.jpg)
ពលរដ្ឋពេលកំពុងឡើងជិះរថយន្តក្រុងកាលពីខែមិថុនា ឆ្នាំនេះ។ ហេង ជីវ័ន
ភ្នំពេញៈ លោកនាយករដ្ឋមន្ត្រី ហ៊ុន សែន បានណែនាំឱ្យសាលារាជធានីភ្នំពេញ ពិនិត្យលទ្ធភាពបញ្ចេញរថយន្តក្រុងដឹកពលរដ្ឋដោយឥតគិតថ្លៃ ដើម្បីបង្ការការឡើងថ្លៃសេវារថយន្តឈ្នួលក្នុងឱកាសពិធីបុណ្យភ្ជុំបិណ្ឌ ហើយលោកក៏បានអំពាវនាវឱ្យពលរដ្ឋមានការប្រុងប្រយ័ត្ន និងការពារខ្លួនពីជំងឺកូវីដ ១៩ ក្នុងពេលជួបជុំគ្នាផងដែរ។
លោក ហ៊ុន សែន បានថ្លែងនៅក្នុងសារសំឡេងពិសេសនៅថ្ងៃទី ១២ កញ្ញា យ៉ាងដូច្នេះថា៖ «សូមឱ្យសាលារាជធានីភ្នំពេញពិនិត្យលទ្ធភាពក្នុងការផ្តល់មធ្យោបាយដឹកជញ្ជូននៅថ្ងៃភ្ជុំបិណ្ឌដោយបញ្ចេញរថយន្តទៅតាមបណ្តាខេត្ត ដូចដែលយើងបានធ្វើនៅមុនកូវីដ ១៩ បានមកដល់ ដើម្បីកាត់បន្ថយនូវការដំឡើងថ្លៃរបស់រថយន្តឈ្នួលទាំងឡាយ»។
លោកបានបន្តថា សាលារាជធានីភ្នំពេញមានលទ្ធភាពនឹងធ្វើបែបនោះ ដើម្បីជួយកម្មករកម្មការិនី ជួយដល់ប្រជាពលរដ្ឋ ដែលចង់ធ្វើដំណើរទៅតាមមូលដ្ឋាននានា ដើម្បីឱ្យពួកគាត់ អាចមានលទ្ធភាពធ្វើដំណើរ និងចៀសវាងបាននូវការដំឡើងថ្លៃនៃការធ្វើដំណើររបស់ម្ចាស់រថយន្តឈ្នួល ឬតាក់ស៊ី។
ក្រៅពីដាក់ចេញវិធានការទប់ស្កាត់ក្នុងការឡើងថ្លៃនេះ លោកនាយករដ្ឋមន្ត្រី ហ៊ុន សែន ក៏បានអំពាវនាវដោយផ្ទាល់ទៅកាន់ម្ចាស់ឡានឈ្នួលទាំងឡាយកុំឱ្យដំឡើងថ្លៃនៅក្នុងរយៈពេលបុណ្យភ្ជុំបិណ្ឌ ដើម្បីឱ្យប្រជាជនមានលទ្ធភាពក្នុងការធ្វើដំណើរ ហើយលោកក៏បានណែនាំឱ្យអាជ្ញាធរគ្រប់លំដាប់ថ្នាក់ពិនិត្យការពារសន្តិសុខឱ្យបានល្អបំផុតសម្រាប់ប្រជាពលរដ្ឋនៅតាមទីអារាមនានាក៏ដូចជា កន្លែងកម្សាន្តនៅក្នុងឱកាសបុណ្យភ្ជុំបិណ្ឌផងដែរ។
លោក ហ៊ុន សែន បានបញ្ជាក់ថា៖ «បើទោះបីថាជំងឺឆ្លងនេះ ស្ថិតនៅហានិភ័យទាបក៏ដោយចុះ ខ្ញុំនៅតែបន្តអំពាវនាវទៅដល់ព្រះតេជព្រះគុណគ្រប់ព្រះអង្គនៅតាមទីអារាមនានា ពិសេសព្រះចៅអធិការវត្ត ក៏ដូចជាប្រជាពលរដ្ឋដែលទៅធ្វើបុណ្យទានត្រូវបន្តរក្សាវិធានការសុខាភិបាល ហើយយកចិត្តទុកដាក់ ទៅលើការការពារកុំឱ្យមានការរីករាលឆ្លងទៅតាមទីអារាម និងពីទីវត្តអារាមមកកាន់លំនៅឋានវិញ»។
