ភ្នំពេញៈ លោក​នាយក​រដ្ឋមន្ត្រី ហ៊ុន សែន បាន​ថ្លែងថា ឆ្នាំនេះ​កម្ពុជា​អាច​រៀបចំ​ប្រារព្ធ​ទិវា​អក្ខរកម្ម​ជាតិ ៨ ​កញ្ញា នៅ​ទូទាំង​ប្រទេស ស្រប​ពេល​ដែល​សភាពការណ៍​ប្រទេស​ជាតិ​បាន​សម្រេច​ជោគជ័យ​ដ៏ធំធេង ក្នុង​ការប្រយុទ្ធ​ប្រឆាំង​នឹង​កូវីដ​ ១៩ ដោយសារ​គ្រប់គ្រង​បាន​យ៉ាង​ល្អប្រសើរ គ្មាន​អ្នកស្លាប់​ដោយសារ​កូវីដ​ ១៩ ជាពិសេស​អាច​បើក​ដំណើរការ​​គ្រប់​សកម្មភាព​សេដ្ឋកិច្ច​សង្គម​ឡើងវិញ​យ៉ាង​ពេញលេញ តាម​គន្លង​ប្រក្រតីភាព​ថ្មី​។

លោក​ ហ៊ុន សែន បាន​ថ្លែង​ដូចនេះ​តាមរយៈ​សារលិខិត​អបអរសាទរ​ឱកាស​ប្រារព្ធ​ទិវា​អក្ខរកម្ម​ជាតិ ៨ កញ្ញា ឆ្នាំ​ ២០២២ ក្រោម​ប្រធានបទ «​អក្ខរកម្ម​ជា​ស្ពាន​ឆ្ពោះ​ទៅរក​ជំនាញ​មុខរបរ និង​ការសិក្សា​បន្ត​» ក្នុង​អត្ថន័យ​ជំរុញ​ប្រជាពលរដ្ឋ​កម្ពុជា គ្រប់រូប​ឱ្យ​ទទួល​បាន​ឱកាស​សិក្សា​ពេញ​ ១ ​ជីវិត គ្រប់​ពេលវេលា គ្រប់​ទីកន្លែង និង​គ្រប់​មធ្យោបាយ ប្រកប​ដោយ​វិជ្ជា​សម្បទា បំណិន​សម្បទា ចរិយា​សម្បទា និង​គុណសម្បទា ដើម្បី​រួមចំណែក​ស្តារ​ឡើងវិញ​សង្គម-​សេដ្ឋកិច្ច​បន្ទាប់ពី​វិបត្តិ​កូវីដ ​១៩​។

លោក​បញ្ជាក់ថា​៖ «​ទស្សនទាន​នៃ​ប្រធានបទ​នៅ​ឆ្នាំនេះ​ផ្តោតលើ​ការគិតគូរ និង​ការផ្ដល់​ឱកាស​ដល់​ប្រជាពលរដ្ឋ​ទាំងអស់​នូវ​ចំណេះដឹង ចំណេះ​ធ្វើ សហគ្រិនភាព ជំនាញ​មុខរបរ និង​នវានុវត្តន៍​លើ​គ្រប់ផ្នែក គ្រប់​វិស័យ ជាពិសេស​អក្ខរកម្ម បច្ចេកវិទ្យា និង​អក្ខរកម្ម​ឌីជីថល ដែល​សព្វថ្ងៃ​កំពុង​មាន​ភាព​ចាំបាច់ និង​កំពុងមាន​ការរីកចម្រើន​យ៉ាង​ឆាប់រហ័ស​»​។

លោក ហង់ជួន ណារ៉ុន រដ្ឋមន្ត្រី​ក្រសួង​អប់រំ យុវជន និង​កីឡា ថ្លែង​អបអរ​ទិវា​នេះ​ថា ដើម្បី​រួមចំណែក​ក្នុង​ការស្តារ​សេដ្ឋកិច្ចជាតិ​ឡើងវិញ ក្រោយ​បរិបទ​កូវីដ​ ១៩ ប្រជាពលរដ្ឋ​គ្រប់រូប​គួរតែ​រៀនសូត្រ​បន្ត​ទាំងអស់​គ្នា​ដែល​ការសិក្សា​រៀនសូត្រ​នោះ​មិន​ត្រឹមតែ​រៀន​ពី​អក្ខរកម្ម​នោះទេ គឺ​ត្រូវ​រៀនសូត្រ​ដោយ​ចាប់យក​ជំនាញ​ ដើម្បី​ទទួល​មុខរបរ​មួយ​សមរម្យ​។ លោក​ថា ក្នុង​ពេល​បច្ចុប្បន្ន ក្រសួង​អប់រំ យុវជន និង​កីឡា​បាន​សហការ​ជាមួយ​ក្រសួង​ស្ថាប័ន​ផ្សេងៗ និង​ដៃគូ​អភិវឌ្ឍន៍​ដើម្បី បង្កលក្ខណៈ​អាច​ឱ្យ​យុវជន​កម្ពុជា​រៀនសូត្រ​បន្ត​ពេញ​មួយជីវិត ដែល​អាច​រៀនសូត្រ​ពី​កន្លែង​ណា ពេលណា​ក៏​បាន​ដើម្បី​ចាប់យក​ជំនាញ​មួយ​ដែល​អាច​ទទួល​បាន​នូវ​មុខរបរ ក៏ដូចជា​ទទួលបាន​ប្រាក់​ចំណូល​សមរម្យ​។

