ភ្នំពេញៈ ក្រសួងសង្គមកិច្ច អតីតយុទ្ធជន និងយុវនីតិសម្បទា ជំរុញឱ្យវិស័យឯកជន និងដៃគូរអភិវឌ្ឍន៍បង្កើតមជ្ឈមណ្ឌលថែទាំមនុស្សចាស់នៅកម្ពុជា ដើម្បីឆ្លើយតបនឹងកំណើនមនុស្សចាស់ដែលអាចនឹងកើនដល់ ២១ ភាគរយនៃប្រជាជនសរុបនៅឆ្នាំ ២០៥០ បន្ទាប់ពីរដ្ឋាភិបាលគ្មានគោលការណ៍ក្នុងការបង្កើតមជ្ឈមណ្ឌលនេះគ្រប់គ្រងដោយរដ្ឋនោះទេ។
ការជំរុញបែបនេះ ត្រូវបានធ្វើឡើងនៅក្នុងសិក្ខាសាលាស្តីពីការមើលថែទាំមនុស្សចាស់ ដែលមានអ្នកចូលរួមពីដៃគូអភិវឌ្ឍន៍ និងវិស័យឯកជន ជាពិសេសយុវជនប្រមាណ ៣០០ នាក់ នៅសណ្ឋាគារភ្នំពេញ ដើម្បីធ្វើការបណ្តុះបណ្តាល និងផ្សព្វផ្សាយអំពីជំនាញថ្មីនេះ។
លោក តូច ចាន់នី អគ្គនាយកនៃអគ្គនាយកដ្ឋានសេវាសង្គមនៃក្រសួងសង្គមកិច្ច អតីតយុទ្ធជន និងយុវនីតិសម្បទា និងអ្នកជានាំពាក្យក្រសួង បានថ្លែងថា ក្រសួងសង្គមកិច្ច បានបង្កើតមជ្ឈមណ្ឌលគាំពារមនុស្សចាស់ ដើម្បីធ្វើការបណ្តុះបណ្តាលធនធានមនុស្សសម្រាប់ថែទាំមនុស្សចាស់។ លោកបន្តថា ការបង្កើតមជ្ឈមណ្ឌលនេះ គឺមិនមែនមានគោលដៅក្នុងការចិញ្ចឹមមនុស្សចាស់នោះទេ។
ដូច្នេះហើយ លោក រំពឹងថា វិស័យឯកជន និងដៃគូអភិវឌ្ឍន៍ អាចនឹងចូលរួមបង្កើតមជ្ឈមណ្ឌលសម្រាប់ថែទាំមនុស្សចាស់នៅកម្ពុជា ដើម្បីបំពេញតម្រូវការក្នុងពេលខាងមុខ ព្រោះរដ្ឋាភិបាលគ្មានគោលការណ៍ក្នុងការបើកមជ្ឈមណ្ឌលនេះគ្រប់គ្រងដោយរដ្ឋនោះទេ ស្របពេលដែលមជ្ឈមណ្ឌលប្រភេទនេះ នៅមិនទាន់មាននៅឡើយនៅកម្ពុជា។
លោកបានបញ្ជាក់ថា៖ «រដ្ឋាភិបាលយើង មិនមានលទ្ធភាពក្នុងការបង្កើតមជ្ឈមណ្ឌលចិញ្ចឹមមនុស្សចាស់នោះទេ ព្រោះកម្ពុជា មានមជ្ឈមណ្ឌលជាច្រើន ហើយនិន្នាការរបស់អង្គការសហប្រជាជាតិ គឺមិនចង់ឱ្យបង្កើតមណ្ឌលនោះទេ។ ប៉ុន្តែក្រសួងសង្គមកិច្ច ក៏ដូចជារដ្ឋាភិបាល ជំរុញឱ្យវិស័យឯកជន ឬក៏ដៃគូរអភិវឌ្ឍន៍ ចូលរួមបង្កើតមជ្ឈមណ្ឌលថែទាំមនុស្សចាស់នេះ។ មនុស្សចាស់ ត្រូវតែទទួលបានការថែទាំ តាមរយៈមណ្ឌលដែលមានវិជ្ជាជីវៈត្រឹមត្រូវ។ អ៊ីចឹង បើអង្គការណា ឬដៃគូណា គាត់ចង់បើកមណ្ឌលចិញ្ចឹមមនុស្សចាស់ គឺយើងលើកទឹកចិត្ត»។
