កញ្ញា សេង ធារី នៅខាងមុខសាលាដំបូងរាជធានីភ្នំពេញ កាលពីខែមករា ឆ្នាំ ២០២១។ រូបថត ហ្វេសប៊ុក
ភ្នំពេញៈ លោក ជូង ជូងី មេធាវីការពារក្ដី ឱ្យកញ្ញា សេង ធារី នៅថ្ងៃទី ១១ កញ្ញា បានលើកឡើងថា សហរដ្ឋអាមេរិក និងសង្គមស៊ីវិល នៅក្នុងស្រុក អាចជួយកញ្ញា សេង ធារី ឱ្យមានសេរីឡើងវិញបាន និងការចរចាផ្នែកនយោបាយក៏ជាច្រកមួយសំខាន់ដែរ។ ប៉ុន្តែអ្នកនាំពាក្យក្រសួងយុត្តិធម៌បានគូសបញ្ជាក់ថា បញ្ហាសញ្ជាតិមិនអាចយកមកធ្វើការដោះដូរជាមួយបញ្ហាផ្លូវច្បាប់បានទេ។
លោក ជូង ជូងី បានលើកឡើងយ៉ាងដូច្នេះ បន្ទាប់ពីបណ្ដឹងសារទុក្ខប្រឆាំងនឹងសេចក្ដីសម្រេច របស់សាលាឧទ្ធរណ៍ នៅថ្ងៃទី ០១ កញ្ញា សម្រេចមិនដោះលែងកញ្ញា សេង ធារី ឱ្យនៅក្រៅឃុំបណ្តោះអាសន្នបានទៅដល់ដៃតុលាការកំពូល។
លោកថា៖ «កញ្ញា សេង ធារី មានសញ្ជាតិអាមេរិកស្រាប់។ អ៊ីចឹងសហរដ្ឋអាមេរិកមានលទ្ធភាពអាចជួយគាត់បាន។ តាំងពីគាត់ត្រូវបានឃុំខ្លួនខ្ញុំធ្លាប់ទៅស្ថានទូតអាមេរិក នៅទីក្រុងភ្នំពេញបានម្ដង ហើយបន្តបន្ទាប់មកទៀត ខ្ញុំតែងតែទាក់ទងជាប់ជានិច្ចជាមួយក្រុមការងារស្ថានទូត។ រីឯសង្គមស៊ីវិលនៅក្នុងស្រុកក៏អាចជួយកញ្ញា សេង ធារី បានដែរតាមរយៈការតស៊ូមតិនានា»។
លោក ហ៊ុន វណ្ណៈ សមាជិកក្រុមយុវជនខ្មែរថាវរៈ ដែលធ្លាប់ធ្វើសកម្មភាពទាមទារឱ្យមានការដោះលែងកញ្ញា សេង ធារី អះអាងថា កន្លងមកសមត្ថកិច្ចខេត្តព្រះវិហារ បានដាក់របាំងរារាំងពួកគេ និងក្រុមស្រ្តីថ្ងៃសុក្រ មិនឱ្យធ្វើដំណើរទៅកាន់មុខពន្ធនាគារខេត្តព្រះវិហារ ដើម្បីបង្ហោះប៉ោងប៉ោងលើកទឹកចិត្តកញ្ញាសេង ធារីដែលជាប់ឃុំនៅទីនោះឡើយ។
លោកថា៖ «សកម្មភាពរបស់ពួកយើងតិចក្ដីច្រើនក្ដីខ្ញុំជឿថា នឹងមានការចាប់អារម្មណ៍ពីមហាជន ដែលមួយផ្នែកអាចចូលរួមជួយជំរុញឱ្យមានការដោះលែងកញ្ញា សេង ធាវី បានឆាប់ ប្រសើរជាងយើងមិនបានធ្វើអ្វីសោះ»។
