.jpg)
ក្រុមអ្នកស្ម័គ្រចិត្តដើររើសសំរាមតាមមាត់ទន្លេ។ រូបថត ROC page
ភ្នំពេញៈ ក្រសួងបរិស្ថាន និងអង្គការសង្គមស៊ីវិល នឹងរួមគ្នាប្រារព្វទិវាសម្អាតភពផែនដី ឬ World Cleanup Day នាថ្ងៃ ១៧ ខែកញ្ញាខាងមុខ ដោយរំពឹងថា ទិវានេះ គឺជាសារមួយដើម្បីរំឭកដល់ពលរដ្ឋឱ្យមានការយកចិត្តទុកដាក់ពីបញ្ហាសំរាម ដែលកំពុងបង្កផលប៉ះពាល់ដល់ភពផែនដី។
លោក នេត្រ ភក្ត្រា អ្នកនាំពាក្យក្រសួងបរិស្ថាន បានប្រាប់ ភ្នំពេញ ប៉ុស្តិ៍ នៅថ្ងៃទី ១២ ខែកញ្ញាថា កម្ពុជាបានចូលរួមប្រារព្វទិវាសម្អាតភពផែនដីនេះជារៀងរាល់ឆ្នាំនៅថ្ងៃទី ១៧ ខែកញ្ញា ចាប់តាំងពីឆ្នាំ ២០១៨ មកម៉្លេះ ព្រោះទិវានេះ គឺជានិមិត្តរូបនៃការចូលរួមសម្អាតភពផែនដី។ លោកបន្តថា ការចួលរួមប្រាព្វទិវានេះជាមួយពិភពលោក គឺដើម្បីរំឭកឱ្យពលរដ្ឋចាំបាច់ត្រូវចូលរួមសម្អាតអនាម័យបរិស្ថាន និងបង្កើនការយកចិត្តទុកដាក់បន្ថែមទៀត។
លោកបន្តថា៖ «ការសម្អាតភពផែនដី សម្អាតបរិស្ថាន និងទីក្រុងអីហ្នឹង គឺយើងបានធ្វើឡើងជាប្រចាំ (រៀងរាល់ថ្ងៃ)។ គ្រាន់តែការកំណត់យកថ្ងៃទី ១៧ ខែកញ្ញា ជាទិវាសម្អាតភពផែនដី ដើម្បីបង្កើនការយកចិត្តទុកដាក់ និងចូលរួមបន្ថែមទៀត។ (ទិវានេះ) ក៏រំឭកឱ្យពលរដ្ឋចាំបាច់ត្រូវចូលរួមសម្អាតអនាម័យបរិស្ថាន ដើម្បីធ្វើឱ្យភពផែនដីយើងស្អាត និងមានផាសុកភាពក្នុងការរស់នៅ»។
តាមការប្រកាសរបស់អង្គការសម្អាតទន្លេសមុទ្រ បានឱ្យដឹងថា ការជួបជុំប្រារព្វទិវាសម្អាតភពផែនដី នឹងត្រូវធ្វើឡើងនៅតាមតំបន់គោលដៅនីមួយៗទូទាំងប្រទេស ខណៈរាជធានីភ្នំពេញ នឹងមានការជួបជុំគ្នាចាប់ពីម៉ោង ៧ ដល់ម៉ោង ១១ ព្រឹក នៅតំបន់ជ្រោយចង្វារ ជិតសណ្ឋាគារសុខាភ្នំពេញ។
ទិវាសម្អាតភពផែនដី ឬ World Cleanup Day គឺជាទិវាមួយដែលត្រូវបានប្រទេសក្នុងពិភពលោក ១៨០ ប្រទេស រួមគ្នាប្រារព្វធ្វើឡើងក្នុងថ្ងៃតែមួយ ដើម្បីចូលរួមសកម្មភាពនៃការសម្អាតភពផែនដី ហើយវាត្រូវបានបង្កើតឡើងជាលើកដំបូងកាលពីឆ្នាំ ២០១៨ ដោយអង្គការ LET’S DO IT WORLD ដែលមានទីតាំងនៅប្រទេសអេស្តូនី (Estonia)។