តាមការអះអាងរបស់ក្រសួងសង្គមកិច្ច បានឱ្យដឹងថា នៅឆ្នាំ ២០១៥ ប្រជាជនវ័យចាស់ ក្នុងប្រទេសកម្ពុជាដែលមានអាយុចាប់ពី ៦០ ឆ្នាំឡើង មានចំនួន ១,៣ លាននាក់ ឬស្មើនឹង ៨, ៣ ភាគរយនៃប្រជាជនសរុប ហើយចំនួននេះ នឹងកើនឡើងដល់ ១១,០១ ភាគរយ នៅឆ្នាំ ២០៣០ ព្រមទាំងកើនឡើងដល់ ២១ ភាគរយ នៅឆ្នាំ ២០៥០។
លោក តូច ចាន់នី បានអះអាងថា មូលហេតុដែលធ្វើឱ្យមានការប្រែប្រួលនេះកើនឡើង គឺដោយសារតែអត្រានៃលទ្ធភាពបង្កើតកូនមានការថយចុះ និងភាពប្រសើរឡើងនៃអាយុសង្ឃឹមរស់មានការកើនឡើង។ ក្នុងនោះលោកបានបញ្ជាក់ថា៖«លទ្ធភាពមានកូន សរុបថយចុះពី ៥,៧ ភាគរយនៅឆ្នាំ ១៩៩០ មកនៅត្រឹមតែ ២,៥ ភាគរយ នៅឆ្នាំ ២០១៩។ ចំណែកឯអាយុសង្ឃឹមរស់ បានកើនឡើងពី ៥៤ ឆ្នាំ សម្រាប់បុរស និង ៥៨ ឆ្នាំ សម្រាប់ស្ត្រី នៅឆ្នាំ១៩៩៨ ដល់ ៧៤,៣ ឆ្នាំសម្រាប់បុរស និង ៧៦,៨ ឆ្នាំសម្រាប់ស្ត្រីនៅឆ្នាំ ២០១៩»។
លោក Kondo Yoshio នាយកប្រតិបត្តិក្រុមហ៊ុន ប្រូខេស របស់ជប៉ុន បានមើលឃើញថា វិស័យថែទាំមនុស្សចាស់នៅកម្ពុជា នៅមិនទាន់មានភាពទូលំទូលាយនៅឡើយទេ ខណៈវិស័យនេះ កំពុងមានការកើនឡើងនូវតម្រូវការនៅក្នុងប្រទេសផ្សេងទៀត ទាក់ទងនឹងការថែទាំមនុស្សចាស់។
លោកបន្តថា នៅក្នុងប្រទេសជប៉ុន គឺមានការប្រកួតប្រជែងខ្លាំង ទាក់ទងនឹងវិស័យថែទាំមនុស្សចាស់នេះ ដើម្បីធ្វើការឆ្លើយតប និងទទួលយកធនធានមនុស្សចាស់ដែលមានការកើនឡើង ហើយបច្ចេកទេសនៃការថែទាំមនុស្សចាស់ គឺត្រូវបានចាត់ទុកជាបច្ចេកទេសលំដាប់កំពូលនៅក្នុងពិភពលោក។
លោកបានបញ្ជាក់ថា៖ «ដើម្បីប្រទេសកម្ពុជា កាន់តែមានការអភិវឌ្ឍ សម្រាប់ខ្ញុំ គឺពិតជាចង់ត្រួសត្រាយបើកផ្លូវ ដើម្បីបណ្តុះបណ្តាលធនធានជំនាញថែទាំផ្នែកមនុស្សចាស់នៅក្នុងប្រទេសកម្ពុជាណាស់។ ខ្ញុំសង្ឃឹមថា សិក្ខាសាលាក្នុងថ្ងៃនេះ នឹងជួយអ្នកឱ្យមានការយល់ដឹងអំពីការថែទាំមនុស្ស ហើយអ្នកទាំងអស់គ្នា នឹងចាប់អារម្មណ៍ ព្រមទាំងអាចទទួលបាននូវចំណេះដឹង ជំនាញ និងបទពិសោធខ្លះអំពីការថែទាំមនុស្សចាស់»។
