ភ្នំពេញៈ អង្គការ Helen Keller បានឱ្យដឹងថា គម្រោងបណ្តុះបណ្តាលខ្លីជុំវិញរបបអាហារសុខភាពនិងការចិញ្ចឹមទារក និងកុមារ ទៅដល់កម្មករ កម្មការិនីនៅតាមបណ្តារោងចក្រប្រមាណ ២៨ កន្លែង នៅរាជធានីខេត្តចំនួន ៤ អង្គការរំពឹងថា បុគ្គលិកកម្មករ កម្មការិនីជាង ២០ ០០០ នាក់នឹងទទួលផលប្រយោជន៍។
គម្រោងបណ្តុះបណ្តាលខ្លីនេះគឺជាផ្នែកមួយនៃគម្រោងសាកល្បងលើកកម្ពស់អាហារូបត្ថម្ភនិងការចិញ្ចឹមទារក និងកុមារនៅតាមរោងចក្រ សហគ្រាស និងកន្លែងធ្វើការ រួមទាំងគាំទ្រការបង្កើតបន្ទប់បំបៅកូនដោយទឹកដោះម្ដាយ ដោយទទួលបានការគាំទ្រពីទីភ្នាក់ងារកិច្ចសហប្រតិបត្តិការអាល្លឺម៉ង់ GIZ និងគម្រោង MUSEFO ។
បន្ទាប់ពីប្រកាសដាក់ឱ្យអនុវត្តគម្រោងសាកល្បងនេះ លោក ហ៊ូ ក្រើន នាយកអង្គការ Helen Keller បានប្រាប់ ភ្នំពេញ ប៉ុស្តិ៍ នៅថ្ងៃទី ៨ កញ្ញាថា កាលពីថ្ងៃទី៥ ដល់៧ ខែកញ្ញា ក្រុមការងាររបស់អង្គការ Helen Keller បានធ្វើការបណ្តុះបណ្តាលខ្លីដល់កម្មករ កម្មការនីរោងចក្រ Berry Apparel (Cambodia) Co., Ltd. ស្តីពីរបបអាហារសុខភាព និងការចិញ្ចឹមទារក និងកុមារ។
លោកបានបន្តថា គម្រោងបណ្តុះបណ្តាលខ្លីនេះ បាននិងកំពុងអនុវត្តនៅលើរោងចក្រសហគ្រាស ស្ថាប័នរដ្ឋ និងអង្គការនានាចំនួន ២៨ កន្លែង ដែលស្ថិតនៅរាជធានីភ្នំពេញ ខេត្តកណ្តាល កំពត និងកំពង់ធំ ដើម្បីអនុវត្តការសាកល្បងលើកកម្ពស់អាហារូបត្ថម្ភ និងការចិញ្ចឹមទារក និងកុមារនៅកន្លែងធ្វើការ។
លោកបានបន្តថា បុគ្គលិក កម្មករ កម្មការិនីចំនួនជាង ២០ ០០០ នាក់ នឹងត្រូវរំពឹងទុកថា បានទទួលផលប្រយោជន៍ ពីគម្រោងតាមរយៈសកម្មភាពបណ្តុះបណ្តាល និងការផ្តល់ជាវេទិកាមួយដល់ស្ត្រីដើម្បីពួកគេមានឱកាសចូលរួមក្នុងកម្មវិធីសំខាន់ផ្សេងៗ ដូចជា ការអប់រំ អាហារូបត្ថម្ភ និងអនាម័យ ការអប់រំ ការចិញ្ចឹមទារក និងកុមារ ការប្រឹក្សាលើរបបអាហារ និងសុខភាពរបស់ស្ត្រី និងច្បាប់ការងារ។
