លោក ឡុង ឌីម៉ង់ អភិបាលរងខេត្តព្រះសីហនុបានស្នើសុំកិច្ចសហការណ៍ពីរដ្ឋបាលក្រុងកោះរ៉ុង និងមន្ទីរសុខាភិបាលខេត្ត ដើម្បីចាប់ផ្តើមចុះពិនិត្យព្យាបាលជំងឺដោយឥតគិតថ្លៃឡើងវិញជូនប្រជាពលរដ្ឋនៅក្រុងកោះរ៉ុង សម្រាប់ឆ្នាំ ២០២២ ដែលនឹងចាប់ផ្តើមពីថ្ងៃទី ១០ ដល់ ទី ១៦ ខែកញ្ញា ឆ្នាំ ២០២២ នេះ។ រូបភាព រដ្ឋបាលខេត្តព្រះសីហនុ
ព្រះសីហនុៈ លោក ឡុង ឌីម៉ង់ អភិបាលរងខេត្តព្រះសីហនុបានស្នើសុំកិច្ចសហការណ៍ពីរដ្ឋបាលក្រុងកោះរ៉ុង និងមន្ទីរសុខាភិបាលខេត្ត ដើម្បីចាប់ផ្តើមចុះពិនិត្យព្យាបាលជំងឺដោយឥតគិតថ្លៃឡើងវិញជូនប្រជាពលរដ្ឋនៅក្រុងកោះរ៉ុង សម្រាប់ឆ្នាំ ២០២២ ដែលនឹងចាប់ផ្តើមពីថ្ងៃទី ១០ ដល់ ទី ១៦ ខែកញ្ញា ឆ្នាំ ២០២២ នេះ។
ការស្នើសុំរបស់អភិបាលរងខេត្តព្រះសីហនុរូបនេះ ធ្វើឡើងនារសៀលថ្ងៃទី ៩ ខែកញ្ញា គ្រាដែលលោកបានទទួលជួបសម្ដែងការគួរសមជាមួយលោក យស ផានីត្តា លោក សាយ ឈុំ ប្រធានព្រឹទ្ធសភាកម្ពុជា និងលោកស្រី ខាឡា ចូ ប្រិនធិស តំណាងអង្គការសង្គ្រោះវេជ្ជសាស្ត្រអន្តរជាតិ នៅសាលប្រជុំគណៈអភិបាលខេត្ត។
លោកថ្លែងថា៖ «នេះជាមោទនភាព សម្រាប់ប្រជាពលរដ្ឋតំបន់កោះនៃខេត្តព្រះសីហនុយើង ព្រោះនាពេលបច្ចុប្បន្ន តំបន់កោះនៅមិនទាន់មានគ្រូពេទ្យជំនាញនៅឡើយ ដូច្នេះពេលប្រជាពលរដ្ឋមានបញ្ហាសុខភាពធ្ងន់ធ្ងរ ត្រូវបញ្ជូនមកព្យាបាលនៅដីគោក ហើយការធ្វើដំណើរតាមផ្លូវទឹកទៀតសោត គឺមានភាពពិបាក ពិសេសរដូវវស្សានេះតែម្តង»។
ក្នុងឱកាសនោះលោកអភិបាលរងខេត្តបានថ្លែងការកោតសរសើរ និងអរគុណដល់ក្រុមការងារអង្គការសង្គ្រោះវេជ្ជសាស្ត្រអន្តរជាតិ ដែលបានបំពេញបេសកកម្មមនុស្សធម៌នៅក្រុងកោះរ៉ុងកន្លងមក។ បន្ថែមលើនោះលោកក៏បានសម្តែងការគាំទ្រថែមទៀតឱ្យរដ្ឋបាលក្រុងកោះរ៉ុង និងមន្ទីរសុខាភិបាលខេត្តផ្តល់កិច្ចសហការជាមួយអង្គការសង្គ្រោះវេជ្ជសាស្ត្រអន្តរជាតិ ក្នុងការចុះទៅពិនិត្យ និងព្យាបាលជំងឺជូនប្រជាពលរដ្ឋដោយឥតគិតថ្លៃ ដើម្បីជាការរួមចំណែកក្នុងការលើកកម្ពស់សុខភាពសាធារណៈ ក៏ដូចជាការចូលរួមសកម្មភាពមនុស្សធម៌ សម្រាប់ប្រជាជនកម្ពុជាផងដែរ។
សូមជម្រាបថា ជំនួបនេះមានការចូលរួមពីលោក នួន ប៊ុនថុល អភិបាលក្រុងកោះរ៉ុង លោក ឈិត រតនៈ នាយករងរដ្ឋបាល លោកស្រី មិន សុគន្ធា អនុប្រធានមន្ទីរសុខាភិបាលខេត្ត ដើម្បីស្តាប់របាយការណ៍ស្តីពីការចុះបេសកកម្មពិនិត្យព្យាបាលជំងឺដោយឥតគិតថ្លៃជូនប្រជាពលរដ្ឋនៅក្រុងកោះរ៉ុង ដែលក្រុមការងាររបស់អង្គការសង្គ្រោះវេជ្ជសាស្ត្រអន្តរជាតិ ធ្លាប់បានធ្វើសកម្មភាពពិនិត្យ និងព្យាបាលតាំងពីឆ្នាំ ២០១៣ មក តែត្រូវបានផ្អាកមួយរយៈ ដោយសារផលរំខាននៃជំងឺកូវីដ ១៩៕
.jpg)
