.jpg)
សត្វដង្កូវលើដំណាំល្ង។ រូបថត សហការី
ស្ទឹងត្រែងៈ ប្រជាកសិករនៅស្រុកបុរីអូរស្វាយសែនជ័យ បានអំពាវនាវដល់មន្ទីរកសិកម្មរុក្ខាប្រមាញ់និងនេសាទ ខេត្តស្ទឹងត្រែង ជួយអន្តរាគមន៍បញ្ជូនមន្ត្រីជំនាញចុះមកពិនិត្យ និងជួយសង្គ្រោះដំណាំល្ង របស់ពួកគាត់ ដែលកំពុងរងការបំផ្លិចបំផ្លាញយ៉ាងធ្ងន់ធ្ងរពីពពួកសត្វដង្កូវពណ៌បៃតង។
អ្នកស្រី ប៉ាន់ សារុំ អាយុ ៣៥ ឆ្នាំ ជាប្រជាកសិករនៅភូមិឫទ្ធិសែនជ័យ ២ ឃុំអូរស្វាយ ស្រុកបុរីអូរស្វាយសែនជ័យ បានប្រាប់ ភ្នំពេញ ប៉ុស្តិ៍ថា នៅពេលនេះដំណាំល្ងរបស់គាត់និងអ្នកភូមិមួយចំនួនទៀត កំពុងរងការបំផ្លិចបំផ្លាញដោយពពួកសត្វដង្កូវម្យ៉ាងដែលមានមាឌធំ ប៉ុនៗម្រាមដៃ និងមានពណ៌បៃតងដូចជាស្លឹកល្ង។
អ្នកស្រីបាននិយាយថា៖ «ដំណាំល្ងខ្មៅរបស់ខ្ញុំជិត ២ ហិកតា ត្រូវហ្វូងសត្វដង្កូវទាំងនេះបំផ្លិចបំផ្លាញស្ទើរគ្មានសល់ បើទោះជាខ្ញុំបានព្យាយាមបាញ់ថ្នាំពុលកសិកម្ម សម្លាប់ពួកវាយ៉ាងណាក៏ដោយ»។
បើតាមអ្នកស្រី សារុំ ហ្វូងសត្វដង្កូវទាំងនេះ បានកើតមានជារៀងរាល់ឆ្នាំ ប៉ុន្តែនៅឆ្នាំនេះ ពួកវាបានកើតមានច្រើនជាងឆ្នាំមុនៗ និងមានភាពស៊ាំទៅនឹងថ្នាំពុលកសិកម្មដែលពួកគាត់ធ្លាប់បានប្រើប្រាស់បាញ់ទៅលើពួកវា នាពេលកន្លងមក។
អ្នកស្រីបានបញ្ជាក់ថា៖ «កាលពីឆ្នាំមុន ខ្ញុំបាញ់ថ្នាំសម្លាប់ពួកវាតែម្ដងឬ២ដងប៉ុណ្ណោះ ពួកវាងាប់ពាយអស់ហើយ ប៉ុន្តែឆ្នាំនេះ ពួកវាហាក់ដូចជាមិនថមថយសោះ ព្រោះក្រោយពីខ្ញុំបាញ់បាន ៣-៤ ថ្ងៃ ក៏ស្រាប់តែឃើញពួកវាកើតមានច្រើនឡើងវិញដដែល»។
ចំណែកលោក ម៉ែន សារឿន មេភូមិឫទ្ធិសែនជ័យ ២ បាននិយាយថា ក្រៅរងការយាយីពីសត្វដង្កូវ ដំណាំល្ងរបស់ប្រជាកសិករនៅក្នុងឆ្នាំនេះ ក៏មានជំងឺរួញខ្មូរសន្លឹកនិងស្វិតត្រួយគួរឱ្យកត់សម្គាល់ផងដែរ។
លោកថ្លែងថា៖ «ដំណាំល្ងរបស់ប្រជាកសិករយើងខ្ញុំនៅក្នុងឆ្នាំនេះ ទំនងជាមិនទទួលបានផលជាដុំកំភួននោះទេ ព្រោះរងការបំផ្លិចបំផ្លាញដោយសត្វដង្កូវ និងជំងឺរួញខ្មូរស្លឹកនិងស្វិតត្រួយខូចអស់ច្រើនពេក»។
ស្រដៀងគ្នានេះ ប្រជាកសិករនៅភូមិអូរស្វាយ ឃុំព្រះរំកិល ស្រុកបុរីអូរស្វាយសែនជ័យ លោក សន ប៉ាន់ បានប្រាប់ ភ្នំពេញ ប៉ុស្តិ៍ថា កាលពី៣សប្ដាហ៍មុន គាត់បានខូចបង់ដំណាំល្ងអស់ជាង ១ ហិកតា ដោយសារហ្វូងសត្វដង្កូវចង្រៃនោះ។ ប៉ុន្តែនៅពេលនេះ គាត់បានចាប់ផ្ដើមភ្ជួរពង្រាបដីចម្ការរបស់គាត់ដើម្បីដាំដំណាំល្ងសាជាថ្មីឡើងវិញ។
