លោក អ៊ិត សំហេង និងសេចក្ដីសម្រេចឱ្យឈប់សម្រាកប្រចាំឆ្នាំ ។ រូបថត ក្រសួងការងារ
ភ្នំពេញៈ ក្រសួងការងារ និងបណ្តុះបណ្តាលវិជ្ជាជីវៈបានចេញសេចក្តីសម្រេចឱ្យកម្មករនិយោ ជិតឈប់សម្រាកនៅថ្ងៃបុណ្យប្រចាំឆ្នាំ ២០២៣ ដោយមានប្រាក់ឈ្នួលរយៈពេល ២១ ថ្ងៃ ដូចគ្នានឹងឆ្នាំ ២០២២ ដែរ។
សេចក្តីសម្រេចរបស់ លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ចុះថ្ងៃទី ៧ ខែកញ្ញា ដែល ភ្នំពេញ ប៉ុស្តិ៍ ទទួលបាននៅថ្ងៃទី ៩ ខែកញ្ញា បង្ហាញថា ក្រសួងការងារបានសម្រេចអនុញ្ញាតឱ្យកម្មករនិយោជិតនៃរោងចក្រ សហគ្រាសទាំងអស់ ដែលមានចែងក្នុងមាត្រា ១ នៃច្បាប់ការងារ បានឈប់សម្រាកពីការងារដោយមានប្រាក់ឈ្នួលទៅតាមប្រតិទិនរយៈពេល ២១ ថ្ងៃ នៃថ្ងៃបុណ្យសម្រាប់ឆ្នាំ ២០២៣ ខាងមុខនេះ។
លោក អ៊ិត សំហេង បានឱ្យដឹងតាមរយៈលិខិតសម្រេចនោះថា ចំពោះរោងចក្រ សហគ្រាសទាំងឡាយណា ដែលកម្មវត្ថុអាជីវកម្មមានចរិតលក្ខណៈសកលត្រូវប្រព្រឹត្តទៅជាប្រចាំ និងមិនអាចបញ្ឈប់សកម្មភាពបាន ហើយការឈប់សម្រាកបុណ្យនៃកម្មករនិយោជិតទាំងអស់ព្រមគ្នាក្នុងពេលតែមួយ នាំឱ្យខូចប្រយោជន៍ដល់សាធារណជន ឬក៏ធ្វើឱ្យខូចដំណើរការរបស់រោងចក្រ សហគ្រាស នោះម្ចាស់ឬនាយករោងចក្រ សហគ្រាស ត្រូវរៀបចំបែងចែកឱ្យកម្មករនិយោជិតបានឈប់សម្រាកទៅតាមថ្ងៃបុណ្យនីមួយៗ ដោយផ្លាស់ប្តូរគ្នា។
លោកបញ្ជាក់ថា៖ «ក្នុងករណីមានការព្រមព្រៀងគ្នារវាងកម្មករនិយោជិតសាមី និងនិយោជក ឬមានចែងនៅក្នុងបទបញ្ជាផ្ទៃក្នុង របស់រោងចក្រ សហគ្រាស ឬអនុសញ្ញារួម ការឈប់សម្រាករបស់កម្មករនិយោជិតអាចអនុវត្តនៅពេលណាមួយ ផ្សេងទៀត ដែលខុសពីថ្ងៃឈប់សម្រាកបុណ្យដូចមានកំណត់ក្នុងប្រកាសនេះ»។
លោករដ្ឋមន្ត្រីក្រសួងការងារបានឱ្យដឹងទៀតថា ម្ចាស់ ឬនាយករោងចក្រ សហគ្រាស ត្រូវរៀបចំបញ្ជីឈ្មោះកម្មករនិយោជិតដែលត្រូវផ្លាស់ប្តូរគ្នាឈប់សម្រាក នៅថ្ងៃបុណ្យនីមួយៗ ហើយរក្សាទុកជាប្រចាំសម្រាប់ការត្រួតពិនិត្យរបស់អធិការកិច្ចការងារ។ ក្នុងអំឡុងពេលនៃការឈប់សម្រាកដោយផ្លាស់ប្តូរគ្នានេះ ម្ចាស់ ឬនាយករោងចក្រ សហគ្រាសអាចប្រើប្រាស់កម្មករនិយោជិតផ្សេងជាបណ្តោះអាសន្នមកជំនួសកម្មករនិយោជិតដែលបានឈប់សម្រាក។
ក្នុងលិខិតសម្រេចនោះដែរលោក អ៊ិត សំហេង បានប្រាប់ទៅនាយកខុទ្ទកាល័យ អគ្គនាយកនៃអគ្គនាយកដ្ឋានរដ្ឋបាល និងហិរញ្ញវត្ថុ អគ្គនាយកនៃអគ្គនាយកដ្ឋានការងារ អគ្គនាយកនៃអគ្គនាយកដ្ឋានអប់រំបណ្តុះបណ្តាលបច្ចេកទេស និងវិជ្ជាជីវៈ ប្រធាននាយកដ្ឋានអធិការកិច្ចការងារ ប្រធាននាយកដ្ឋានវិវាទការងារ និងប្រធានអង្គភាពពាក់ព័ន្ធ កម្មករនិយោជិត និងនិយោជក ត្រូវទទួលបន្ទុកអនុវត្ត ប្រកាសរបស់ក្រសួងការងារតាមភារកិច្ចរៀងៗខ្លួន ចាប់ពីថ្ងៃទី ១ ខែមករា ឆ្នាំ ២០២៣ តទៅ។
លោក លី វិចិត្រ ប្រធានសហភាពសហជីពសុភមង្គលកម្មករកម្ពុជា ថ្លែងនៅថ្ងៃទី ៨ ខែកញ្ញាថា ជារៀងរាល់ឆ្នាំ គឺមុនពេលឆ្លងឆ្នាំ ក្រសួងការងារ និងបណ្តុះបណ្តាលវិជ្ជាជីវៈ តែមានការចេញសេចក្តីសម្រេចឱ្យមានកម្មករ និយោជិត បានឈប់សម្រាក ដែលជាការកត់សម្គាល់ឃើញថា មិនមានបញ្ហាអ្វីទេ។ លោកថា ការឈប់សម្រាកនៅប្រទេសកម្ពុជា បើប្រៀបធៀបជាមួយបណ្តាប្រទេសមួយចំនួន ឃើញថា មានការឈប់សម្រាកបានច្រើនជាងគេផងដែរ។
លោកបន្តថា ជាទូទៅការប្រកាសរបស់ក្រសួងការងារឱ្យបងប្អូនកម្មករ និយោជិតបានឈប់សម្រាក គឺបណ្តារោងចក្រតែងផ្តល់ឱ្យបងប្អូនមានការឈប់សម្រាក លើកលែងតែមានរោងចក្រមួយចំនួនតូច ដែលមមាញឹកការងារច្រើន ដែលមិនអាចអនុញ្ញាតឱ្យមានការឈប់សម្រាកព្រមគ្នាបាន ដែលត្រូវបែងចែកវេនគ្នាសម្រាប់ឈប់សម្រាក។
លោកថ្លែងថា៖ «មួយរយៈពេលនេះខ្ញុំសង្កេតឃើញថា តាមបណ្តារោងចក្រ សហគ្រាស គឺអត់សូវសម្បូរការងារធ្វើទេ អ៊ីចឹងការឈប់សម្រាកដូចជាភ្ជុំបិណ្ឌនេះអី ប្រហែលជាមិនមានការងារបន្ថែមទេ គឺបងប្អូនអាចធ្វើការឈប់សម្រាកទាំងអស់តែម្តង» ៕
.jpg)