លោក​ថ្លែងថា​៖ «​ខ្ញុំ​សូម​អំពាវនាវ​ សូមឱ្យ​ប្រជាពលរដ្ឋ​ក៏ដូចជា​យុវជន​យើង សូម​បន្ត​សិក្សា​ពេញ​ ១ ​ជីវិត ហើយ​ទទួលបាន​អក្ខរកម្ម គ្រប់​ប្រភេទ​ទាំង​លេខ នព្វន្ត អក្សរ ក៏ដូចជា​អក្ខរកម្ម​វិជ្ជាជីវៈ ក្នុង​គោលដៅ​ធ្វើ​យ៉ាងណា​ទទួល​បាន​នូវ​ជំនាញ​ពិតប្រាកដ ក៏ដូចជា​ទទួល​បាន​នូវ​មុខរបរ​មួយ​ដែល​អាចជួយ​ឱ្យ​យុវជន​ក៏ដូចជា បងប្អូន​ប្រជាពលរដ្ឋ ចូលរួម​ចំណែក​ស្តារ​ និង​កសាង​ប្រទេសជាតិ​ឡើងវិញ​ក្រោយ​វិបត្តិ​កូវីដ​ ១៩»​។

លោក​ថា ចំពោះ​អក្ខរជន​មាន​ជំនាញ​អាជីព​មួយ​ច្បាស់លាស់ ដូចជា​ជំនាញ​ក្នុង​ការបង្ក​បង្កើនផល ការចិញ្ចឹម​សត្វ ការជួសជុល​សម្ភារ​ប្រើប្រាស់ ការចេះ​កែច្នៃ​សម្ភារ​ប្រើប្រាស់​ក្នុង​សហគមន៍ និង​លក់​ជា​វត្ថុអនុស្សាវរីយ៍​ជូន​ភ្ញៀវ​ទេសចរ​ផង​នោះ ក៏ត្រូវ​ខិតខំ​បន្ថែមទៀត​លើ​ការពង្រឹង​គុណភាព និង​ការពង្រីក​អាជីវកម្ម ដើម្បី​បង្កើន​ប្រាក់ចំណូល​ក្នុង​គ្រួសារ និង​ជួយ​លើកស្ទួយ​សេដ្ឋកិច្ច​ជាតិ​ថែម​ទៀតផង​។

ប្រការនេះ​បង្ហាញ​ថា អក្ខរកម្ម​មិន​គ្រាន់តែ​បង្រៀន​អ្នកសិក្សា​ឱ្យ​ចេះ​អាន ចេះ​សរសេរ ចេះ​និយាយ​បានល្អ​នោះទេ ថែមទាំង​បង្រៀន​អ្នកសិក្សា​ចេះ​ប្រើប្រាស់​ជំនាញ​អាជីព ដើម្បី​បង្កើន​ប្រាក់​ចំណូល​ចិញ្ចឹមជីវិត​ប្រចាំថ្ងៃ​ សម្រាប់​គ្រួសារ ព្រមទាំង​ធ្វើឱ្យ​សហគមន៍​មាន​ការរីកចម្រើន​ផងដែរ​។

លោក សាដា អ៊ូមា អាឡាម តំណាង​អង្គការ​យូណេស្កូ​ប្រចាំ​កម្ពុជា​ថ្លែងថា អក្ខរកម្ម​គឺជា​មូលដ្ឋានគ្រឹះ​នៃ​ការអភិវឌ្ឍ​ធនធាន​មនុស្ស សម្រាប់​គ្រប់​ជាតិ​សាសន៍​ទាំងអស់​។ ប្រទេស​កម្ពុជា​សម្រេច​បាន​អត្រា​អក្ខរកម្ម​ ៨៧ ​ភាគរយ ហើយ​នៅ​ឆ្នាំ ២០២២ ​នេះ កម្ពុជា​បានធ្វើ​បដិវត្តន៍​កម្មវិធី​អក្ខរកម្ម​។ ស្ត្រី​ដែល​ធ្វើការ​នៅតាម​រោងចក្រ​ប្រហែល​ជា ៨០ ភាគរយ មាន​បញ្ហា​ប្រឈម​ទៅ​នឹង​បំណិន​អាន សរសេរ និង​គិត​លេខនព្វន្ត​។

