.jpg)
លោកកឹម សុខា ពេលចេញពីសាលាដំបូងរាជធានីភ្នំពេញ កាលពីថ្ងៃទី១៩ខែមករាឆ្នាំ២០២២។ ហុង មិនា
ភ្នំពេញៈ សាលាដំបូងរាជធានីភ្នំពេញ នៅថ្ងៃទី ៧ ខែ កញ្ញា ឆ្នាំ ២០២២ បានសួរដេញលោក លោក កឹម សុខា ប្រធានអតីតគណបក្សសង្គ្រោះជាតិដោយផ្តោតលើអង្គហេតុចំនួន ២ គឺទី១ វីដេអូ និងរូបភាពបាតុកម្មហិង្សានៅផ្លូវវេងស្រេង និងទី២ វីដេអូហិង្សានៅស្ពាននាគជិតវត្តភ្នំ ក្រោមបទចោទ សន្ទិដ្ឋភាព ជាមួយរដ្ឋបរទេស ដើម្បីផ្តួលរំលំរាជរដ្ឋាភិបាលស្របច្បាប់។
លោក ប្លង់ សុផល អ្នកនាំពាក្យអយ្យការអមសាលាដំបូងរាជធានីភ្នំពេញប្រាប់ ភ្នំពេញ ប៉ុស្តិ៍ ក្រោយបញ្ចប់សនាការថា វីដេអូដែលបានចាក់សួរដេញដោលនៅក្នុងសវនាការនេះ និងបានចាក់នៅក្នុងសវនាការមុនៗ សុទ្ធតែជាវីដេអូផ្សេងៗគ្នា និងមិនជាន់គ្នាឡើយ ។
លោក យឹម ស៊ីណន មនុស្សជំនិត លោក កឹម សុខា ដែលបានចូលស្តាប់សវនាការប្រាប់អ្នកសារព័ត៌មាន នៅខាងមុខសាលាដំបូងរាជធានីភ្នំពេញថា សវនាការលោក កឹម សុខា លើកទី៥៥ នេះ មិនមានអ្វីដែលថ្មីនោះទេ គឺតំណាងអយ្យការបានសួរដេញដោលវីដេអូបាតុកម្មនៅផ្លូវវេងស្រេង និងវីដេអូហិង្សានៅស្ពាននាគជិតវត្តភ្នំ។
លោកបន្តថា ការសួរដេញដោលអង្គហេតុពាក់ព័ន្ធនឹងវីដេអូទាំង ២ នេះ មិនឆ្លើយតបទៅនឹងបទចោទសន្ទិដ្ឋភាពជាមួយរដ្ឋបរទេស ដើម្បីផ្តួលរំលំរាជរដ្ឋាភិបាលនោះទេ។ ជាមួយគ្នានេះ លោក កឹម សុខា ធ្លាប់បានបញ្ជាក់ជាច្រើនលើកនៅក្នុងសវនាការរួចហើយថា បាតុកម្មដែលនៅក្រៅពីទីលានប្រជាធិតេយ្យដែលដឹកនាំដោយអតីតគណបក្សសង្គ្រោះជាតិ គឺលោកមិនទទួលខុសត្រូវនោះទេ។
លោកថ្លែងថា៖ «អ៊ីចឹង! រាល់ការលើកឡើងអង្គហេតុទាក់ទងនឹងបាតុកម្មនេះ វាមិនដឹងជានរណាគេជាអ្នកដឹកនាំដូចនៅផ្លូវវេងស្រេងក្តី។ វាមិនជាប់ពាក់ព័ន្ធឯកឧត្តម កឹម សុខា ទេ»។
បើតាម លោក យឹម ស៊ីណន នៅក្នុងសវនាការ លោក កឹម សុខា នៅតែបន្តសហការជាមួយនឹងតំណាងអយ្យការ និងក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ និងការពារនូវភាពយុត្តិធម៌របស់លោក ក្នុងនាមជាជនរងគ្រោះម្នាក់នៅក្នុងសំណុំរឿងនេះ ។
សវនាការបន្តរបស់លោក កឹម សុខា នឹងធ្វើនៅថ្ងៃទី ១៤ ខែ កញ្ញា ឆ្នាំ ២០២២ ខាងមុខទៀត។
ក្រោយចេញពីបន្ទប់សវនាការនៅថ្ងៃទី ៧ ខែកញ្ញា ដដែលលោក កឹម សុខា បានសរសេរនៅលើទំព័រហ្វេសប៊ុករបស់លោកដោយថ្លែងអំណរគុណចំពោះ «បងប្អូនជនរួមជាតិខ្មែរទាំងក្នុងនិងក្រៅប្រទេស ព្រមទាំងមិត្តសហគមន៍អន្តរជាតិផងដែរ ដែលតែងតែតាមដាន និងទាមទារនូវសិទ្ធិ សេរីភាពឱ្យខ្ញុំដែលទទួលរងនូវភាពអយុត្តិធម៌អស់រយៈពេលជាង៥ឆ្នាំមកនេះ»។
ជាពិសេសលោកបានសម្តែងនូវការកោតសរសើរ និងអរគុណចំពោះសហមេធាវីការពារក្តី សហការី អ្នកគាំទ្ររបស់លោក និងប្រជាពលរដ្ឋខ្មែរដែលតែងតែជួយការពារ លើកទឹកចិត្ត និងផ្តល់យុត្តិធម៌ដល់លោក ដោយបានចូលរួមផ្ទាល់ក្នុងតុលាការនិងតាមដាននៅខាងមុខតុលាការ ទោះបីសវនាការនេះ ត្រូវបានអូសបន្លាយរយៈពេលយ៉ាងយូររហូតដល់ទី៥៥ ហើយក៏ដោយ។
ជាមួយគ្នា នេះដែរលោកថ្លែងថា៖ «ក្នុងនាមជាអ្នកមានជំនឿលើព្រះពុទ្ធសាសនា មានព្រហ្មវិហារធម៌ ប្រកាន់យកនូវគោលការណ៍អហិង្សា និងក្នុងនាមជាអ្នកគោរពប្រពៃណីទំនៀមទម្លាប់ជាតិខ្មែរ ដែលយើងតែងតែធ្វើអំពើជាកុសល ស្គាល់បុណ្យ និងបាប កតញ្ញូចំពោះមាតុភូមិកម្ពុជា បុព្វការីជន ញាតិសន្តាន ទោះបីសេរីភាពមិនមានពេញលេញក៏ដោយ ខ្ញុំនឹងទៅចូលរួមប្រារព្ធពិធីបុណ្យកាន់បិណ្ឌ និងភ្ជុំបិណ្ឌជាមួយបងប្អូនជនរួមជាតិនៅតាមវត្តអារាមខ្លះតាមសទ្ធានាពេលឆាប់ៗក្នុងសប្តាហ៍ខាងមុខនេះ»។
ជាមួយគ្នានេះ លោក កឹម សុខា ក៏បានរំលេចនូវខ្លឹមសារបន្ថែមថា៖ ««ការសម្រេចដោយអគតិ គឺជាអំពើបាប» ហើយ «ជួបជុំគ្នាធ្វើបុណ្យតាមទំនៀមទម្លាប់ខ្មែរ គឺអំពើជាកុសល»៕
វីដេអូ៖
