.jpg)
មន្ត្រីបង្ហាញបន្ទប់បំបៅដោះកូន សម្រាប់មន្ត្រីរាជការជាស្ត្រីក្រោយពេលសម្រាលកូន ត្រឡប់មកធ្វើការវិញ។ រូបថត ក្រសួងឧស្សាហកម្ម
ភ្នំពេញៈ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ និងអង្គការ Helen Keller ប្រកាសដាក់ឱ្យប្រើប្រាស់ជាផ្លូវការនូវបន្ទប់បំបៅដោះកូន ដើម្បីជួយសម្រួលដល់មន្ត្រីរាជការជាស្ត្រីដែលមានកូនតូចឱ្យមានកន្លែងសមរម្យក្នុងការបន្តបំបៅដោះកូននៅពេលត្រឡប់មកបំពេញការងារវិញ ក្រោយពីការសម្រាកមាតុភាពរយៈពេល ៣ ខែ។
ការសហការគ្នាយ៉ាងល្អក្នុងការរៀបចំបង្កើតបន្ទប់បំបៅដោះកូន និងពិធីប្រកាសដាក់ឱ្យប្រើប្រាស់នៅក្នុងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍នេះ បានធ្វើឡើងនៅថ្ងៃទី ៨ ខែកញ្ញា ដោយមានអ្នកចូលរួមប្រមាណ ១០០ នាក់។
លោក គឹម ទូច រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បានថ្លែងថា អត្ថប្រយោជន៍នៃទឹកដោះម្ដាយ ដែលជាអាហារូបត្ថម្ភដ៏មានសារៈសំខាន់បំផុត ក្នុងការចិញ្ចឹមទារក និងកុមារ ក្រសួងក៏មានគំនិតផ្តួចផ្តើមក្នុងការបង្កើតបន្ទប់បំបៅដោះកូននេះឡើង។ ការបង្កើតបន្ទប់នេះដើម្បីជួយសម្រួលដល់មន្ត្រីរាជការជាស្ត្រីដែលមានកូនតូច មានកន្លែងសមរម្យក្នុងការបន្តបំបៅដោះកូនប្រកបដោយអារម្មណ៍ស្រស់ស្រាយកក់ក្ដៅ នៅពេលពួកគាត់ត្រឡប់មកបំពេញការងារវិញក្រោយពីការសម្រាកមាតុភាពរយៈពេល ៣ ខែ។
លោកថា៖ «ខ្ញុំជឿជាក់ថា នៅពេលដែលកុមាររបស់យើងមានសុខភាពល្អទាំងរាងកាយ និងមានការអភិវឌ្ឍខួរក្បាលល្អ មានគំនិតប្រាជ្ញាស្មារតី ឆ្លាតវាងវៃ និងប្រកបដោយ IQ ខ្ពស់នោះ ជាការរួមចំណែកដ៏សំខាន់ក្នុងការលើកកម្ពស់ការអភិវឌ្ឍវិស័យវិទ្យាសាស្ត្រ បច្ចេកវិទ្យា និងនវានុវត្តន៍ នាពេលខាងមុខ។ ព្រោះវិស័យនេះ គឺទាមទារខ្លាំងណាស់នូវកត្តាធនធានមនុស្សដែលមានសតិបញ្ញា ភាពច្នៃប្រឌិតខ្ពស់ ដើម្បីជំរុញកំណើនការអភិវឌ្ឍសេដ្ឋកិច្ច និងសង្គមកម្ពុជាបានយ៉ាងឆាប់រហ័ស»។
