សៀមរាបៈ ការចុះវាស់វែងក្បាលដីក្រោមការគ្រប់គ្រងរបស់អាជ្ញាធរជាតិអប្សរានៅក្នុងក្រុងសៀមរាប សម្រេចបានលទ្ធផល ៩៨ ភាគរយហើយ គិតចាប់ពីថ្ងៃទី ២០ ខែសីហា ដល់ថ្ងៃទី ៥ ខែកញ្ញា។ ក្រុមការងារតម្រង់ទិសកំពុងចុះវាស់វែងក្បាលដីនៅក្រៅក្រុងសៀមរាបបន្តទៀត ចំណែកពលរដ្ឋដែលបានចាប់ឆ្នោតយកដីឡូត៍ហើយមានចំនួនសុរប ១ ១១៧ គ្រួសារ។ នេះបើតាមលោក ហាយ យុង តំណាងក្រុមការងារតម្រង់ទិសដោះស្រាយបញ្ហាសំណង់ខុសច្បាប់នៅតំបន់អង្គរ។
លោក ហាយ យុង ថ្លែងប្រាប់ ភ្នំពេញ ប៉ុស្តិ៍ នៅថ្ងៃទី ៦ ខែកញ្ញាថា៖ «ចំពោះក្រុងសៀមរាប គោលការណ៍ដែលត្រូវវាស់វែងកំណត់អត្តសញ្ញាណក្បាលដីជូនប្រជាពលរដ្ឋនៅក្នុងតំបន់ ១ តំបន់ ២ នៃការគ្រប់គ្រងរបស់អាជ្ញាធរជាតិអប្សរាបានចប់ស្ទើរតែទាំងស្រុងហើយ ប៉ុន្តែនៅសេសសល់បន្តិចបន្តួចដែលម្ចាស់គាត់មិននៅ ហើយក្រុមការងារអត់ទាន់បានវាស់វែង»។
លោកបានឱ្យដឹងទៀតថា ចាប់ពីថ្ងៃទី ២០ ខែសីហា ដល់ថ្ងៃទី ៥ ខែកញ្ញា ពលរដ្ឋដែលយល់ព្រមចាប់ឆ្នោត ដើម្បីបានដីតាំងលំនៅឋាននៅតំបន់រុនតាឯកមានចំនួនសរុប ១ ១១៧ គ្រួសារ ហើយដែលអ្នកទាំងនោះមកពីភូមិត្រពាំងសេះ ភូមិទក្សិណខាងត្បូង និងភូមិវាល សង្កាត់គោកចក និងភូមិស្រះសង់ខាងត្បូង សង្កាត់អង្គរធំ។
លោក ហាយ យុង បានបញ្ជាក់ថា ជាការគិតគូរដល់សុខទុក្ខប្រជាពលរដ្ឋនៅក្នុងរដូវវស្សានេះ ជាគោលការណ៍ថ្នាក់ដឹកនាំឱ្យប្រជាពលរដ្ឋរុះរើតូបទៅជាមុនសិន ចំណែកសំណង់ផ្សេងៗមួយចំនួនដែលមានការពិបាកក្នុងការរុះរើអាចធ្វើនៅពេលក្រោយ ប៉ុន្តែយ៉ាងណាក៏ដោយ លោកថា មានពលរដ្ឋជាច្រើនដែលបានចាប់ឆ្នោតយកទីតាំងហើយនោះ បានរុះរើចេញទៅជាបណ្តើរៗ ជាពិសេសពលរដ្ឋនៅក្បែរប្រាសាទបន្ទាយក្តី ស្រះស្រង់ខាងត្បូង និងនៅខាងត្បូងអង្គរវត្តបាន រុះរើរួចរាល់ទាំងស្រុងហើយ ។ ដោយឡែក ក្រុមការងាររៀបចំដីឡូត៍តំបន់រុនតាឯកបានបោះបង្គោលព្រំដីនិងស្លាកលេខដីឡូត៍បានចំនួនសរុបប្រមាណ ២ ០០០ ក្បាលដីផងដែរ។