លោកបានបញ្ជាក់ថា៖ «យើងផ្តោតសំខាន់លើការអប់រំដល់បុគ្គលិក កម្មករ កម្មការិនីអំពីសារៈសំខាន់នៃសុខភាព និងអាហារូបត្ថម្ភ ដូចជា អាហារូបត្ថម្ភពេលមានផ្ទៃពោះ និងក្រោយសម្រាល។ ការបំបៅកូនដោយទឹកដោះម្តាយ ការផ្តល់អាហារបន្ថែមដល់កុមារ ការប្រឹក្សាលើរបបអាហារ សារ:សំខាន់អនាម័យ អត្ថប្រយោជន៍ការបរិភោគអាហារចម្រុះដែលមានសារជាតិចិញ្ចឹមខ្ពស់ដើម្បីសុខភាព និងថាមពលមាំមួន។ ការអប់រំស្តីពីការចិញ្ចឹមទារក និងកុមារតូចអំឡុងពេលធ្វើការងារដើម្បីឱ្យកូនៗមានសុខភាពល្អ ឆ្លាតវៃ និងក្លាយជាពលរដ្ឋមានសក្តានុពលប្រកបដោយផលិតភាពការងារខ្ពស់ក្នុងការលើកស្ទួយសេដ្ឋកិច្ចជាតិនាពេលអនាគត»។
ការសិក្សាស្រាវជ្រាវតាមបែបវិទ្យាសាស្ត្រនៅប្រទេសផ្សេងនាពេលកន្លងមកបានរកឃើញថា គម្រោងលើកកម្ពស់អាហារូបត្ថម្ភនិងការចិញ្ចឹមទារកនិងកុមារនៅតាមរោងចក្រសហគ្រាស និងកន្លែងធ្វើការមានផលចំណេញច្រើនសម្រាប់និយោជិត និងនិយោជករួមមាន កាត់បន្ថយថ្លៃថែទាំសុខភាពសម្រាប់ម្តាយ និងកូន, កាត់បន្ថយការអវត្តមានបុគ្គលិក, បង្កើនផលិតភាពការងារ,ធ្វើឱ្យបរិយាកាសនៅកន្លែងធ្វើការមានលក្ខណៈល្អប្រសើរ, បុគ្គលិកស្ត្រីដែលបន្តការងាររយ:ពេលយូរមានអត្រាខ្ពស់, កម្មករមានការប្តេជ្ញាចិត្តខ្ពស់ក្នុងការធ្វើការងារនិងមានការកាត់បន្ថយការចំណាយលើការជ្រើសរើស និងការបណ្តុះបណ្តាលនិយោជក។ នេះបើតាមការអះអាងរបស់លោក ហ៊ូ ក្រើន ។
លោកបានបន្ថែមថា ការសិក្សាស្រាវជ្រាវនេះ ក៏បានរកឃើញថា គម្រោងដូចនេះក៏បានផ្តល់ជាវេទិកាមួយដល់ស្ត្រីដើម្បីពួកគេមានឱកាសចូលរួមក្នុងកម្មវិធីសំខាន់ៗដូចជា ការអប់រំអាហារូបត្ថម្ភ និងអនាម័យ ការអប់រំ ការចិញ្ចឹមទារក និងកុមារ ការប្រឹក្សាលើរបបអាហារ និងសុខភាពរបស់ស្ត្រី និងច្បាប់ការងារ។
របាយការណ៍អង្កេតសុខភាពនិងប្រជាសាស្ត្រកម្ពុជាឆ្នាំ ២០២២ នេះ បានបង្ហាញថា អត្រានៃការបំបៅកូនដោយទឹកដោះម្តាយតែមួយមុខគត់នៅកម្ពុជា មាននិន្នាការបន្តធ្លាក់ចុះគួរឱ្យព្រួយបារម្ភយ៉ាងខ្លាំងពីអត្រា ៦៥ ភាគរយនៅឆ្នាំ ២០១៤ មកនៅត្រឹម ៥១ ភាគរយ នៅឆ្នាំ ២០២២ នេះ។
ជាមួយនឹងការធ្លាក់ចុះនេះ ប្រទេសកម្ពុជាបានប្តេជ្ញាចិត្តនៅក្នុងកិច្ចប្រជុំកំពូលទីក្រុងតូក្យូស្តីពីអាហារូបត្ថម្ភដើម្បីកំណើននាខែធ្នូ ឆ្នាំ ២០២១ កន្លងទៅថា នឹងបង្កើនអត្រាការបំបៅកូនដោយទឹកដោះម្តាយតែ ១ មុខគត់ សម្រាប់ទារក និងកុមារអាយុពីសូន្យដល់ ៦ ខែ ឱ្យបានដល់ ៨៥ ភាគរយ នៅឆ្នាំ ២០៣០។