លោកបានបញ្ជាក់ថា៖ «ចំណុចនេះគឺត្រូវយកចិត្តទុកដាក់ទាំងអស់គ្នាទាំងព្រះសង្ឃ និងគ្រហស្ថ ទាំងគ្រប់មជ្ឈដ្ឋាន ដែលបានពាក់ព័ន្ធជាមួយដំណើរសង្គមសេដ្ឋកិច្ច និងដំណើរការជាធម្មតារបស់ប្រជាពលរដ្ឋ។ ខ្ញុំសង្ឃឹមថា ប្រជាពលរដ្ឋរបស់យើងនឹងយោគយល់ចេះការពារខ្លួន និងតាមទីអារាមនានារៀបចំឱ្យបានល្អជាមួយនឹងការយកចិត្តទុកដាក់របស់អាជ្ញាធរដែលត្រូវពិនិត្យមើលជាប្រចាំ និងជាពិសេស»។
បើតាមប្រសាសន៍លោកនាយករដ្ឋមន្ត្រី កម្ពុជាពុំមានករណីស្លាប់ដោយសារជំងឺកូវីដ ១៩ ចាប់តាំងពីខែមេសា រហូតមកទល់បច្ចុប្បន្ន ហើយរយៈពេល ៥២ ថ្ងៃ កម្ពុជាគ្មានតួលេខអ្នកឆ្លងជំងឺនោះទេ បើទោះជាបច្ចុប្បន្ន កម្ពុជាមានការឆ្លងឡើងវិញ ប៉ុន្តែស្ថិតនៅក្នុងកម្រិតតិចតួច និងស្រាល។
លោក ម៉េត មាសភក្តី អ្នកនាំពាក្យសាលារាជធានីភ្នំពេញបានប្រាប់ ភ្នំពេញ ប៉ុស្តិ៍ នៅថ្ងៃទី ១២ កញ្ញាថា សាលារាជធានីភ្នំពេញ កំពុងរៀបចំរថយន្តតាមការណែនាំរបស់លោកនាយករដ្ឋមន្ត្រី។ លោកបានបន្តថា ក្រុមការងារកំពុងបែងចែកគន្លងផ្លូវទៅបណ្ដាខេត្តនានាដើម្បីឱ្យមានភាពងាយស្រួល និងសុវត្ថិភាព។
លោក ឃួង ស្រេង អភិបាលរាជធានីភ្នំពេញ បានជូនដំណឹងពីការត្រៀមរថយន្តក្រុងចំនួន ១៧៥ គ្រឿង សម្រាប់ដឹកពលរដ្ឋទៅស្រុកកំណើតដោយគិតថ្លៃចាប់ពីថ្ងៃទី ២៣-២៧ ខែកញ្ញានាឱកាសបុណ្យភ្ជុំបិណ្ឌខាងមុខ។
លោកបានឱ្យដឹងថា៖ «រដ្ឋបាលរាជធានីភ្នំពេញបានត្រៀមរថយន្តក្រុងចំនួន ១៧៥ គ្រឿងសម្រាប់ដឹកប្រជាពលរដ្ឋទៅស្រុកកំណើតនៅក្នុងឱកាសបុណ្យភ្ជុំបិណ្ឌរយៈពេល ៥ ថ្ងៃ ដែលក្នុងនោះមាននៅរាជធានីភ្នំពេញចំនួន ៥៥ គ្រឿង និងអ្នកដែលនឹងធ្វើដំណើរទៅ និងមកតាមបណ្តាខេត្តមានចំនួន ១២០ គ្រឿង។ រថយន្តទាំងនោះនឹងធ្វើដំណើរតាមផ្លូវជាតិលេខ ១ ដល់ផ្លូវជាតិលេខ ៧ »។
លោក ថែម សារី កម្មកររោងចក្រម្នាក់ក្នុងរាជធានីភ្នំពេញដែលមានស្រុកកំណើតនៅខេត្តកំពង់ឆ្នាំងបានថ្លែងថា វិធានការរបស់លោកនាយករដ្ឋមន្ត្រី គឺជាវិធីសាស្ត្រមួយដែលជួយដល់ពលរដ្ឋទូទៅ មិនថាតែកម្មករប៉ុណ្ណោះទេដែលអាចសន្សំលុយពីការធ្វើដំណើរទាំងនេះសម្រាប់ចាយនៅស្រុកកំណើត តែរថយន្តឈ្នួលអាចនឹងមិនហ៊ានដំឡើងថ្លៃខ្ពស់ព្រោះពលរដ្ឋមានជម្រើស។
លោកបានបញ្ជាក់ថា៖ «សម្រាប់ខ្ញុំយល់ឃើញថា ល្អ ព្រោះដោយសារអី ក្រុមកម្មករកម្មការិនី បានឡានអ៊ីចឹងជិះ អត់មានអស់លុយ។សម្រាប់ពួកគាត់ខ្លះ មិនមានឡាន មិនមានម៉ូតូជិះទៅស្រុក អ៊ីចឹងមានឡានជិះទៅស្រុកអត់អស់លុយអីអ៊ីចឹង គឺស្រួលធ្វើដំណើរ»៕
