ភ្នំពេញៈ ក្រសួងធនធានទឹកនិងឧតុនិយម បានព្រមានថា នៅចន្លោះថ្ងៃចុងសប្តាហ៍នេះ ឬ ដើមសប្ដាហ៍ខាងមុខ បណ្ដាខេត្តមួយចំនួន ដែលស្ថិតនៅក្នុងតំបន់ទីទំនាបជាប់ផ្លូវទឹក និងតំបន់ផ្ទៃរងទឹកភ្លៀងនៃជួរភ្នំនិងខ្ពង់រាប អាចនឹងប្រឈមបញ្ហាគ្រោះទឹកជំនន់ទឹកភ្លៀងជាថ្មីម្ដងទៀត។
ការព្រមានរបស់ក្រសួងធនធានទឹកនិងឧតុនិយម បានធ្វើឡើងបន្ទាប់ពីពិនិត្យឃើញប្រព័ន្ធសម្ពាធទាប ដែលអូសកាត់លើភាគខាងជើងប្រទេសថៃ ឡាវ និងវៀតណាម បានរំកិលចុះមកក្រោមហើយបង្កើនឥទ្ធិពលមកគ្របដណ្ដប់លើប្រទេសកម្ពុជា ស្របពេលដែលខ្យល់មូសុងនិរតី កំពុងបង្កើនល្បឿននិងកម្លាំងបក់ក្នុងកម្រិតពីមធ្យមទៅបង្គួរ។
យោងតាមស្ថានភាពនេះ ក្រុមមន្ត្រីជំនាញផ្នែកអាកាសធាតុនៃក្រសួងធនធានទឹកនិងឧតុនិយមបានព្យាករថា ចាប់ពីថ្ងៃទី ៧ ដល់ថ្ងៃទី ១៣ ខែ កញ្ញា ឆ្នាំ ២០២២ បណ្ដាខេត្តដែលស្ថិតនៅក្នុងភូមិសាស្ត្រជាប់តំបន់ភ្នំ និងខ្ពង់រាប ព្រមទាំងទីទំនាបជាប់ផ្លូវទឹក រួមមាន ខេត្តព្រះវិហារ រតនគិរី កំពង់ធំ ឧត្តរមានជ័យ បន្ទាយមានជ័យ បាត់ដំបង សៀមរាប ប៉ៃលិន ពោធិ៍សាត់ និងខេត្តកំពង់ស្ពឺ នឹងមានភ្លៀងធ្លាក់ក្នុងកម្រិតពីមធ្យមទៅបង្គួរ ក្នុងក្របខ័ណ្ឌទូទាំងប្រទេស ខណៈខេត្តនៅជាប់តំបន់មាត់សមុទ្រ រួមមាន ខេត្តកែប កំពត ព្រះសីហនុ និងខេត្តកោះកុង នឹងមានខ្យល់កន្ត្រាក់បក់បោកខ្លាំង និងរលកសមុទ្រធំៗកើតឡើង។
តាមរយៈការព្យាករនោះក្រសួងបានគូសបញ្ជាក់ថា៖ «ចាប់ពីថ្ងៃទី ៦-៩ ខែកញ្ញានេះ ផ្នែកខ្លះនៃបណ្ដាខេត្តមួយចំនួនដែលស្ថិតនៅក្នុងភូមិសាស្ត្រតំបន់ទំនាបជាប់ផ្លូវទឹក តំបន់ជួរភ្នំ និងខ្ពង់រាប អាចនឹងមានភ្លៀងធ្លាក់ខ្លាំងច្រើនថ្ងៃជាប់គ្នា ដែលអាចបង្កឱ្យកើតមានជាជំនន់ទឹកភ្លៀង ខណៈផ្នែកខ្លះនៃខេត្តជាប់តំបន់មាត់សមុទ្រ នឹងកើតមានខ្យល់កន្ត្រាក់បក់បោកខ្លាំងនិងរលកសមុទ្រធំ ចាប់ពីថ្ងៃទី ៧-៩ ខែកញ្ញានេះ ដែលគប្បីត្រូវមានការបង្កើនការប្រុងប្រយ័ត្នខ្ពស់»។
ថ្វីបើមានការព្យាករយ៉ាងដូច្នេះក្ដី ស្ថានភាពទឹកនៅតាមអូរព្រំដែនកម្ពុជា-ថៃ គិតត្រឹមថ្ងៃទី ៦ ខែ កញ្ញា ២០២២ គឺនៅមិនទាន់មានការប្រែប្រួល ជន់ឡើងជាថ្មីទៀតនោះទេ ខណៈអាកាសធាតុ ផ្ទៃមេឃមានពពកក្រាស់ ស្ងប់ខ្យល់ ប៉ុន្តែមិនមានភ្លៀងធ្លាក់នោះទេ។ នេះបើយោងតាមលោក គាត ហ៊ុល អភិបាលក្រុងប៉ោយប៉ែត។
