ភ្នំពេញៈ អាជ្ញាធរខណ្ឌមានជ័យព្រមានចុះរុះរើ និងដកហូតដោយមិនទទួលខុសត្រូវរាល់ការបាត់បង់ ខូចខាតទ្រព្យសម្បត្តិ និងសម្ភារផ្សេងៗ ដែលពលរដ្ឋដាក់តាំងបំពានលើចំណីផ្លូវសំខាន់ៗ ដែលបង្កឱ្យស្ទះចរាចរណ៍ញឹកញាប់ និងលក់ដូរលើផ្លូវ ឬចិញ្ចើមផ្លូវ ដោយអាជ្ញាធរស្នើឱ្យពលរដ្ឋ ក៏ដូចជាអាជីវករបញ្ឈប់សកម្មភាពបំពានរបស់ខ្លួនជាបន្ទាន់ និងរុះរើចេញឱ្យបានមុនថ្ងៃទី ១១ ខែកញ្ញានេះ។
លិខិតជូនដំណឹងលើកទី២ របស់លោកហែម ដារិទ្ធិ អភិបាលខណ្ឌមានជ័យ ចុះថ្ងៃទី ៥ ខែកញ្ញា បានឱ្យដឹងថា អាជ្ញាធរខណ្ឌមានជ័យទុករយៈពេល៧ថ្ងៃ [គិតចាប់ពីថ្ងៃទី ៥ ខែកញ្ញា ដល់ថ្ងៃទី ១១ ខែកញ្ញា] ឱ្យប្រជាពលរដ្ឋ ក៏ដូចជាអាជីវករ ដែលដាក់តាំងសម្ភារលក់ដូរ ឬសម្ភារផ្សេងៗដែលបំពានលើផ្លូវសាធារណៈត្រូវបញ្ឈប់សកម្មភាពជាបន្ទាន់ និងរុះរើចេញឱ្យអស់។ បើមិនដូច្នោះទេ អាជ្ញាធរនឹងចុះរុះរើចេញ ដោយមិនទទួលខុសត្រូវរាល់ការខាតបង់ ខូចខាតទ្រព្យសម្បត្តិ និងសម្ភារផ្សេងៗ ដែលមាននៅលើទីតាំងនោះឡើយ។
លោក ហែម ដារិទ្ធិ បញ្ជាក់ក្នុងលិខិតថា៖ «បងប្អូនប្រជាពលរដ្ឋ ក៏ដូចជាម្ចាស់អាជីវកម្ម ដែលកំពុងលក់ដូរដាក់តាំងឧបករណ៍ សម្ភារសំណង់ទំនិញផ្សេងៗ ស្លាកយីហោ និងជើងផ្កាជាដើម ដែលកំពុងរំលោភយកផ្លូវ និងចិញ្ចើមផ្លូវសាធារណៈត្រូវបញ្ឈប់ជាបន្ទាន់។ រាល់ការលក់ដូរ ដាក់តាំងសម្ភារសំណង់ ទំនិញផ្សេងៗ ស្លាកយីហោ និងជើងផ្កាទាំងនោះ[ត្រូវរើ]ចេញឱ្យអស់ ពីលើចិញ្ចើមផ្លូវក្នុងរយៈពេលចំនួន ៧ ថ្ងៃ»។
លោកបញ្ជាក់ថា ចំពោះរាល់ការចំណាយក្នុងការអនុវត្តការងាររុះរើ និងដកហូតនេះ ជាបន្ទុករបស់លោក លោកស្រី ដែលជាម្ចាស់ទីតាំងត្រូវទទួលខុសត្រូវទាំងស្រុង។ ករណីមានការរារាំង រឹងរូសមិនស្តាប់តាមការណែនាំ អាជ្ញាធរនឹងកសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធី។
ដោយឡែក លោក ផេង សិទ្ធី អភិបាលក្រុងបាត់ដំបង ថ្លែងនៅថ្ងៃទី ៦ សីហាថា ការរៀបចំសណ្តាប់ធ្នាប់សាធារណៈ មិនអាចកំណត់ពេលវេលាចប់ជាស្ថាពរនៅថ្ងៃណាមួយបានទេ គឺនៅតែត្រូវបន្តរៀបចំជាបន្តបន្ទាប់ទៀត ជាពិសេសការអប់រំផ្សព្វផ្សាយផង និងការអនុវត្តវិធានការខ្លះៗផង ធ្វើយ៉ាងណាឱ្យប្រជាពលរដ្ឋកាន់តែយល់ដឹង និងចូលរួមទាំងអស់គ្នា។
លោកប្រាប់ថា ជាការកត់សម្គាល់ក្នុងពេលបច្ចុប្បន្ន ប្រជាពលរដ្ឋមានការចូលរួមសកម្មភាពច្រើន ដែលមិននឹកស្មានដល់ ប៉ុន្តែការចូលរួមនេះ ក៏ទាមទារឱ្យអាជ្ញាធរមានការចង្អុលបង្ហាញ ណែនាំតម្រង់ជារៀងរាល់ថ្ងៃផងដែរ។