លោកថ្លែងថា ប្រសិនបើស្ថាប័ននីមួយៗ យកចិត្តទុកដាក់លើកទឹកចិត្ត និងសម្រួលឱ្យស្ត្រីបន្តបំបៅដោះកូននៅកន្លែងធ្វើការបន្តទៀត នោះអាចមានសង្ឃឹមថាអាត្រាការបំបៅកូនដោយទឹកដោះម្តាយនឹងមានសម្ទុះកើនឡើងវិញ ជាក់ជាមិនខាន។
លោកបានបញ្ជាក់ថា៖ «ខ្ញុំសូមអំពាវនាវដល់មន្ត្រីរាជការជាស្ត្រី ដែលមាន កូនអាយុក្រោម ២ ឆ្នាំ ឬស្ត្រីដែលទើបសម្រាលកូនហើយ សូមបំបៅកូនដោយទឹកដោះម្តាយសុទ្ធរហូតដល់ ៦ ខែ ទោះបីជាត្រូវ ត្រឡប់មកធ្វើការវិញក៏ដោយ និងបន្តបំបៅដោះកូនរហូតដល់អាយុ ២ ឆ្នាំ។ (ខ្ញុំ) សូមអំពាវនាវដល់ក្រសួង និងស្ថាប័នផ្សេងៗទៀត សូមមេត្តាពិចារណាក្នុងការរៀបចំបន្ទប់បំបៅដោះកូនដើម្បីសម្រួលឱ្យស្ត្រីដែលត្រឡប់មកធ្វើការវិញអាចបន្តការបំបៅដោះកូន តទៅទៀតបាន»។
ការបំបៅដោះកូនដោយទឹកដោះម្តាយពិតជាបានរួមចំណែកកាត់បន្ថយអត្រាមរណភាពរបស់មាតា ទារក និងកុមារ និងជួយឱ្យកុមារមានសុខភាពល្អ មានប្រាជ្ញាឆ្លាតវាងវៃ។ តាមរយៈការធ្វើ ឱ្យមានភាពប្រសើរឡើងនូវស្ថានភាពអាហារូបត្ថម្ភស្ត្រី និងកុមារ និងតាមការប្តេជ្ញាចិត្តរបស់កម្ពុជាក្នុងការបង្កើនអត្រាការបំបៅកូនដោយទឹកដោះម្តាយតែ ១ មុខគត់សម្រាប់ទារក និងកុមារអាយុពីសូន្យ ដល់ ៦ ខែ ឱ្យបានដល់ ៨៥% នៅឆ្នាំ ២០៣។
លោក គឹម ទូច ថ្លែងថា តាមការសិក្សាស្រាវជ្រាវបែបវិទ្យាសាស្ត្របានបង្ហាញថា ការបង្កបរិយាកាស សមស្របដូចជាការបង្កើតបន្ទប់បំបៅដោះកូនសមរម្យនៅកន្លែងធ្វើការផ្ដល់ពេលវេលាសម្រាកដល់ស្ត្រីក្នុងការបំបៅដោះកូន នៅកន្លែងធ្វើការ ផ្តល់ពេលវេលាក្នុងការច្របាច់ ឬបូមទឹកដោះម្តាយក្នុងបន្ទប់បំបៅជាមួយនឹងការបំពាក់សម្ភារ និងឧបករណ៍ គ្រប់គ្រាន់ នឹងធ្វើឱ្យស្ត្រីមានការពេញចិត្ត មានអារម្មណ៍ល្អស្រស់ថ្លានៅកន្លែងធ្វើការទទួលបានសុខភាពល្អប្រសើរទាំងខ្លួន គាត់ផ្ទាល់ កូន និងក្រុមគ្រួសារដែលជាបច្ច័យនាំមកនូវការកើនឡើងផលិតភាពការងារ និងកាត់បន្ថយអវត្តមានបុគ្គលិក ព្រមទាំងកាត់បន្ថយការចំណាយលើការធានារ៉ាប់រងសុខភាពបុគ្គលិកផងដែរ។
