​ភ្នំពេញៈ មន្ត្រី​នៃ​គណៈកម្មាធិការ​ជាតិ​រៀបចំ​ការបោះឆ្នោត (​គជប​) បាន​អះអាង​កាលពី​ម្សិលមិញ​ថា ការជ្រើសរើស​មន្ត្រី​បម្រើឱ្យ​ដំណើរការ​បោះឆ្នោត​ឆ្នាំ​ ២០២៣ បាន​ប្រព្រឹត្ត​ដោយ​ត្រឹមត្រូវ​តាមច្បាប់ ដោយ​ច្រានចោល​សំណើ​របស់​គណបក្សនយោបាយ​ចំនួន ​៤ ដែល​បាន​សុំឱ្យ​ការ​ជ្រើស​រើសមន្ត្រី​ទាំងនោះ​មាន​ភាពត្រឹមត្រូវ មិន​លម្អៀង​ទៅខាង​គណបក្សកាន់អំណាច​។​

ការបដិសេធ​នេះ ធ្វើឡើង​បន្ទាប់ពី គណបក្ស​ក្រៅ​រដ្ឋាភិបាល​មួយចំនួន​ចំនួន ៤ ស្នើឱ្យ​ គជប​ កុំជ្រើសរើស​មន្ត្រី​នៅតាម​លេខាធិការដ្ឋាន​រាជធានី​-​ខេត្ត​រៀបចំ​ការបោះឆ្នោត និងមន្ត្រី​បោះឆ្នោត​នៅតាម​ឃុំ​-​សង្កាត់ ដែល​បាន​ជាប់​ពាក់ព័ន្ធ​នឹង​គណបក្ស​។​

លោក ហង្ស ពុទ្ធា អ្នកនាំពាក្យ​ គជប ប្រាប់ ​ភ្នំពេញ ​ប៉ុស្តិ៍​ នៅ​ថ្ងៃទី​ ១២ ខែកញ្ញា​ថា គជប បាន​ធ្វើតាម​នីតិវិធី​នៃ​ការចាត់ចែង​ក្នុងការ​ជ្រើសរើស​ធនធាន​មនុស្ស​ដែល​បម្រើឱ្យ​សេវាកម្ម​បោះឆ្នោត មាន​ភាព​លម្អិត ដោយមាន​ការទទួលខុសត្រូវ​ចំពោះមុខ​ច្បាប់​។

លោក ពុទ្ធា ថ្លែងថា​៖ «​ការចោទប្រកាន់ គជប ថា ជ្រើសរើស​មន្ត្រី គជប មកពី​គណបក្សកាន់អំណាច​មិន​ត្រឹមត្រូវ និង​មិនដឹងថា ពួកគាត់ (​គណបក្សនយោបាយ​ទាំង ​៤ ​នោះ​)​ ផ្អែកលើ​មូលដ្ឋាន​អ្វីខ្លះ​នោះទេ​»​។​

លោក​បន្តថា ចំពោះ​ការប្រើប្រាស់​អារម្មណ៍​ផ្ទាល់ខ្លួន​ថា ​សំណើរ​របស់ខ្លួន​ត្រូវតែ​ធ្វើតាម​នោះ គឺ​មិន​ត្រឹមត្រូវ​នោះទេ ព្រោះការប្រកាស​ជ្រើសរើស​មន្ត្រី​បោះឆ្នោតរបស់ គជប ត្រូវបានធ្វើ​ឡើងជា​សាធារណៈ ដោយ​មិនបាន​សង្កត់ធ្ងន់​ទៅលើ​គណបក្ស​ណាមួយ​នោះទេ​។

លោក​ថ្លែងថា​៖ «​មួយវិញទៀត អ្នកណា​ក៏ដោយ មកពីណា​ក៏ដោយ ឱ្យតែ​ចូល​បម្រើ​ជា​មន្ត្រី​បោះឆ្នោត​របស់ គជប ទី​១ ទទួលបាន​កា​រប​ណ្តុះ​បណ្តាល ទី​២ អនុវត្ត​ទៅតាម​បទបញ្ជា និង​នីតិវិធីដែល គជប មានដូចជា​រទេះភ្លើង​ដែល​លើកដាក់​លើផ្លូវ​ដែករត់​ទៅតាម​ផ្លូវដែក​នោះ​»។​

