សៀមរាបៈ បន្ទាប់ពីរដ្ឋាភិបាលសម្រេចធ្វើចំណាត់ការលើករណីសំណង់ខុសច្បាប់ក្នុងតំបន់រមណីយដ្ឋានអង្គរ និងផ្តល់ទីតាំងថ្មីរួចមក មានប្រជាពលរដ្ឋជិត ២ ពាន់គ្រួសារ ហើយដែលស្ម័គ្រចិត្តរុះរើចេញទៅចាប់ទីតាំងថ្មីនៅភូមិធម្មជាតិរុនតាឯកនៃស្រុកបន្ទាយស្រី។ នេះបើតាមការបញ្ជាក់ពីអាជ្ញាធរជាតិអប្សរា។
លោក ឡុង កុសល អគ្គនាយករងអាជ្ញាធរជាតិអប្សរា បានឲ្យដឹងនៅថ្ងៃទី ៧ ខែ កញ្ញា ឆ្នាំ ២០២២ ថា មកដល់ពេលបច្ចុប្បន្ននេះ ខាងអាជ្ញាធរនិងស្ថាប័នពាក់ព័ន្ធកំពុងយកចិត្តទុកដាក់ចាត់វិធានការលើបញ្ហាសំណង់ខុសច្បាប់ និងសំណង់ដែលធ្វើឲ្យប៉ះពាល់ដល់តំបន់បេតិកភណ្ឌអង្គរ ហើយប្រជាពលរដ្ឋប្រមាណជិត ២ ពាន់គ្រួសារមកពីភូមិត្រពាំងសេះ និងភូមិទក្សិណខាងត្បូង នៃសង្កាត់គោកចក ក្រុងសៀមរាប បានស្ម័គ្រចិត្តរុះរើ និងចាកចេញទៅចាប់ដីឡូត៍ថ្មីនៅទីតាំងភូមិធម្មជាតិរុនតាឯក ដែលរៀបចំដោយអាជ្ញាធរហើយ។
លោក ឡុង កុសល៖ «ការពិតប្រជាពលរដ្ឋយល់ពីគោលបំណងរបស់រដ្ឋាភិបាលក្នុងការរៀបចំតម្រង់ទិសកែប្រែតំបន់បេតិកភណ្ឌ។ ពួកគាត់សប្បាយចិត្តក្នុងការចូលរួមដើម្បីធ្វើយ៉ាងណាឲ្យតំបន់អង្គរកាន់តែមានភាពល្បីល្បាញ កាន់តែមានការទាក់ទាញសម្រាប់ភ្ញៀវទេសចរ រក្សាបានអង្គរជាបេតិកភណ្ឌពិភពលោក»។
លោក កុសល ថ្លែងថា ប្រជាពលរដ្ឋស្ម័គ្រចិត្តទៅរស់នៅក្នុងទីតាំងថ្មី ភូមិធម្មជាតិរុនតាឯក ដែលរដ្ឋបានគិតគូរចែកដីឡូត៍ថ្មីនោះ ដោយឆន្ទៈរបស់ពួកគាត់ផ្ទាល់ គ្មានការបង្ខិតបង្ខំពីអាជ្ញាធរឡើយ។
លោក ឡុង កុសល បន្ថែមថា ប្រជាពលរដ្ឋដែលព្រមរុះរើចាកចេញពីឧទ្យានអង្គរ មានសេចក្តីសោមនស្សជាពន់ពេក ដែលពួកគាត់បានទទួលអត្ថប្រយោជន៍ជាច្រើនតួយ៉ាងដីឡូត៍ និងហេដ្ឋារចនាសម្ព័ន្ធដែលគិតគូរយ៉ាងល្អិតល្អន់ពីរដ្ឋាភិបាល ហើយពួកគាត់បានចាកចេញពីលំនៅឋានចាស់ដែលខុសច្បាប់ ទៅទីតាំងថ្មីដែលស្របច្បាប់។
តាមការឲ្យដឹងពីអាជ្ញាធរជាតិអប្សរា តំបន់រមណីយដ្ឋានអង្គរ បានចុះបញ្ជីក្នុងសម្បត្តិបេតិកភណ្ឌពិភពលោកឆ្នាំ ១៩៩២ ដោយអង្គការយូណេស្កូ (UNESCO) និងមានទំហំផ្ទៃដីចំនួន ៤០១ គីឡូម៉ែត្រការ៉េ ដែលចាត់ជាសម្បត្តិសាធារណៈរបស់រដ្ឋ។
លោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់ បានសរសេរក្នុងទំព័រ Facebook ផ្លូវការរបស់លោកនៅថ្ងៃទី ៧ ខែ កញ្ញា ឆ្នាំ ២០២២ ថា ប្រជាពលរដ្ឋ ២៥៥ គ្រួសារ ស្ថិតនៅតំបន់អក្សរ K មកពីភូមិត្រពាំងសេះ និងភូមិទក្សិណខាងត្បូង សាទរទទួលយកដីឡូត៍ និងបានទៅពិនិត្យឃើញដីគ្រប់ៗគ្នានៅតំបន់អភិវឌ្ឍន៍ភូមិធម្មជាតិរុនតាឯក ពិសេសការដាំដើមឈើហូបផ្លែជូនគ្រប់ដីឡូត៍ដែលរៀបចំដោយក្រសួងបរិស្ថាន។
គួររំឭកថា កាលពីខែសីហា ក្រសួងរៀបចំដែនដី នគរូបនីយកម្មនិងសំណង់ បានប្រកាសពីយុទ្ធនាការចុះវាស់វែង កំណត់និយាមកាក្បាលដី និងអត្តសញ្ញាណអ្នកកាន់កាប់ដី និងសំណង់ខុសច្បាប់ក្នុងតំបន់រមណីយដ្ឋានអង្គរ និងតំបន់ដទៃទៀត ស្ថិតក្រោមការគ្រប់គ្រងរបស់អាជ្ញាធរជាតិអប្សរា។ យុទ្ធនាការនេះ មានរយៈពេល ១៥ ថ្ងៃ ដោយចាប់ផ្តើមតាំងពីថ្ងៃទី ១៨ ខែសីហា និងមានមន្ត្រីពាក់ព័ន្ធចូលរួមសរុបជាង ៧០០ នាក់។
នៅក្នុងយុទ្ធនាការនេះលោក ជា សុផារ៉ា បានប្រកាសចាត់វិធានការយ៉ាងម៉ឺងម៉ាត់ និងគ្មានការអនុគ្រោះនោះឡើយ ចំពោះសំណង់ខុសច្បាប់ទាំងឡាយនៅក្នុងតំបន់ការពាររមណីយដ្ឋានអង្គរ ដោយបញ្ជាឱ្យម្ចាស់សំណង់ខុសច្បាប់ទាំងឡាយ ក្នុងរមណីយដ្ឋានអង្គរ ត្រូវរុះរើចេញជាដាច់ខាត ប្រសិនបើមិនចង់ប្រឈមមុខនឹងវិធានការច្បាប់៕