ពាក់ព័ន្ធនឹងការរៀបចំលំនៅឋាននៅតំបន់រុនតាឯកនេះដែរ លោក ឡេង ណាវ៉ាត្រា អគ្គនាយកក្រុមហ៊ុនហ្គាឡាក់ស៊ី ណាវ៉ាត្រា និងបុរី ឡេង ណាវ៉ាត្រា បានឱ្យដឹងនៅថ្ងៃទី ៦ ខែកញ្ញា តាមរយៈហ្វេសប៊ុកថា លោកយល់ព្រមចូលរួមផ្តល់ផ្ទះគំរូចំនួន ២០ ខ្នង ជូនរាជរដ្ឋាភិបាល ដើម្បីផ្តល់ជូនពលរដ្ឋ។
ការផ្តល់ជូននេះធ្វើឡើងក្រោយពេលលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ចូល Comment ក្នុងហ្វេសប៊ុកលើផេកអចលនវត្ថុមួយដោយលើកឡើងថា លោកចង់ឱ្យក្រុមហ៊ុនសាងសង់ផ្ទះ ទៅធ្វើការផ្សាយគំរូផ្ទះនៅភូមិរុនតាឯកខេត្តសៀមរាប ដែលទីនោះ មានប្រជាពលរដ្ឋទៅតាំងលំនៅប្រមាណជាង២ ០០០គ្រួសារដែលចាប់ឆ្នោតរួច។
លោក ឡេង ណាវ៉ាត្រា ថ្លែងថា៖ «បុរី ឡេង ណាវ៉ាត្រា មានកិត្តិយសសូមចូលរួមបរិច្ចាគផ្ទះគំរូចំនួន ២០ ខ្នង ជូនរាជរដ្ឋាភិបាលកម្ពុជា ដើម្បីផ្ដល់ជូនប្រជាពលរដ្ឋនៅភូមិធម្មជាតិរុនតាឯក ខេត្តសៀមរាប ក្រោមការដឹកនាំបញ្ជាផ្ទាល់របស់ឯកឧត្តមឧបនាយករដ្ឋមន្ត្រី ជា សុផារ៉ា»។
ភ្លាមៗក្រោយពេលលោក ឡេង ណាវ៉ាត្រា ប្រកាសផ្តល់ផ្ទះគំរូចំនួន ២០ ខ្នង នៅរសៀលថ្ងៃទី ៦ ខែកញ្ញានេះ លោក ជា សុផារ៉ា បានចេញសារថ្លែងអំណរគុណដល់លោក ឡេង ណាវ៉ាត្រា ដែលបានជួយបរិច្ចាគផ្ទះគំរូ ២០ ខ្នងនោះជូនរាជរដ្ឋាភិបាល ដើម្បីផ្ដល់ជូនប្រជាពលរដ្ឋនៅភូមិធម្មជាតិរុនតាឯក ខេត្តសៀមរាប។
សូមរំឭកថា លោក ជាសុផារ៉ា ប្រធានក្រុមការងារតម្រង់ទិស ដើម្បីដោះស្រាយបញ្ហាសំណង់ខុសច្បាប់ និងដីធ្លីតំបន់រមណីយដ្ឋានអង្គរនិងតំបន់ដទៃទៀតដែលស្ថិតក្រោមការគ្រប់គ្រងរបស់អាជ្ញាធរជាតិអប្សរាបានគូសបញ្ជាក់ក្នុងពេលបើកយុទ្ធនាការថា ការដោះស្រាយបញ្ហាសំណង់ខុសច្បាប់នេះមានគោលដៅការពារតំបន់រមណីយដ្ឋានអង្គរដែលបានចុះបញ្ជីក្នុងសម្បត្តិបេតិកភណ្ឌពិភពលោកឆ្នាំ ១៩៩២ មានទំហំ ៤០១ គីឡូម៉ែត្រការ៉េ ជាតំបន់ដែលចាត់ទុកជាសម្បត្តិសាធារណៈរបស់រដ្ឋ ត្រូវរក្សាការពារដាច់ខាត មិនអាចកាត់ឆ្វៀលបានឡើយ៕