.jpg)
ក្រុមក្មេងទំនើងដែលត្រូវបានសមត្ថកិច្ចចាប់ឃាត់ខ្លួនកាលពីថ្ងៃទី១០កញ្ញា។ រូបថត នគរបាល
បន្ទាយមានជ័យៈ កម្លាំងនៃអធិការដ្ឋាននគរបាលក្រុងប៉ោយប៉ែត នៅថ្ងៃទី ១១ កញ្ញា កំពុងបន្តធ្វើការសាកសួរក្រុមក្មេងទំនើងចំនួន ១៣ នាក់ បន្ទាប់ពីចាប់ខ្លួនបានកាលពីយប់ថ្ងៃទី ១០ កញ្ញា ពាក់ព័ន្ធករណីលួច និងកាប់ប្លន់យកទ្រព្យសម្បត្តិអ្នកដទៃ។
លោក សៅ សារឿន អធិការនគរបាលក្រុងប៉ោយប៉ែត បានប្រាប់ ភ្នំពេញ ប៉ុស្តិ៍ថា ការចុះល្បាតស្រាវជ្រាវនិងបង្ក្រាបក្រុមក្មេងទំនើងទាំងនេះ ក្រុមកម្លាំងសមត្ថកិច្ចបានដាក់ពង្រាយកម្លាំងពួនស្ទាក់នៅតាមចំណុចផ្លូវសំខាន់ៗមួយចំនួននៅទូទាំងក្រុងប៉ោយប៉ែត ជាពិសេសក្នុងភូមិសាស្ត្រដែលមានសេចក្ដីរាយការណ៍ និងពាក្យបណ្ដឹងពីពលរដ្ឋរងគ្រោះ អំពីករណីក្រុមក្មេងទំនើងជិះម៉ូតូតាមកាប់ប្លន់យកម៉ូតូ និងទ្រព្យសម្បត្តិ។
លោកបានបញ្ជាក់ថា៖ «តាមរយៈបណ្ដឹងរបស់ជនរងគ្រោះ កម្លាំងសមត្ថកិច្ចយើងបានបើកប្រតិបត្តិការល្បាតស្រាវជ្រាវ និងពួនស្ទាក់ ដោយដាក់ពង្រាយកម្លាំងគ្រប់ច្រកល្ហក នៅតាមបណ្ដាផ្លូវដែលតែងតែកើតមានបទល្មើស»។
លុះដល់ព្រលប់ថ្ងៃទី ១០ ខែ កញ្ញា ឆ្នាំ ២០២២ កម្លាំងសមត្ថកិច្ច ក៏បានប្រទះឃើញក្រុមក្មេងទំនើងទាំងនោះជិះម៉ូតូចេញធ្វើសកម្មភាពទាំងហ្វូង ដោយមានកាំបិទវែងខ្លីស្ទើរគ្រប់ដៃ ទើបសមត្ថកិច្ចធ្វើការបង្ក្រាបតែម្ដង ដោយចាប់បានចំនួន ១៣ នាក់។
បើតាមលោក សារឿន នៅពេលនេះ ក្រុមជនសង្ស័យទាំង ១៣ នាក់ កំពុងត្រូវបានក្រុមមន្ត្រីនគរបាលយុត្តិធម៌នៃអធិការដ្ឋាននគរបាលក្រុងប៉ោយប៉ែត ធ្វើការសាកសួរជុំវិញសកម្មភាពបទល្មើសរបស់ពួកគេ ដើម្បីកសាងសំណុំរឿងបញ្ជូនទៅតុលាការចាត់វិធានការបន្តតាមនីតិវិធីច្បាប់ ។
ក្នុងអំឡុងពេលនៃការសួរចម្លើយ នៅព្រឹកថ្ងៃទី ១១ ខែកញ្ញា ជនសង្ស័យម្នាក់ ឈ្មោះ ឃុន សុខហេង អាយុ ១៦ ឆ្នាំ មានលំនៅភូមិក្បាលស្ពាន ១ សង្កាត់អូរជ្រៅ ក្រុងប៉ោយប៉ែត បានសារភាពថា កាលពីយប់ថ្ងៃទី ៥ ខែកញ្ញា ខ្លួននិងបក្ខពួក មានគ្នា ៨ នាក់ បានធ្វើសកម្មភាពជិះម៉ូតូដេញកាប់ប្លន់យកម៉ូតូ ១ គ្រឿង (C125) ពីជនរងគ្រោះ ២ នាក់ នៅភូមិដុងអារ័ញ្ញសង្កាត់និមិ្មត ក្រុងប៉ោយប៉ែត។ នេះបើតាមលោក ម៉ា រីន នាយនគរបាលប៉ុស្តិ៍និមិ្មត។
លោក មារីន បាននិយាយថា៖«តាមចម្លើយសារភាពរបស់ជនសង្ស័យ ឈ្មោះ ឃុន សុខហេង ម៉ូតូរបស់ជនរងគ្រោះ ដែលពួកគេកាប់ប្លន់បាននោះ ត្រូវពួកគេលក់បានតម្លៃ ១ ២៥០ ដុល្លារ។ បច្ចុប្បន្ន លុយទាំងនោះ ពួកគេបានយកមកផឹកស៊ី ចូលបារ៍ខារាអូខេអស់ទៅហើយ»។
យោងតាមរបាយការណ៍សមត្តកិច្ចនគរបាលក្រុងប៉ោយប៉ែត ក្រុមក្មេងទំនើងដែលធ្វើសកម្មភាព ជិះម៉ូតូដេញកាប់ប្លន់យកទ្រព្យសម្បត្តិពីប្រជាពលរដ្ឋនៅតាមដងផ្លូវនាពេលយប់ មាន ២ ក្រុម។ ក្រុម ១ ដឹកនាំដោយឈ្មោះ ឃុន សុខហេង មានគ្នា ៨ នាក់ ក្រុមនេះតែងប្រើប្រាស់កាំបិទផ្គាក់ដងវែង និងធ្វើសកម្មភាពតែនៅពេលយប់ និងនៅតែក្នុងតំបន់ភូមិសាស្ត្រសង្កាត់និមិ្មតតែប៉ុណ្ណោះ។
ចំណែក ១ ក្រុមទៀត ដឹកនាំដោយឈ្មោះ ហេង លីហ៊ាង អាយុ ១៦ ឆ្នាំ មានលំនៅភូមិសាមគ្គីមានជ័យ សង្កាត់អូរជ្រៅ ក្រុងប៉ោយប៉ែត។
ក្រុមនេះមានគ្នា ៥ នាក់ ជាក្រុមសកម្មនិងសាហាវ ដែលតែងតែធ្វើសកម្មភាពជិះម៉ូតូឆក់កាបូបនៅពេលថ្ងៃ និងធាក់ផ្ដួលម៉ូតូ ព្រមទាំងកាប់ប្លន់យកម៉ូតូពីអ្នកធ្វើដំណើរតាមដងផ្លូវសាធារណៈនៅពេលយប់ ក្នុងភូមិសាស្ត្រក្រុងប៉ោយប៉ែត ហើយពេលខ្លះក្រុមនេះ បានធ្វើសកម្មភាពដល់ភូមិសាស្ត្រស្រុកម៉ាឡៃ និងស្រុកអូរជ្រៅ។ អាវុធដែលក្រុមនេះប្រើ គឺកាំបិតស្នៀតនិងដាវសាំមូរ៉ៃ៕