លោក ហ៊ុល បានបញ្ជាក់ថា៖ «ស្ថានភាពទឹកអូរព្រំដែនគឺនៅនឹងធម្មតា ស្ថិតនៅក្រោមមាត់អូរ [កាចអូរ] ហើយផ្ទៃមេឃស្រឡះល្អ មិនមានភ្លៀងធ្លាក់ទេ។ ទោះជាបែបនេះក្ដី អាជ្ញាធរយើងបានត្រៀមបង្ការជាស្រេចនូវកម្លាំងនិងមធ្យោបាយសរុប ដើម្បីឆ្លើយតបជាបន្ទាន់ ក្នុងការជួយសង្គ្រោះប្រជាពលរដ្ឋ ក្នុងករណីមានគ្រោះទឹកជំនន់កើតឡើង»។
ស្រដៀងគ្នានេះ លោក ញើន កួន ប្រធានមន្ទីរធនធានទឹកនិងឧតុនិយម ខេត្តឧត្តរមានជ័យ បានប្រាប់ ភ្នំពេញ ប៉ុស្តិ៍ថា ប៉ុន្មានថ្ងៃនេះផ្ទៃមេឃស្រឡះល្អ គ្មានភ្លៀងធ្លាក់នោះទេ។ លោកបានបន្ថែមថា តំបន់ដែលងាយរងការជន់លិចដោយជំនន់ទឹកភ្លៀងជាងគេនៅក្នុងខេត្តឧត្តរមានជ័យ គឺ សង្កាត់អូរស្មាច់ និង សង្កាត់កូនក្រៀល ដែលស្ថិតនៅភាគពាយព្យនៃក្រុងសំរោង។ លក្ខណៈភូមិសាស្ត្រនៃសង្កាត់ទាំង ២ នេះ មានលក្ខណៈជាបាតឆ្នាំងខ្ទះ ឬជាតំបន់ផ្ទៃរងទឹកភ្លៀង ព្រោះហ៊ុមព័ទ្ធដោយកូនភ្នំ និងខ្ពង់រាប។
លោកថ្លែងថា៖ «ទោះយ៉ាងណាការជន់លិចដោយជំនន់ទឹកភ្លៀង គឺមិនយូរនោះទេ ប៉ុន្តែវាក៏ងាយបង្កឱ្យមានគ្រោះថ្នាក់កើតឡើងជាយថាហេតុផងដែរ ក្នុងករណីមានភ្លៀងធ្លាក់ខ្លាំងច្រើនថ្ងៃជាប់គ្នា»។
ចំណែកលោក ចាប កុយ ប្រធានមន្ទីរធនធានទឹក និងឧតុនិយមខេត្តព្រះវិហារ បានប្រាប់ ភ្នំពេញ ប៉ុស្តិ៍ថា ទឹកស្ទឹងសែន ក្នុងក្រុងព្រះវិហារ មានការជន់ឡើងបន្តិចវិញ ដោយសារមានភ្លៀងធ្លាក់នៅផ្នែកខាងលើនៃតំបន់ផ្ទៃរងទឹកភ្លៀងនៃអាងទន្លេមេគង្គ ប្រទេសឡាវ និងថៃ។ ប៉ុន្តែមិនទាន់បង្កជាទឹកជំនន់ជន់លិចលំនៅឋាននៃគ្រួសារប្រជាពលរដ្ឋណាមួយនៅឡើយទេ។
លោកបានបន្តថា ថ្វីបើយ៉ាងដូច្នេះក្ដី អាជ្ញាធរបានជូនដំណឹងដល់ពលរដ្ឋដែលរស់នៅតាមដងស្ទឹងនិងតំបន់វាលទំនាបជាប់មាត់ទឹកផ្សេងទៀតនៅទូទាំងខេត្ត ឱ្យបង្កើនការប្រុងប្រយ័ត្នហើយ ព្រមទាំងបានត្រៀមកម្លាំងនិងមធ្យោបាយដើម្បីជួយសង្គ្រោះប្រជាពលរដ្ឋពីគ្រោះទឹកជំនន់ ដែលនឹងអាចកើតមាននាពេលខាងមុខនេះរួចជាស្រេចហើយ។