លោក​ថ្លែងថា​៖ «​ឥឡូវនេះ​យើង​ធ្វើការ​តាមរយៈ​វិស័យ​ឯកជន ជាពិសេស​ជាមួយ​និយោជក និង​ជាមួយ​សមាគម​រោងចក្រ​កាត់ដេរ នៅ​កម្ពុជា​ក្នុង​ការបើក​ថ្នាក់​អក្ខរកម្ម ដើម្បី​ផ្តល់​ឱកាស​ឱ្យ​ពួកគេ​ទទួល​បាន​ការអប់រំ​នៅនឹង​កន្លែង​ការងារ​»​។

លោក រស់ សុវាចា អ្នកនាំពាក្យ​ក្រសួង​អប់រំ យុវជន និង​កីឡា​បាន​ឱ្យ​ដឹងថា អត្រា​អក្ខរកម្មជន​ពេញវ័យ​ចាប់ពី ១៥​ ឆ្នាំ​ឡើង តាម​ការអង្កេត​សេដ្ឋកិច្ច-សង្គមកិច្ច​ឆ្នាំ ២០១៩-២០២០ បង្ហាញថា អត្រា​អក្ខរកម្មជន​ពេញវ័យ​ចាប់ពី ១៥ ​ឆ្នាំ​ឡើង​មាន ៨៧,៨ ​ភាគរយ ប្រការនេះ​បានបញ្ជាក់​ឱ្យ​ឃើញ​ពី​ការខិតខំ​ប្រឹងប្រែង​របស់​រាជរដ្ឋាភិបាល​ក្នុង​ការកាត់បន្ថយ​អនក្ខរជន តាមរយៈ ទិវា​អក្ខរកម្ម​ជាតិ​ ៨​ កញ្ញា ដែលជា​កម្លាំង​ចលករ​ជួយ​ជំរុញ​ឱ្យ​កម្មវិធី​នេះ​កាន់តែ​មាន​ប្រសិទ្ធភាព​។

លោក គួច គូលំអ ប្រធាន​នាយកដ្ឋាន​អប់រំ​ក្រៅ​ប្រព័ន្ធ​នៃ​ក្រសួង​អប់រំ យុវជន និង កីឡា ថ្លែងថា នៅ​កម្ពុជា​មាន​អនក្ខរជន ​ឬ​ជន​មិនចេះ​អក្សរ​ប្រមាណ​ជាង ១,៧ ម៉ឺន​នាក់​បាន​ចូលរៀន​ក្នុង​កម្មវិធី​បង្រៀន​អក្ខរកម្ម​របស់​ក្រសួង​អប់រំ​ជា​រៀងរាល់​ឆ្នាំ ហើយ​ក្នុង​ចំណោម​នោះ​មាន​ជាង ១,៤ ម៉ឺន​នាក់ បាន​បញ្ចប់​ការសិក្សា​ដោយ​ស្ថាពរ​។

លោក​ថ្លែងថា​៖ «​រាជរដ្ឋាភិបាល​កម្ពុជា​បាន​ប្រារព្ធ​ទិវា​អក្ខរកម្ម​ ៨​ កញ្ញា​ជា​រៀងរាល់ឆ្នាំ ដើម្បី​បំផុស​ប្រជាពលរដ្ឋ​កម្ពុជា​គ្រប់រូប​ឱ្យ​ទទួល​បាន​ឱកាស​សិក្សា​ពេញ​ ១ ​ជីវិត គ្រប់​ពេលវេលា គ្រប់​ទីកន្លែង និង​គ្រប់​មធ្យោបាយ ប្រកប​ដោយ​វិជ្ជាសម្បទា បំណិន​សម្បទា ចរិយា​សម្បទា និង​គុណសម្បទា​»​។

លោក​បន្តថា ក្រសួង​អប់រំ​យុវជន​ និង​កីឡា បាន​យកចិត្ត​ទុកដាក់​លើ​កម្មវិធី​បង្រៀន​អក្ខរកម្ម សម្រាប់​អនក្ខរជន​ទូទៅ ហើយ​បច្ចុប្បន្ន​កម្មវិធី​បង្រៀន​អក្ខរកម្ម កំពុងតែ​ពង្រឹង​បន្ថែម​នៅតាម​បណ្តា​រាជធានី ខេត្ត ក្រុង នៅ​ទូទាំង​ប្រទេស ដើម្បី​កាត់បន្ថយ​អនក្ខរជន និង​ដើម្បីឱ្យ​សិស្ស​រៀន​អក្ខរកម្ម​អាច​បន្ត​ការសិក្សា​ទៅ​ថ្នាក់មធ្យមសិក្សា ឬ​ចូល​សិក្សា​ជំនាញ​ណាមួយ​ដែល​ខ្លួន​ចង់បាន​៕