លោកថ្លែងថា៖ «ឧទាហរណ៍ថា ការចតរថយន្ត ការដាក់តាំងលក់ ពេលខ្លះគាត់ថា សុំតែមួយភ្លែតអ៊ីចឹងទៅ អាហ្នឹងយើងអាចថាល្អ ប៉ុន្តែពេលខ្លះគាត់ដាក់មួយភ្លែតប្រហែល ១០ នាទីអី។ អ៊ីចឹងទៅយើងសង្កេតឃើញថា មានតែអាហ្នឹងក៏យើងមិនទាន់ទទួលយកបានថា វាឥតខ្ចោះទេ។ វាទាល់តែថា ១ ព្រឹកហ្នឹង បើកន្លែងហ្នឹងវាអត់មានចត អត់មានដាក់ អាហ្នឹងបានយើងទទួលស្គាល់»។
លោក ផេង សិទ្ធី ឱ្យដឹងទៀតថា ទោះយ៉ាងណា អាជ្ញាធរក្រុងនៅបន្តធ្វើកិច្ចការងារទាំងអស់នេះបន្តទៀត តាមរយៈការណែនាំ ឱ្យបានគ្រប់ជ្រុងជ្រោយ។ កន្លងមកពលរដ្ឋណា មានការបំពានសណ្តាប់ធ្នាប់សាធារណៈ រឹងទទឹងមិនស្តាប់ការណែនាំច្រើនលើក ពេលខ្លះអាជ្ញាធរបានលើកយកសម្ភាររបស់ពួកគាត់មករក្សាទុកដើម្បីឱ្យម្ចាស់ចូលធ្វើកិច្ចសន្យាឈប់ឱ្យមានសកម្មភាពបែបនោះទៀត ទើបប្រគល់សម្ភារជូនពួកគាត់វិញ។
លោក លឹម ភត្រី មន្ដ្រីរដ្ឋបាលក្រុងព្រះសីហនុ ទទួលបន្ទុករដ្ឋបាលសាធារណៈ ថ្លែងនៅថ្ងៃទី ៦ កញ្ញា ថា លោកសរ កក្កដា អភិបាលក្រុងព្រះសីហនុ បានចាត់លោក គង់ សុផាន់ណ្ណៈ នាយករងរដ្ឋបាល ដឹកនាំគណៈបញ្ជាការឯកភាពក្រុង ចុះរៀបចំសណ្តាប់ធ្នាប់នៅមុខ និងជុំវិញផ្សារលើ ស្ថិតនៅព្រំប្រទល់សង្កាត់ ២ និង ៤ ក្រោយពីបានអប់រំណែនាំច្រើនលើកហើយ ពលរដ្ឋមិនអនុវត្តតាម។
លោកបញ្ជាក់ថា៖ «រដ្ឋបាលក្រុងបានអនុវត្តវិធានការរដ្ឋបាល គឺចាប់ដកហូតសម្ភារយកទៅរក្សាទុកនៅសាលាក្រុង។ សូមមេត្តាចូលរួមទាំងអស់គ្នា ដើម្បីបរិស្ថាន និងរបៀបរៀបរយ សណ្តាប់ធ្នាប់សាធារណៈ មិនកកស្ទះចរាចរណ៍»។
រដ្ឋបាលក្រុងព្រះសីហនុ ឱ្យដឹងតាមរយៈហ្វេសប៊ុកថា នៅថ្ងៃទី ២ ដល់ថ្ងៃទី ៥ ខែកញ្ញា កម្លាំងក្រុមការងារអាជ្ញាធរក្រុងបានចុះរៀបចំសណ្តាប់ធ្នាប់នៅតាមបណ្តោយផ្លូវមិត្តភាព (លេខ ៨០០) ផ្លូវលេខ ៨១០ និងផ្លូវលេខ ៨០៦(ផ្លូវបំបែកពីផ្លូវអូរ ១ -ផ្ទះតាឆេ ទៅដល់ផ្លូវឯករាជ្យ) ក្នុងភូមិសាស្ត្រសង្កាត់លេខ ៤ និងចុះរុះរើសំយាបគ្រោងដែកសង់លើចិញ្ចើមផ្លូវសាធារណៈផងដែរ។
រដ្ឋបាលក្រុងព្រះសីហនុបញ្ជាក់ថា៖ «ការរុះរើនេះ ដើម្បីពង្រឹងការរៀបចំសណ្តាប់ធ្នាប់ អនាម័យ-បរិស្ថាន និងសោភណភាព តាមដងផ្លូវសាធារណៈក្នុងភូមិសាស្ត្រក្រុងព្រះសីហនុ។ រដ្ឋបាលក្រុងសូមអំពាវនាវដល់ប្រជាពលរដ្ឋទាំងអស់ សូមចូលរួមថែរក្សាសណ្តាប់ធ្នាប់សាធារណៈ អនាម័យ-បរិស្ថានទាំងអស់គ្នា និងសូមចូលរួមអនុវត្តតាមការណែនាំរបស់ក្រុមការងារ ដើម្បីឱ្យទីក្រុងមានរបៀបរៀបរយ និងមានសោភណភាពស្អាត»។
រដ្ឋបាលក្រុងព្រះសីហនុឱ្យដឹងទៀតថា បន្ថែមលើនេះ អាជ្ញាធរក្រុងព្រះសីហនុ ក៏បានចុះរុះរើសំយាបគ្រោងដែកសង់លើចិញ្ចើមផ្លូវសាធារណៈ នៅផ្លូវ ៨១៤ (ផ្លូវទៅសាលាអូរ ២) ក្នុងភូមិ ៥ សង្កាត់លេខ ៤ ក្រុងព្រះសីហនុ និងចុះទៅរុះរើគោលដៅទីតាំងលក់ផ្លែឈើ ១ កន្លែង នៅម្តុំមុខផ្សារលើក្រុងព្រះសីហនុផងដែរ៕
វីដេអូ៖