កញ្ញា ភាព ច័ន្ទជាលីន ជំនួយការផ្នែកទីផ្សារ និងប្រព័ន្ធផ្សព្វផ្សាយសង្គមនៃអង្គការសម្អាតទន្លេសមុទ្រប្រាប់ ភ្នំពេញ ប៉ុស្តិ៍ នៅថ្ងៃទី ១២ ខែកញ្ញាថា ការជួបជុំគ្នាក្នុងពេលខាងមុខ នឹងមានមន្ត្រីរដ្ឋាភិបាល វិស័យឯកជន ប្រជាពលរដ្ឋ អ្នកស្ម័គ្រចិត្ត និងអង្គការសង្គមស៊ីវិលនានាចូលរួម នឹងធ្វើឡើងដោយសេរី ដើម្បីរួមគ្នាសម្អាតបរិស្ថាននៅក្នុងប្រទេស។
កញ្ញាថ្លែងដោយរំពឹងដែរថា ការជួបជុំគ្នាក្នុងទ្រង់ទ្រាយធំឆ្នាំនោះ នឹងជាសារមួយ ដើម្បីបង្ហាញទៅដល់ប្រជាពលរដ្ឋទូទៅកុំឱ្យបោះចោលសំរាមតាមទីសាធារណៈផ្តេសផ្តាស និងងាកមកស្រឡាញ់ថែរក្សាបរិស្ថានទាំងអស់គ្នា ហើយការចូលរួមសម្អាត គឺមិនមែនធ្វើឡើងតែ១ថ្ងៃនេះនោះទេ គឺមានបំណងជំរុញឱ្យពលរដ្ឋរួមគ្នាសម្អាតរាល់ថ្ងៃ។
កញ្ញា ភាព ច័ន្ទជាលីន បានបញ្ជាក់ថា៖ «សម្រាប់សារអំពាវនាវទៅកាន់ប្រជាពលរដ្ឋយើងទាំងអស់គ្នា នៅក្នុងកម្មវិធីទិវាសម្អាតភពផែនដីនេះ គឺយើងសង្ឃឹងថា នឹងមានការចូលរួមយ៉ាងច្រើនកុះករ មិនថាពីសំណាក់មជ្ឈដ្ឋានណាទេ គឺយើងចូលរួមចំណែកទាំងអស់គ្នា ជាពិសេសបងប្អូនប្រជាពលរដ្ឋ សិស្សានុសិស្ស យុវជន ចូលរួមសម្អាតក្នុងថ្ងៃនោះ។ កាលណាយើងចូលរួមទាំងអស់គ្នា ធ្វើការរួមគ្នា នោះអ្វីក៏ដោយក៏យើងអាចធ្វើវាបាន និងទទួលបានផល»។
យោងតាមរបាយការណ៍របស់អង្គការ UNESCO បានបង្ហាញថា សត្វសមុទ្រប្រមាណ ១ លានក្បាល ដែលក្នុងនោះរួមមាន ថនិកសត្វ ត្រីចម្រុះនានា ត្រីឆ្លាម សត្វអណ្តើក និងបក្សី ត្រូវបានបាត់បង់ជីវិតជារៀងរាល់ឆ្នាំ ក្រោយការលេប ឬត្រួវបានហ៊ុមព័ទ្ធដោយសំរាមប្លាស្ទិកលើផ្ទៃ និងក្នុងសមុទ្រផ្ទាល់។
ប្លាស្ទិកត្រូវបានអះអាងថា ជាវត្ថុធាតុ ដែលមិនរលាយទៅក្នុងដីងាយៗក្នុងរយៈពេលខ្លីនោះទេ ហើយស្ទើរគ្រប់ប្លាស្ទិកដែលបានផលិតទាំងប៉ុន្មានកន្លងមក នៅតែមានវត្តមាននៅលើពិភពលោកយើងដដែល ដោយគ្រាន់តែវាមិនស្ថិតនៅក្នុងទម្រង់ និងកន្លែងដើមទាំងស្រុងនោះទេ ព្រោះតាមរយៈខ្យល់ ជាពិសេសភ្លៀង បានពាំនាំប្លាស្ទិកទាំងនោះ ពីកន្លែងដែលមនុស្សបោះចោល ចូលទៅក្នុងសមុទ្រ ឬទន្លេនានា។ នេះបើតាមការអះអាងរបស់អង្គការទាំងនោះ៕
