវច្បាប់។
ស្នងការនគរបាលខេត្តសៀមរាប លោកឧត្តមសេនីយ៍ត្រី តេង ច័ន្ទណាត បានឱ្យដឹងថា គិតត្រឹមថ្ងៃទី ៥ ខែកញ្ញា មានអ្នកមកដាក់ពាក្យបណ្តឹងជាង ១០០ បណ្តឹង។
ក្នុងពាក្យបណ្តឹងនោះពលរដ្ឋស្នើឱ្យសមត្ថកិច្ចជួយរកសាច់ញាតិដែលបានចូលទៅចម្ការរបស់លោក ខឹម វាសនា អស់រយៈពេលជាច្រើនថ្ងៃមកហើយ។
លោកថា៖ «ជាក់ស្តែងពេលគាត់ដាក់ពាក្យបណ្តឹងហើយយើងបានសម្របសម្រួលជាមួយលោក ខឹម វាសនា បានជូនគាត់ទៅដល់កន្លែងទីតាំងចម្ការ ដើម្បីរកសាច់ញាតិត្រឡប់ទៅផ្ទះវិញ ក្នុងនោះមានប្រមាណ ២០ នាក់ បានសម្រេចចិត្តវិលត្រឡប់មកជាមួយគ្រួសារវិញ»។
យ៉ាងណាក្ដី លោកថា ករណីនេះសមត្ថកិច្ចនឹងធ្វើការស្រាវជ្រាវបន្ថែមទៀត ព្រោះមានពលរដ្ឋមួយចំនួនថា គាត់ចង់ចេញក៏ប៉ុន្តែគេមិនឱ្យចេញ។
លោកស្នងការបញ្ជាក់ថា៖ «ករណីខ្លះដែលប្រជាពលរដ្ឋបាត់កូន បាត់អីមែនទែនហ្នឹងគឺពិបាកចេញចូលមែន។ ទាល់តែមានការសម្របសម្រួលពីខាងគាត់ ថ្នាក់ដឹកនាំ មេគាត់ខ្លាំងណាស់ទើបឱ្យចូល។ អ៊ីចឹងក្នុងករណីនេះ ក៏យើងអាចសន្និដ្ឋានបឋមថាក៏អាចជាការបង្ខាំងមួយដែរ»។
ដោយសារតែគេមើលឃើញសកម្មភាពលោក ខឹម វាសនា ហាក់មានភាពខុសពីធម្មតាដែលអាចពាក់ព័ន្ធជំងឺសរសៃប្រសាទនោះ លោក ក្រុស សារ៉ាត់ ប្រធានមន្ទីរសុខាភិបាលប្រាប់ភ្នំពេញប៉ុស្តិ៍នៅថ្ងៃទី ៥ កញ្ញាថា ករណីនេះលោកមិនបានទទួលព័ត៌មានពីលោក ខឹម វាសនា ចូលពិនិត្យនៅមន្ទីរពេទ្យនោះទេ។
ដោយឡែកលោកគ្រូពេទ្យ ១ រូបនៃមណ្ឌលសុខភាពឃុំត្បែងក្នុងស្រុកបន្ទាយស្រីដែលស្នើសុំមិនឱ្យបញ្ចេញឈ្មោះបានប្រាប់ថា ដោយសារដីចម្ការលោក ខឹម វាសនា ស្ថិតក្នុងទឹកដីឃុំត្បែង ហេតុដូច្នេះទើបខាងមន្ទីរសុខាភិបាលខេត្តតម្រូវឱ្យមណ្ឌលសុខភាពត្បែងទៅបោះតង់ និងដាក់គ្រូពេទ្យប្រចាំការនៅក្រៅរបងដីចម្ការនោះ ដើម្បីចាំជួយសង្គ្រោះពលរដ្ឋដែលចូលស្នាក់នៅក្នុងចម្ការនោះ។
លោកថ្លែងថា៖ «ខាងគ្រូពេទ្យខ្ញុំគ្រាន់តែនៅខាងក្រៅរបងទេ ព្រោះខាងក្នុងដីចម្ការគេប្រាប់ថា មានគ្រូពេទ្យហើយ។ ប៉ុន្តែពួកខ្ញុំបោះតង់ប្រចាំការនៅក្រៅរបងដីចម្ការនោះតាំងពីផ្ទុះរឿងនេះមក។ ខាងខ្ញុំមិនដែលទទួលបានពលរដ្ឋណាម្នាក់ចេញមកពិនិត្យជំងឺទេ ប៉ុន្តែខ្ញុំបានជួយសង្គ្រោះបឋមស្ត្រីម្នាក់ដែលគាត់មករកកូនហើយខ្ញុំសន្លប់»។
អភិបាលស្រុកបន្ទាយស្រីលោក ឃឹម ហ្វីណង់ បានថ្លែងថា៖ «កិច្ចការងារនេះយើងបានបញ្ចប់ និងឯកភាពគ្នាអស់ហើយ យើងបានធ្វើកិច្ចសន្យាបញ្ចប់នៅល្ងាចនេះ (ថ្ងៃទី ៥ ខែកញ្ញា) នៅសល់តែកម្លាំង និងលោក ខឹម វាសនា បន្តនៅចម្ការ ប៉ុន្តែយើងបានធ្វើអត្តសញ្ញាណកម្មត្រឹមត្រូវ»៕
វីដេអូ៖
