.jpg)
ខេត្តព្រះសីហនុៈ រដ្ឋបាលខេត្តព្រះសីហនុបានស្នើ លោក លោកស្រី ដែលជាម្ចាស់ ឬអ្នកគ្រប់គ្រងទីតាំង ដែលមានជនបរទេសស្នាក់នៅ និងបម្រើការងារ ត្រូវធ្វើរបាយការណ៍ស្តីពីវត្តមានជនបរទេស ដែលបានមកស្នាក់នៅ និងបម្រើការងារនៅក្នុងទីតាំង/អគារដែលខ្លួនគ្រប់គ្រងរួចផ្ញើមកប៉ុស្តិ៍នគរបាលរដ្ឋបាល ឃុំ សង្កាត់ ដែលទីតាំងអគារស្ថិតនៅឱ្យបានមុនថ្ងៃទី២៤ ខែកញ្ញា នេះ ជាកំណត់។
លិខិតចុះថ្ងៃទី៩ ខែកញ្ញា របស់រដ្ឋបាលខេត្តព្រះសីហនុ បញ្ជាក់ថា៖ «លោក លោកស្រី ដែលជាម្ចាស់ ឬ អ្នកគ្រប់គ្រងទីតាំងដែលមានជនបរទេសស្នាក់នៅ និងបម្រើការងារត្រូវធ្វើរបាយការណ៍ស្តីពីវត្តមានជនបរទេសដែលបានមកស្នាក់នៅនិងបម្រើការងារនៅក្នុងទីតាំង/អគារដែលខ្លួនគ្រប់គ្រង ដូចមានគំរូរបាយការណ៍ភ្ជាប់មកជាមួយ»។
រដ្ឋបាលខេត្តព្រះសីហនុ បានឱ្យដឹងថា ការធ្វើនេះគឺ ដើម្បីពង្រឹងសន្តិសុខ សណ្តាប់ធ្នាប់ សាធារណៈ និងការពារសន្តិសុខ សុវត្ថិភាពដល់ជនបរទេសដែលបានមកស្នាក់នៅ និងប្រកបមុខរបរ ក្នុងព្រះរាជាណាចក្រកម្ពុជា ពិសេសនៅក្នុងភូមិសាស្ត្រខេត្តព្រះសីហនុ៕