កញ្ញា អុល សុតលី និស្សិតឆ្នាំទី៣ ផ្នែកគិលានុបដ្ឋាយិកានៅសាលាវេជ្ជសាស្ត្រក្នុងរាជធានីភ្នំពេញ ដែលបានចូលរួមក្នុងការបណ្តុះបណ្តាលពីវិធីថែទាំមនុស្សចាស់ បានប្រាប់ ភ្នំពេញ ប៉ុស្តិ៍ថា នៅកម្ពុជា មនុស្សចាស់ជាច្រើនមិនទទួលបានការថែទាំដិតដល់ពីក្រុមគ្រួសារនោះទេ។ កញ្ញាបន្តថា ការដែលកម្ពុជា មានធនធាន និងមជ្ឈមណ្ឌលថែទាំសម្រាប់មនុស្ស នឹងធ្វើឱ្យគ្រួសារមួយចំនួន ដែលមានលទ្ធភាព អាចផ្តល់ជំនឿទុកចិត្តក្នុងការផ្តល់ការថែទាំងទៅដល់ឪពុកម្តាយរបស់ពួកគេបានល្អប្រសើរ។
កញ្ញាបានបញ្ជាក់ថា៖ «បើសិនជាយើងមានសេវា និងមណ្ឌលថែទាំមនុស្សចាស់ គឺកាន់តែល្អ ដើម្បីមនុស្សចាស់ទាំងអស់ គាត់មានការថែទាំបានល្អ ព្រោះនៅពេលគាត់នៅម្នាក់ឯង ហើយអត់មានអ្នកផ្ទះនៅមើលថែទាំអ៊ីចឹង អាចប្រឈមនឹងគ្រោះថ្នាក់។ មនុស្សចាស់ នៅពេលពួកគាត់មានអាយុកាន់តែច្រើន គឺសរីរាង្គរបស់គាត់ មិនអាចធ្វើការងារមួយចំនួន បានខ្លួនឯងទេ»។
បច្ចុប្បន្ន ក្រសួងសង្គមកិច្ច អតីតយុទ្ធជន និងយុវនីតិសម្បទា កំពុងបន្តអនុវត្តគោលនយោបាយជាតិស្ដីពីមនុស្សវ័យចាស់ ឆ្នាំ ២០១៧ ដល់ ២០៣០ ឱ្យមានលក្ខណៈល្អប្រសើរ តាមរយៈការរៀបចំផែនការសកម្មភាពឆ្នាំ ២០២១ ដល់ឆ្នាំ ២០១៥ បន្ទាប់ពីរាជរដ្ឋាភិបាល បានដាក់ចេញនូវគោលនយោបាយ លិខិតបទដ្ឋានគតិយុត្ត និងបានបង្កើតយន្តការជាច្រើន ដើម្បីបង្កើនប្រសិទ្ធភាពនៃការផ្តល់របបគោលនយោបាយ សម្រាប់សេវាសង្គមកិច្ចចំពោះមនុស្សវ័យចាស់។
ជាមួយគ្នានេះដែរ ក្រសួងសង្គមកិច្ច អតីតយុទ្ធជន និងយុវនីតិសម្បទា ក៏បានបង្កើតសមាគមមនុស្សចាស់ឱ្យបានចំនួន ១ ៦៤៦ ឃុំ សង្កាត់ នៅក្នុងរាជធានី ខេត្តទូទាំងប្រទេស សំដៅជួយដោះស្រាយការលំបាករបស់មនុស្សវ័យចាស់ និងជួយគ្នាទៅវិញទៅមក។ នេះបើតាមការអះអាងរបស់លោក តូច ចាន់នី នៅក្នុងសិក្ខាសាលា៕