កាលពីថ្ងៃទី ១៤ មិថុនា កន្លងមក ក្រសួងការបរទេសអាមេរិក បានអំពាវនាវឱ្យមានការដោះលែងកញ្ញា សេង ធារី ដោយបានចាត់ទុកសកម្មភាពធ្វើការចោទប្រកាន់និងឃុំខ្លួនកញ្ញា សេង ធារី ថា ធ្វើឱ្យប៉ះពាល់ដល់លទ្ធិប្រជាធិបតេយ្យ សេរីពហុបក្ស និងនីតិរដ្ឋនៅកម្ពុជា ហើយថា ប្រជាជនកម្ពុជាទាំងអស់ គួរតែអាចអនុវត្តសិទ្ធិបញ្ចេញទស្សនៈដោយសេរី ការប្រមូលផ្តុំដោយសន្តិវិធី និងអាចប្រើប្រាស់សិទ្ធិជ្រើសរើសមេដឹកនាំ។
ពាក់ព័ន្ធនឹងបញ្ហានេះ លោក ជិន ម៉ាលីន អ្នកនាំពាក្យក្រសួងយុត្តិធម៌ បានគូសបញ្ជាក់ថា បញ្ហាសញ្ជាតិមិនអាចយកមកធ្វើជាថ្នូរ នឹងការដោះលែងឱ្យមានសេរីភាព ចំពោះជនណាម្នាក់ ដែលប្រព្រឹត្តល្មើសច្បាប់បានទេ។
លោក ជិន ម៉ាលីន បញ្ជាក់ថា៖ «បញ្ហារបស់កញ្ញា សេង ធារី ជាបញ្ហាផ្លូវច្បាប់។ មិនថា គាត់ជាសកម្មជន ឬសញ្ជាតិផ្សេង ក៏ដោយ ឱ្យតែបទល្មើសប្រព្រឹត្តនៅកម្ពុជាគឺដំណើរការនីតិវិធីត្រូវធ្វើតាមច្បាប់ខ្មែរ។ អ៊ីចឹងភាគីណាក៏ដោយមិនថា អង្គការឬសហរដ្ឋអាមេរិកបើចង់ជួយគាត់ត្រូវចូលរួមដំណើរការនីតិវិធីរបស់តុលាការកម្ពុជា»។
លោកមេធាវី ជូង ជូងី បានឱ្យដឹងថា បន្ទាប់ពីសេចក្ដីសម្រេចរបស់សាលាឧទ្ធរណ៍ចូលជាធរមានកាលពីថ្ងៃទី ១ កញ្ញា លោកបានធ្វើដំណើរទៅជួបកញ្ញា សេង ធារី នៅពន្ធនាគារខេត្តព្រះវិហារកាលពីថ្ងៃទី ៦ កញ្ញា និងបានជម្រាបប្រាប់កញ្ញា ពីដំណើរការ របស់តុលាការនៅភ្នំពេញ។
លោកបន្ថែមថា៖ «ស្ថានភាពសុខភាពរបស់កញ្ញាធម្មតា ហើយឆន្ទៈរបស់គាត់ នៅតែមុតមាំដដែល ក្នុងការតស៊ូមតិដើម្បីឱ្យមានលំហរសេរីភាពនិងប្រជាធិបតេយ្យនៅកម្ពុជា»។
កញ្ញា សេង ធារី ត្រូវបានសមត្ថកិច្ចចាប់ខ្លួននៅមុខសាលាដំបូងរាជធានីភ្នំពេញ និងបានដឹកយកទៅឃុំខ្លួននៅពន្ធនាគារព្រៃសភ្លាមៗ កាលពីថ្ងៃទី ១៤ ខែ មិថុនា ឆ្នាំ ២០២២ បន្ទាប់ពីតុលាការចេញសាលក្រមផ្ដន្ទាទោស កញ្ញាឱ្យជាប់ពន្ធនាគារ ៦ ឆ្នាំ ក្នុងសំណុំរឿងរួមគំនិតក្បត់ពាក់ព័ន្ធនឹងគម្រោងធ្វើមាតុភូមិនិវត្តន៍របស់លោកសម រង្ស៊ី ៩ វិច្ឆិកា។ កញ្ញា សេង ធារី ត្រូវបានបញ្ចូនពីភ្នំពេញ ទៅឃុំខ្លួននៅពន្ធនាគារខេត្តព្រះវិហារ កាលពីថ្ងៃទី ១៥ ខែ មិថុនា ឆ្នាំ ២០២២ ក្រោមហេតុផលបារម្ភពីបញ្ហាសន្តិសុខសណ្តាប់ធ្នាប់៕