លោកស្រី ទុង រដ្ឋាវី ទីប្រឹក្សាក្រសួងសុខាភិបាលថ្លែងថា កិច្ចខិតខំប្រឹងប្រែង និងការចាប់ផ្តើមមួយដ៏ល្អ ដើម្បីចូលរួមចំណែកក្នុងការលើកកម្ពស់ គាំទ្រការបំបៅកូនដោយទឹកដោះម្តាយ ដែលជាអាទិភាពចម្បងមួយ របស់ក្រសួងសុខាភិបាល និងរាជរដ្ឋាភិបាលកម្ពុជា។
លោកស្រីបានបន្តថា៖ «យើងទាំងអស់គ្នាបានយល់ច្បាស់រួចមកហើយ លើគុណតម្លៃទឹកដោះម្តាយចំពោះសុខភាព ការលូតលាស់ផ្នែករាងកាយ ការអភិវឌ្ឍសតិបញ្ញាស្មារតីរបស់កុមារ និងការអភិវឌ្ឍសេដ្ឋកិច្ចជាតិ។ ភ័ស្តុតាងវិទ្យាសាស្ត្របញ្ជាក់ច្បាស់ថា ការបំបៅកូនដោយទឹកដោះម្តាយភ្លាមៗអំឡុងម៉ោងដំបូងបន្ទាប់ពីសម្រាលអាចទប់ស្កាត់មរណភាពទារកបានប្រហែល ២០% កុមារដែលបានទទួលការបំបៅដោយទឹកដោះម្តាយតែ ១ មុខគត់សម្រាប់រយៈពេល ៦ ខែដំបូង អាចកាត់បន្ថយជំងឺរាករូសបាន ១១ ដង និងជំងឺរលាកសួតបាន ១៥ ដង បើប្រៀបធៀបជាមួយកុមារ ដែលមិនបានទទួលការបំបៅដោយទឹកដោះម្តាយ បានពេញលេញ»។
លោកស្រី ទុង រដ្ឋាវី បន្ថែមថា ការមិនបានបំបៅកូនដោយទឹកដោះម្ដាយធ្វើឱ្យប៉ះពាល់ធ្ងន់ធ្ងរដល់ការអភិវឌ្ឍខួរក្បាល និងសតិបញ្ញា ស្មារតីរបស់កុមារ។ កុមារមិនទទួលបានការបំបៅដោយទឹកដោះម្តាយពេញលេញ មានទំហំខួរក្បាលតូចជាងកុមារដែល បានបៅដោយទឹកដោះម្តាយពេញលេញ។ មិនតែប៉ុណ្ណោះលោកស្រីថា ពួកគេបាត់បង់ភាពវៃឆ្លាត ឬ IQ ចំនួន ២.៦ ពិន្ទុ ប្រៀបធៀបនឹងកុមារទទួលបានការបំបៅទឹកដោះម្តាយពេញលេញ។
លោក ហ៊ូ ក្រើន នាយកអង្គការ Helen Keller បាននិយាយថា នេះគឺកិច្ចសហការគ្នាយ៉ាងល្អក្នុងការរៀបចំបង្កើតបន្ទប់បំបៅដោះកូន និងពិធីប្រកាសដាក់ឱ្យប្រើប្រាស់។
លោកបានបន្តថា៖ «ខ្ញុំក៏សង្ឃឹមថាគម្រោងនេះនឹងចូលរួមអនុវត្តការប្តេជ្ញាចិត្តរបស់កម្ពុជាក្នុងការបង្កើនអត្រាការបំបៅកូនដោយទឹកដោះម្តាយតែ ១ មុខគត់សម្រាប់ទារក និងកុមារអាយុពី ០ ដល់ ៦ ខែ ឱ្យបានដល់ ៨៥% នៅឆ្នាំ ២០៣០»។
សូមជម្រាប់ថា តាមរយៈការបង្កើតបន្ទប់បំបៅដោះកូននេះ អង្គការ Helen Keller ក៏នឹងផ្តល់នូវឧបករណ៍ និងសម្ភារដូចជា ទូទឹកកក តុ កៅអី កង្ហារ ម៉ាស៊ីនបូមទឹកដោះ កន្សែងជូតដៃ និងសាប៊ូលាងដៃជាដើម និងសម្ភារប្រាស្រ័យទាក់ទងដើម្បីការផ្លាស់ប្តូរឥរិយាបថ៕