លោកស្រី ទុង រដ្ឋាវី ទីប្រឹក្សាក្រសួងសុខាភិបាលបានថ្លែងថា ការប្ដេជ្ញាចិត្តរបស់កម្ពុជានាពេលនោះបានធ្វើឡើងដោយសារតែអត្រាការបំបៅកូន ដោយទឹកដោះម្តាយ បានធ្លាក់ចុះនៅប៉ុន្មានឆ្នាំចុងក្រោយនេះ។ យ៉ាងណា លោកស្រីបានអះអាងថា មិនទាន់មានការសិក្សាណាមួយបញ្ជាក់ពីមូលហេតុក្នុងការធ្លាក់ចុះយ៉ាងគំហុកនៃអត្រាការបំបៅដោះកូននេះនៅឡើយទេ។
ប៉ុន្តែលោកស្រីបានបញ្ជាក់ថា៖ «ខ្ញុំគិតថាមានកត្តាជាច្រើនដែលរួមចំណែកដូចជា ស្ត្រី ៧៦ ភាគរយ ធ្វើការងារនៅក្នុងប្រព័ន្ធ ហើយពួកគាត់ភាគច្រើនបានបញ្ឈប់ការបំបៅដោះកូននៅពេលត្រឡប់មកធ្វើការងារវិញ។ បញ្ហាសំខាន់មួយទៀត គឺកង្វះខាតការគាំទ្រពីស្ថាប័ន និងពីនិយោជកនៅកន្លែងធ្វើការ គ្មានការលើកទឹកចិត្តពីសំណាក់សមាជិក គ្រួសារផ្ទាល់ដូចជាប្តី ម្តាយ ឪពុកខ្លួនឯង ម្ដាយ ឪពុកក្មេក ជីដូន ជីតា និងមនុស្សជុំវិញខ្លួនដោយគិតថា ការបំបៅកូនដោយទឹកដោះម្តាយជាការទទួលខុសត្រូវផ្តាច់មុខរបស់ម្តាយតែម្នាក់ឯង ដែលនេះជាការគិតប្រកបដោយគ្រោះថ្នាក់មួយដែលឱ្យស្ត្រីងាយនឹងបោះបងការបំបៅដោះកូន»។
បន្ថែមពីនេះ លោកស្រីបានអះអាងទៀតថា ការផ្សព្វផ្សាយលក់ផលិតផលទឹកដោះគោម្សៅផ្សំតាមរូបមន្ត ក៏ជាកត្តាសំខាន់ដែលធ្វើឱ្យមានការភាន់ច្រឡំយ៉ាងខ្លាំងក្នុងចំណោមមហាជនអំពីគុណតម្លៃដ៏ល្អឥតខ្ចោះរបស់ទឹកដោះម្តាយ សម្រាប់ការចិញ្ចឹមទារក និងកុមារ និងយល់ខុសថា ទឹកដោះគោម្សៅផ្សំតាមរូបមន្តជាអាហារទំនើបទាន់សម័យសម្រាប់ទារក ក៏ជាមូលហេតុដែលធ្វើការបំបៅដោះកូនដោយទឹកដោះ មានការធ្លាក់ចុះផងដែរ។
ក្នុងនាមក្រសួងសុខាភិបាល លោកស្រី ទុង រដ្ឋាវី អំពាវនាឱ្យបងប្អូនកម្មករ កម្មការីនីចូលរួមពិចារណាឱ្យបានដិតដល់លើគុណតម្លៃទឹកដោះម្តាយសម្រាប់កូនៗរបស់យើង ព្រោះខ្ញុំដឹងច្បាស់ថា បងប្អូនទាំងអស់ពិតជាចង់ឱ្យកូនៗមានបញ្ញាឈ្លាសវៃ មានខួរក្បាលល្អ រៀនពូកែ មានសុខភាពល្អប្រសើរ គ្មានជំងឺ រាងកាយមាំមួនស គ្នានិងកូនៗមានអនាគតបវររុងរឿង ហើយដែលគុណភាពទាំងអស់នេះអាចសម្រេចបានដោយគ្រាន់តែអនុវត្តការបំបៅដោះកូនឱ្យបានពេញលេញតែប៉ុណ្ណោះ៕