.jpg)
ពលរដ្ឋតវ៉ាករណីដីធ្លីក្នុងតំបន់ព្រលានយន្តហោះថ្មី នៅក្នុងខេត្តកណ្ដាលនាពេលកន្លងមក។ រូបថត FB
កណ្ដាលៈ លោក នូវប៉ែង ច័ន្ទតារា អភិបាលរងខេត្តកណ្ដាលបានឱ្យដឹងថា ទំហំដីធ្លីសម្រាប់គម្រោងព្រលានយន្តហោះភ្នំពេញថ្មី នៅមានបញ្ហាប្រមាណ ១៤ ភាគរយ ដែលមិនទាន់អាចរកដំណោះស្រាយបានរហូតមកដល់ពេលនេះ ពីព្រោះតែការខ្វែងគំនិតគ្នាលើតម្លៃដីដែលត្រូវបានកំណត់ទិញពីប្រជាពលរដ្ឋ ដែលនឹងត្រូវបន្តដោះស្រាយ។
លោក ច័ន្ទតារា បានអះអាងថា កន្លងមកយន្តការដោះស្រាយរបស់រដ្ឋបាលខេត្តគឺសមស្របទៅហើយ ដោយសារតែសំណង ៨ ដុល្លារ ក្នុង ១ ម៉ែត្រការ៉េ គឺជាតម្លៃដែលមានការសិក្សាត្រឹមត្រូវតាមទីផ្សារអចលនទ្រព្យ។
លោក ច័ន្ទតារា ថ្លែងថា៖ «ជាទូទៅអ្នកលក់ គាត់ចង់បានថ្លៃហើយ តែគាត់មិនមានអ្វីមកយោងទេ។ អ្វីដែលគាត់ទាមទារគឺជាសិទ្ធិរបស់គាត់ តែអ្វីដែលរដ្ឋាភិបាលបានដោះស្រាយហ្នឹង គឺតាមរយៈការសម្រេច ការវិនិច្ឆ័យពីក្រុមហ៊ុនអចលនទ្រព្យ»។
គួរកត់សម្គាល់ថា គិតមកដល់ពេលនេះ បញ្ហារកដំណោះស្រាយដីធ្លីរវាងក្រុមហ៊ុន OCIC របស់ឧកញ៉ា ពុង ឃាវសែ ដែលទទួលគម្រោងព្រលានយន្តភ្នំពេញថ្មី ជាមួយ នឹងប្រជាពលរដ្ឋខេត្តកណ្ដាល បានអូសបន្លាយអស់រយៈពេល ៣ ឆ្នាំមកហើយ ដោយពលរដ្ឋខ្លះនៅមិនព្រមទទួលយកសំណងដែលអាជ្ញាធរដែនដីផ្ដល់ឲ្យ ក្នុងតម្លៃចន្លោះពី ៣ ដុល្លារ ទៅ ៨ ដុល្លារ ក្នុងដី ១ ម៉ែត្រការ៉េនោះ។
ទោះជាយ៉ាងណាក៏ដោយ លោក វណ្ណ សុផាត អ្នកសម្របសម្រួលគម្រោងធុរកិច្ច និងសិទ្ធិមនុស្ស នៃមជ្ឈមណ្ឌលសិទ្ធិកម្ពុជាបានឲ្យដឹងថា មកដល់ពេលនេះករណីដីធ្លីរវាងពលរដ្ឋមួយចំនួនដែលរងផលប៉ះពាល់ពីគម្រោងព្រលានយន្តហោះថ្មីរបស់ក្រុមហ៊ុន OCIC នៅមិនទាន់បានទទួលដំណោះស្រាយសមស្របនៅឡើយទេ ថែមទាំងពលរដ្ឋខ្លះកំពុងប្រឈមវិបត្តិយ៉ាងធ្ងន់ធ្ងរពីការគាបសង្កត់តាមរយៈប្រព័ន្ធតុលាការផង។
លោក វណ្ណ សុផាត ថ្លែងថា៖ «មកដល់បច្ចុប្បន្នមិនទាន់មានដំណោះស្រាយជូនពួកគាត់ទេ តែបែរជាឲ្យតម្លៃដីពួកគាត់ក្នុងតម្លៃទីផ្សារមួយទាបបំផុត គំរាមកំហែងពួកគាត់ ថែមទាំងបង្ខំពួកគាត់ចេញពីដីធ្លី ដើម្បីយកដីទៅធ្វើព្រលានយន្តហោះ ហើយដាក់បន្ទុកពួកគាត់តាមប្រព័ន្ធតុលាការទៀត។ សព្វថ្ងៃមានពលរដ្ឋប្រមាណ ៩ នាក់ កំពុងស្ថិតក្រោមការត្រួតពិនិត្យរបស់តុលាការ ដែលគេបញ្ជូនសំណុំរឿងពួកគាត់ហ្នឹងទៅសាលាដំបូងខេត្តកណ្តាល ដែលកាត់ទោសពេលណា យើងមិនទាន់ដឹងច្បាស់ទេ»។
លោក សុផាត ថ្លែងថា កន្លងមកមានការបង្ខិតបង្ខំឲ្យពលរដ្ឋទទួលយកសំណងត្រឹម ៨ ដុល្លារ ក្នុង ១ ម៉ែត្រការ៉េ ដែលថោកជាងតម្លៃទីផ្សារ ហើយខាងភាគីអាជ្ញាធរមូលដ្ឋានមិនជួយសម្របសម្រួលនោះទេ បែរជាបំភិតបំភ័យ គំរាមកំហែងដល់ពលរដ្ឋដែលចង់រកកិច្ចអន្តរាគមន៍ពីថ្នាក់ជាតិទៅវិញ។
លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក (Adhoc) អះអាងថា ខាងអាដហុកទទួលបានបណ្តឹងកន្លងមក មានករណីដីធ្លីនៅព្រលានយន្តហោះថ្មីមួយចំនួន ដែលមានបណ្ណកម្មសិទ្ធិហើយនោះ គឺមានភាពមិនប្រក្រតីដូចជា ការកម្រិតតម្លៃ និងដាក់គោលនយោបាយ ដែលផ្ទុយនឹងតម្លៃទីផ្សារជាដើម ដែលជាបញ្ហាត្រូវពិនិត្យមើលសំណូមពររបស់ពលរដ្ឋចង់បាន និងជាពិសេសពន្លឿនការដោះស្រាយករណីដីធ្លីនេះឲ្យបានឆាប់រហ័សនិងត្រឹមត្រូវ៕
