បន្ទាយមានជ័យៈ លោក ជុំ សេដ្ឋា មេបញ្ជាការ​រង នាយសេនាធិការ កងពល​តូច​ថ្មើរ​ជើង​លេខ​៥១ បាន​ណែនាំ​កង​កម្លាំង​ត្រូវ​បន្ត​តាមដានយកចិត្ត​ទុកដាក់​ពី​ស្ថានភាព​គ្រោះ​មហន្តរាយ​ធម្មជាតិ ដូចជា​ខ្យល់​កន្រ្តាក់ ទឹកជំនន់ ឱ្យ​បាន​ជាប់​ជាប្រចាំ។

លោក​មេបញ្ជាការរង​បាន​ណែនាំ​បែប​នេះ ក្នុង​ពេល​ចុះ​ធ្វើ​ទស្សនកិច្ច​សិក្សា ការងារ​កសាង​ពង្រឹង​អង្គភាព​រឹងមាំ​លើ​គ្រប់​វិស័យ អង្គភាពការិយាល័យ​ទី​៤ និង​ការិយាល័យ​អភិវឌ្ឍន៍ ស្ថិត​នៅ​ទី​បញ្ជាការ​កងពល ភូមិ​ភ្នំ​ជញ្ជាំង ឃុំ​ជប់វារី ស្រុក​ព្រនេត្រព្រះ ខេត្ត​បន្ទាយមានជ័យ នៅ​ទី៩ ខែកញ្ញា នេះ។

លោក​ជុំ សេដ្ឋា បញ្ជាក់​ថា៖ «ត្រូវ​បន្ត​តាមដាន​យក​ចិត្ត​ទុកដាក់​ស្ថានភាព​គ្រោះ​មហន្តរាយ​ធម្មជាតិ ដូចជា​ខ្យល់​កន្រ្តាក់ ទឹកជំនន់ ឱ្យ​បានជាប់​ជា​ប្រចាំ រាយការណ៍​តាម​ឋានានុក្រម និង​ចុះ​ជួយ​ភ្លាមៗ មិនថា​យប់​ឬ​ថ្ងៃ​ធានា​បាន​នូវ​ការ​ជួយ​សង្គ្រោះ​បាន​ទាន់​ពេលវលា ជាពិសេសត្រូវ​បន្ត​អនុវត្ត​វិធានការ ៣កុំ ៣​ការពារ និង​វិធានការ​សុខាភិបាល ដើម្បី​ការពារ​ការឆ្លង​រីករាលដាល​ជំងឺ​កូវីដ១៩ ចូល​ក្នុង​អង្គភាព និង​សហគមន៍»។

ក្នុង​ឱកាស​នោះ​ដែរ​ លោក ជុំ សេដ្ឋា បាន​ដាក់​ផែនការ ឱ្យ​គ្រប់​អង្គភាព​បន្ត​ខិតខំ​ការងារ​កសាង​ហេដ្ឋារចនា​សម្ព័ន្ធ ការងារ​បង្កបង្កើន​ផល និង​ចិញ្ចឹម​សត្វ បន្ថែម​លើ​គោល​របប​ហូប​ប្រចាំថ្ងៃ សម្រាប់​កម្លាំង​ជួរមុខ និង​កម្លាំង​ត្រៀម​ក្នុង​ទីតាំង ក៏​ដូចជា គ្រួសារ​យោធិន​ក្នុង​អង្គភាព និង​មួយ​ចំនួន​លើស​តម្រូវការ លក់​ទៅ​ទីផ្សារ សន្សំ​ថវិកា កសាង​ក្នុង​អង្គភាព​នីមួយៗ។

លោក​មេបញ្ជាការរង​កងពល ក៏​បាន​ថ្លែង​កោត​សរសើរ​ដល់​អង្គភាព​ទាំង​២ ដែល​បាន​ខិតខំ​យកចិត្ត​ទុកដាក់​អនុវត្ត​តាម​ផែនការ​ដែល​ថ្នាក់​លើប្រគល់​ជូន និង​អនុវត្ត​តួនាទី​ភារកិច្ច ប្រកប​ដោយ​ការ​ទទួល​ខុស​ត្រូវ​ខ្ពស់ តាម​ផែនការ កសាង​អង្គភាព​រឹងមាំ​លើ​គ្រប់​វិស័យ៕