លោក ហង្ស ពុទ្ធា ថ្លែងថា គជប ត្រៀម​ជ្រើសរើស​មន្ត្រី​ជាប់កិច្ចសន្យា​រយៈពេល​ខ្លី ជិត ៧​ ពាន់​នាក់ សម្រាប់​ដំណើរការការពិនិត្យ​ឈ្មោះ និង​ចុះឈ្មោះ​បោះឆ្នោត​។

លោក សុន ឆ័យ អនុប្រធាន​គណបក្ស​ភ្លើងទៀន ប្រាប់​ ភ្នំពេញ​ ប៉ុស្តិ៍​ កាលពី​ថ្ងៃទី​ ១១ ខែកញ្ញា​ថា គណបក្ស​ភ្លើងទៀន​នឹង​ទទួលលទ្ធផល​ល្អ​ពី​ការបោះឆ្នោត បើសិនជា គជប ជ្រើសរើស​មន្ត្រី ជាពិសេស​នៅតាម​រាជធានី​-​ខេត្ត មិន​ជាប់ពាក់​ព័ន្ធ​នឹង​គណបក្សនយោបាយ​ជាពិសេស​គណបក្សកាន់អំណាច​។

លោក​ថ្លែងថា​៖ «គជប ដាក់​មន្ត្រីឱ្យ​ល្អ​បន្តិច​ទៅយើង​សង្ឃឹមថា នឹង​ទទួលបាន​ជោគជ័យ​»​។​

គណបក្ស​ប្រជាធិបតេយ្យ​មូលដ្ឋាន គណបក្ស​ភ្លើងទៀន គណបក្ស​កែទម្រង់​កម្ពុ​ជា និង​​គណបក្ស​ឆន្ទៈ​ខ្មែរ បានដាក់​សំណើ​ទៅ គជប កាលពី​ខែសីហា ឆ្នាំ​ ២០២២ ដើម្បី ឱ្យ​ស្ថាប័ន​នេះ ធានា​ភាពមិនលម្អៀង​របស់​ម​ន្ត្រី គឃ​/​សប និង គ​ធ​/​ខ​ប ទៅរក​គណបក្សនយោបាយ ​ជាពិសេស​គណបក្សកាន់អំណាច និង​ជ្រើសរើស​មន្ត្រី​ទាំងនេះ​មកពី​ប្រភព​ឯករាជ្យ មិន​ជាប់​ពាក់ព័ន្ធ​នឹង​គណបក្សនយោបាយ​។​

លោក សុខ ឥសាន អ្នកនាំពាក្យ​គណបក្ស​ប្រជាជន​កម្ពុជា ប្រាប់ ​ភ្នំពេញ​ ប៉ុស្តិ៍​ នៅ​ថ្ងៃទី​ ១២ ខែកញ្ញា​ថា គជប នៅ​គ្រប់​ជាន់ថ្នាក់​កើតឡើង​ចេញពី​ច្បាប់​ស្តីពី​ការរៀបចំ​ និង​ការប្រព្រឹត្តទៅ​របស់​គជ​ប ដូច្នេះ​នៅក្រោយ​ពេលដែល​ជាប់ឆ្នោត​ជា គជប គឺ​អត់​សមា​ជិ​ក​របស់​គណបក្ស​ណាមួយ​នោះទេ គឺ​ធ្វើការ​ដោយ​ឯករាជ្យ និង​ឥត​លម្អៀង​។​

លោក​បន្តថា ចំពោះ​ការជ្រើសរើស​មន្ត្រី​បោះឆ្នោត​នៅតាម​រាជធានី​-​ខេត្ត គជប ប្រកាស​ជា​សាធារណៈ គេ​រើស​ទៅតាម​លក្ខណៈវិនិច្ឆ័យ និង​ការធ្វើ​តេស្ត ដែល​កំណត់ដោយ គជប​។ បន្ទាប់ពី​ជ្រើសរើស​ហើយ​គេ​បើក​វគ្គ​បំប៉ន​ទៀត ឱ្យ​យល់ដឹង​ពី​គោលការណ៍ និង​នីតិវិធី​បោះឆ្នោត មុននឹង​ចុះទៅ​អនុវត្ត​ផ្ទាល់​។​

លោក​ថ្លែងថា​៖ «អ៊ីចឹង​ការចោទប្រកាន់វា​មិនត្រូវ​»៕