.jpg)
ជំនួបពិភាក្សាការងា រវាងគណៈអភិបាលខេត្តកណ្តាលជាមួយ ប្រតិភូគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា-ព្រឹទ្ធសភា កាលពីថ្ងៃទី ៥ កញ្ញា។ រូបថត រដ្ឋបាលខេត្តកណ្តាល
កណ្តាលៈ រដ្ឋបាលខេត្តកណ្តាលបានជម្រាបគណៈប្រតិភូនៃរដ្ឋសភាថា រដ្ឋបាលខេត្តបានដោះស្រាយករណីវិវាទដីធ្លីបញ្ចប់ចំនួន ១៤១ ករណី ក្នុងចំណោមវិវាទដីធ្លីសរុប ៤៦២ ករណី ដែល ៣២១ ករណីទៀតកំពុងដំណើរការយន្តការដោះស្រាយ គិតត្រឹមខែសីហា ឆ្នាំ ២០២២។
នេះបើតាមលទ្ធផលនៃជំនួបពិភាក្សាការងា នៅថ្ងៃទី ៥ ខែ កញ្ញា ឆ្នាំ ២០២២ រវាងគណៈអភិបាលខេត្តកណ្តាលជាមួយ ប្រតិភូគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា-ព្រឹទ្ធសភា នៃរដ្ឋសភា ដែលដឹកនាំដោយលោកសរ ចំរុង ដើម្បីស្វែងយល់អំពីវឌ្ឍនភាព និងយន្តការដោះស្រាយករណីទំនាស់ដីធ្លី។
ក្នុងជំនួបពិភាក្សានោះ លោក គង់ សោភ័ណ្ឌ អភិបាលខេត្តកណ្តាល បានជម្រាបជូនប្រតិភូគណៈកម្មការសិទ្ធិមនុស្ស ទទួលពាក្យបណ្ដឹង អង្កេត និងទំនាក់ទំនងរដ្ឋសភា-ព្រឹទ្ធសភា នៃរដ្ឋសភាថា គិតមកដល់ខែ សីហា ឆ្នាំ ២០២២ នេះ ករណីវិវាទដីធ្លីក្នុងទូទាំងខេត្ត មានសរុបចំនួន ៤៦២ ករណី ដោយដោះស្រាយបញ្ចប់បានចំនួន ១៤១ ករណី និងកំពុងដំណើរការដោះស្រាយចំនួន ៣២១ ករណីទៀត។
ក្រៅពីនោះ សម្រាប់ការចុះបញ្ជីដីរដ្ឋក្នុងខេត្តកណ្តាលវិញ លោកអភិបាលខេត្តបានជម្រាបថា ខាងរដ្ឋបាលខេត្តបានធ្វើការចុះបញ្ជីដីរដ្ឋក្នុងខេត្ត បានសរុបចំនួន ១២,២៧៤ ហិកតា ក្នុងនោះ រដ្ឋាភិបាលបានសម្រេចជាគោលការណ៍ប្រគល់សិទ្ធិជូនក្រុមហ៊ុនធ្វើការជួល និងដោះដូរដើម្បីវិនិយោគ បានចំនួន ១៦ កន្លែង ស្មើនឹង ៥,៧៩៥ ហិកតា ដើម្បីលើកកម្ពស់សេដ្ឋកិច្ច និងការអភិវឌ្ឍនៅមូលដ្ឋាន។
លោក គង់ សោភ័ណ្ឌ បានបន្ថែមថា ការចុះបញ្ជីដីធ្លីមានលក្ខណៈជាប្រព័ន្ធ សរុបតាំងពីចាប់ផ្តើមអនុវត្តសម្រេចបានចំនួន ៥៦៩ ភូមិ លើ ១ ០១០ ភូមិ ស្មើ ៥៧% និងនៅសល់ចំនួន ៤៤១ ភូមិ ស្មើនឹង ៤៣% ដែលគ្រោងបញ្ចប់ នៅឆ្នាំ ២០២៩។
បច្ចុប្បន្ននេះ ក្រុមការងារមន្ទីរចំនួន ១០ ក្រុម កំពុងដំណើរការអនុវត្ត នៅតាមភូមិចំនួន ៦៩ លើភូមិចំនួន ៤៤១ ដែលនៅសល់។ ការចុះបញ្ជីដីធ្លីនៅស្រុកកណ្ដាលស្ទឹង បានបញ្ចប់ការចុះបញ្ជីជាប្រព័ន្ធជាស្ថាពរ ចំណែកក្រុងតាខ្មៅវិញ កំពុងសម្អាតទិន្នន័យ។
ជុំវិញបញ្ហានេះដែរ លោក ស៊ឹង សែនករុណា អ្នកនាំពាក្យសមាគមការពារសិទ្ធិមនុស្សអាដហុក (Adhoc) បានសម្ដែងការសាទរចំពោះការដោះស្រាយវិវាទដីធ្លីចំនួន ១៤១ ករណី នេះប៉ុន្តែលោកក៏សង្ឃឹមដែរថា ការបញ្ចប់វិវាទដីធ្លីទាំងនេះគឺប្រព្រឹត្តទៅដោយប្រក្រតីភាពក្នុងផ្លូវច្បាប់ ពោលគឺជម្លោះនីមួយៗអាចទទួលយកបាន ចៀសវាងការរំលោភបំពានក្នុងយន្តការដោះស្រាយ។
លោក ស៊ឹង សែនករុណា ថា៖ «យើងនិយាយពីមុំដែលខាងអាដហុកទទួលបានបណ្តឹងកន្លងមកនោះ មានករណីជម្លោះដីធ្លីនៅព្រលានយន្តថ្មីនិងករណីមួយចំនួន គឺមានភាពមិនប្រក្រតីដូចជា ការកម្រិតតម្លៃ និងដាក់គោលនយោបាយដល់ពលរដ្ឋ ដែលផ្ទុយនឹងតម្លៃទីផ្សារជាដើមហ្នឹង ខណៈពួកគាត់មានបណ្ណកម្មសិទ្ធិហើយនោះ»។
អ្នកនាំពាក្យសមាគមការពារសិទ្ធិមនុស្សអាដហុក (Adhoc) រូបនេះ បានអំពាវនាវដល់រដ្ឋបាលខេត្តកណ្តាល និងស្ថាប័នពាក់ព័ន្ធ ឱ្យបំពេញតួនាទីអភិបាលកិច្ចដោយទទួលយកបណ្តឹងរបស់ពលរដ្ឋជុំវិញបញ្ហាទំនាស់ដីធ្លី ព្រមទាំងពិនិត្យមើលសំណូមពររបស់ពលរដ្ឋដែលជាប់មានវិវាទដីធ្លី និងជាពិសេសពន្លឿនការដោះស្រាយទំនាស់ដីធ្លីឱ្យបានឆាប់រហ័ស និងត្រឹមត្រូវ ដើម្បីជាប្រយោជន៍ដល់ពលរដ្ឋដែលអាស្រ័យផលលើដីធ្លីទាំងឡាយ ធ្វើយ៉ាងណាឱ្យពួកគាត់បានបង្កបង្កើនផលវិញដើម្បីជីវភាពរស់នៅរបស់ពួកគាត់ផង និងជាសុខដុមរមនារបស់សង្គមជាតិទាំងមូលផង៕
