កោះកុងៈ រដ្ឋបាលខេត្តកោះកុងបានប្រកាសជាសាធារណៈនៅថ្ងៃទី ១០ ខែកញ្ញានេះ ដើម្បីសុំអធ្យាស្រ័យទៅដល់អ្នកធ្វើដំណើរទាំងអស់ដែលចេញចូលខេត្តកោះកុង ប្រើប្រាស់ផ្លូវលេខ ៤៨ ជួបការលំបាក ព្រោះផ្លូវនេះក្រុមហ៊ុនកំពុងសាងសង់លើកកម្រិតគុណភាពផ្លូវ។
តាមរយៈហ្វេសប៊ុករដ្ឋបាលខេត្តកោះកុងបញ្ជាក់ថា៖ «ដោយសាររដូវវស្សាមានភ្លៀងធ្លាក់ច្រើន ហើយក្រុមហ៊ុនកំពុងសាងសង់លើកកម្រិតគុណភាពផ្លូវជាតិលេខ ៤៨ ធ្វើឱ្យផ្លូវមានការខូចខាតច្រើន ពិបាកធ្វើដំណើរ។ អាស្រ័យហេតុនេះ រដ្ឋបាលខេត្តកោះកុង សូមអធ្យាស្រ័យ អភ័យទោស ចំពោះអ្នកធ្វើដំណើរទាំងអស់ ដែលមានការពិបាកធ្វើដំណើរចេញ ចូល ខេត្តកោះកុង»៕