ការហក់ឡើងនៃទឹកស្ទឹងសែនក្នុងខេត្តព្រះវិហារ បានធ្វើឱ្យទឹកស្ទឹងសែនក្នុងខេត្តកំពង់ធំ ដែលនៅខ្សែទឹកខាងក្រោមមានការហក់ឡើងលើសពីកម្រិតកម្ពស់ប្រកាសឱ្យមានការប្រុងប្រយ័ត្នជាថ្មីម្ដងទៀត។ នេះបើតាមលោក ហេ គឿន ប្រធានការិយាល័យនៃមន្ទីរធនធានទឹកនិងឧតុនិយម ខេត្តកំពង់ធំ។
លោក គឿន បាននិយាយថា៖ «នៅរសៀលថ្ងៃនេះ [៦-៩- ២០២២] ទឹកស្ទឹងសែន បានជន់ឡើង ដល់កម្ពស់ ១៣,៨៦ ម៉ែត្រ លើសពីកម្រិតប្រកាសឱ្យប្រុងប្រយ័ត្ន ៣៦ សង់ទីម៉ែត្រ។ មកទល់ពេលនេះ ជំនន់ទឹកស្ទឹងសែន និង ជំនន់ទឹកភ្លៀង បានធ្វើឱ្យខូចខាត ស្រូវប្រជាកសិករនៅទូទាំងខេត្តសរុបជាង ៨ ០០០ ហិកតា»។
ដោយឡែកនៅឯខេត្តកោះកុងវិញ អាជ្ញាធរបាននិយាយថា នៅលម្ហសមុទ្រមានខ្យល់បក់បោកខ្លាំងដោយអន្លើ និងមានរលកសមុទ្រធំៗ ខណៈនៅលើដីគោកមានភ្លៀងធ្លាក់ក្នុងកម្រិតមធ្យម ប៉ុន្តែមិនទាន់មានផលប៉ះពាល់ជន់លិចផ្នែកណាមួយក្នុងខេត្តនេះនៅឡើយទេ។
លោក សុខ សុទ្ធី អភិបាលរងនិងជាអ្នកនាំពាក្យរដ្ឋបាលខេត្តកោះកុង បានប្រាប់ ភ្នំពេញ ប៉ុស្តិ៍ថា ភ្លៀងបានធ្លាក់ ២ ថ្ងៃជាប់គ្នាមកហើយ ប៉ុន្តែមិនទាន់មានការជន់លិចផ្នែកណាមួយក្នុងភូមិសាស្ត្រនៃខេត្តកោះកុងនៅឡើយទេ។
លោកថ្លែងថា៖ «តាមរយៈការជូនដំណឹងរបស់ក្រសួងធនធានទឹក អាជ្ញាធរយើងបានផ្សព្វផ្សាយបន្តដល់ប្រជាពលរដ្ឋនៅតាមមូលដ្ឋានឱ្យមានការប្រុងប្រយ័ត្ន និងបានណែនាំដល់ប្រជានេសាទ បើមិនចាំបាច់ សូមឱ្យផ្អាកសកម្មភាពនេសាទជាបណ្ដោះអាសន្ន ដើម្បីចៀសវាងគ្រោះថ្នាក់កើតឡើងជាយកថាហេតុ ព្រោះនៅក្នុងលម្ហសមុទ្រនាពេលនេះ មានខ្យល់បក់បោកខ្លាំងដោយអន្លើ និងមានរលកសមុទ្រធំៗ»។
យោងតាមទិន្នន័យដែល ភ្នំពេញ ប៉ុស្តិ៍ ទទួលបានពីគណៈកម្មាធិការជាតិគ្រប់គ្រងគ្រោះមហន្តរាយ នៅថ្ងៃទី ៦ ខែ កញ្ញា ឆ្នាំ ២០២២ គ្រោះមហន្តរាយទឹកជំនន់ បានបណ្ដាលឱ្យមនុស្ស ៩ នាក់ស្លាប់ ក្នុងនោះមានកុមារ ៦ នាក់ និងស្ត្រី ៣ នាក់ ព្រមទាំងបង្កការខូចខាតដំណាំស្រូវជាង ១៥ ០០០ ហិកតា ដំណាំរួមផ្សំជាង ១ ០០០ ហិកតា និងលិចផ្ទះជាង៣ពាន់ខ្នងបង្កផលប៉ះពាល់ដល់ជីវភាពរស់នៅរបស់ប្រជាកសិករជិត ២ ម៉ឺនគ្រួសារ លិចសាលារៀន ១៤ កន្លែង វត្តអារាម ៧ កន្លែង ខូចខាតផ្លូវសរុបប្រវែងជាង ៥៥ គីឡូម៉ែត្រ៕