លោកថ្លែងថា៖ «បើយើងអាចកម្ចាត់សត្វដង្កូវបានពីដើមដៃនោះ ដំណាំល្ងមានទីផ្សារល្អ ងាយស្រួលលក់ និងមានតម្លៃចន្លោះពី ៥ ០០០ រៀល ទៅ ៨ ០០០ រៀល ក្នុង ១ គីឡូក្រាម»។
បើតាមលោក ប៉ាន់ ក្នុងផ្ទៃដី ១ ហិកតា ដំណាំល្ងអាចផ្ដល់ផលចន្លោះពី ៨៥០ គីឡូក្រាមទៅ ១ ២០០ គីឡូក្រាម ប្រសិនបើគ្មានការយាយីពីសត្វល្អិតចង្រៃទេនោះ។ ជាមួយគ្នានេះ លោកបានអំពាវនាវសុំឱ្យមន្ត្រីជំនាញកសិកម្មជួយផ្ដល់បច្ចេកទេស និងវិធីសាស្ត្រក្នុងការកំចាត់សត្វដង្កូវចង្រៃនោះដល់ពួកគាត់ ដើម្បីឱ្យដំណាំល្ងរបស់ពួកគាត់អាចទទួលបានទិន្នផលខ្ពស់។
ជុំវិញករណីនេះ លោក ឆិល វិបុល អនុប្រធានការិយាល័យបច្ចេកទេស និងផ្សព្វផ្សាយកម្មវិធីអភិវឌ្ឍន៍ដំណាំកសិកម្មនៃមន្ទីរកសិកម្ម រុក្ខាប្រមាញ់និងនេសាទខេត្តស្ទឹងត្រែងបានប្រាប់ ភ្នំពេញ ប៉ុស្តិ៍ថា ក្រោយពីទទួលបានសេចក្ដីរាយការណ៍ពីប្រជាកសិករក្នុងមូលដ្ឋាន លោកបានផ្ដល់ការណែនាំឱ្យប្រជាកសិករអនុវត្តវិធីសាស្ត្រមេកានិច្ច ដោយប្រើប្រាស់ថ្នាំពុលកសិកម្មប្រភេទ Abamectin និង Emamectin Benzoate ដើម្បីសម្លាប់ប្រភេទសត្វដង្កូវទាំងនោះជាបន្ទាន់។
លោកថ្លែងថា៖ «អ្វីដែលយើងទទួលបានព័ត៌មានពីប្រជាកសិករនាពេលនេះ គឺវាសឹងតែហួសពេលទៅហើយ ព្រោះពពួកសត្វដង្កូវនោះវាបានផ្ទុះឡើងពេញក្នុងចម្ការរបស់ពួកគាត់អស់ទៅហើយ។ អ៊ីចឹងទេយើងសាកល្បងឱ្យពួកគាត់ប្រើថ្នាំ២ប្រភេទខាងលើនេះ ដើម្បីកម្ចាត់ពួកវា ព្រោះថ្នាំដែលគាត់បានប្រើកាលពីមុនៗនោះ វាឥតមានប្រសិទ្ធភាពលើពពួកសត្វដង្កូវទាំងនេះទេ»។
ទន្ទឹមនឹងនេះ លោកបានណែនាំឱ្យកសិករទាំងអស់ មុននឹងដាំដុះដំណាំត្រូវភ្ជួររាស់ពង្រាបដីស្រែចម្ការ និង ហាលដីឱ្យស្ងួតល្អ។ នៅពេលចាប់ផ្ដើមសាបព្រោះគ្រាប់ពូជ ត្រូវធ្វើការថែទាំ បោចសម្អាតស្មៅឱ្យស្អាត ព្រមទាំងធ្វើការស្រោចទឹកដាក់ជី និងបាញ់ថ្នាំបំប៉ននិងថ្នាំបង្ការជំងឺ និងសត្វល្អិតចង្រៃ នៅពេលដំណាំដុះលូតលាស់បានក្នុងចន្លោះ ១០ ទៅ ១៥ ថ្ងៃម្ដង។ ធ្វើយ៉ាងនេះគ្រប់ដំណាំទាំងអស់នឹងផ្ដល់ទិន្នផលល្អ ឆ្លើយតបតាមតម្រូវការ៕
