.jpg)
ស្ត្រី ២ នាក់ ជាភរិយាអ្នកជាប់ឃុំពេលកំពុងកោរសក់នៅថ្ងៃទី ១៣ កញ្ញា ។ រូបថត សហការី
ភ្នំពេញៈ ក្រុមស្ត្រីថ្ងៃសុក្រ ២ នាក់ ដែលជាភរិយាសកម្មជនជាប់ឃុំនៅក្នុងពន្ធនាគារត្រពាំងផ្លុងបានសម្រេចកោរសក់ភ្លាមៗនៅថ្ងៃទី ១៣ ខែកញ្ញា ដើម្បីប្រឆាំងនឹងសេចក្ដីសម្រេចរបស់សាលាឧទ្ធរណ៍រាជធានីភ្នំពេញដែលបានតម្កល់សាលក្រមសាលាដំបូងរាជធានីភ្នំពេញទុកជាបានការ ហើយបន្តឃុំខ្លួនប្ដីរបស់ពួកគេនិងសកម្មជនបក្សប្រឆាំងសរុប ១៣ នាក់ ឱ្យជាប់ពន្ធនាគារ ៣ ឆ្នាំ ៨ ខែ។
ថ្លែងពីព្រះអង្គដងកើ ជាទីដែលអ្នកស្រី អ៊ុក ចន្ធី និងអ្នកស្រី ពៅ សារ៉ន លះបង់សក់ ស្ត្រីទាំង ២ បានអុជធូបបួងសួងសុំឱ្យក្រសួងមហាផ្ទៃបញ្ជូនប្ដីនិងអ្នកជាប់ឃុំឯទៀតសរុប ១៣ នាក់ មកឃុំខ្លួននៅពន្ធនាគារព្រៃសរាជធានីភ្នំពេញវិញ ដើម្បីនៅជិតងាយស្រួលចុះទៅជួបសុខទុក្ខ និងមិនចំណាយសោហ៊ុយធ្វើដំណើរឡើងចុះច្រើន។
អ្នកស្រី អ៊ុក ចន្ធី និយាយថា៖ «មានតែព្រះអង្គទេ ដែលអាចជួយកូនចៅបាន ហើយកូនចៅសុំកោរសក់ថ្វាយព្រះអង្គ ដើម្បីទាមទារសិទ្ធិសេរីភាពដល់ក្រុមគ្រួសារពួកខ្ញុំត្រឡប់មកវិញ ព្រោះប្ដីរបស់ខ្ញុំបានជាប់គុកដោយអយុត្តិធម៌ជាង២ឆ្នាំមកហើយ»។
អ្នកស្រី អ៊ុក ចន្ធី បានលើកឡើងទៀតថា ប្ដីរបស់អ្នកស្រី និងអ្នកឃុំខ្លួនឯទៀតត្រូវរងការវាយធ្វើបាបនៅក្នុងពន្ធនាគារត្រពាំងផ្លុងទើបជាហេតុមិនអាចឡើងមកស្ដាប់សាលក្រមរបស់សាលាឧទ្ធរណ៍ នៅថ្ងៃទី ១៣ កញ្ញា បាន។
អ្នកស្រីបន្ថែមថា៖ «ខ្ញុំទទួលយកអត់បានទេ តាំងពីតុលាការជាន់ទាបរហូតដល់តុលាការជាន់ខ្ពស់មិនឯករាជ្យទេ។ បើគាត់ឯករាជ្យគាត់ទម្លាក់ចោលសេចក្ដីសម្រេចរបស់តុលាការសាលាដំបូងដោះលែងប្ដីពួកខ្ញុំទៅ»។ បើតាមអ្នកស្រី អ៊ុក ចន្ធី សវនាការនៅព្រឹកថ្ងៃទី ១៣ កញ្ញា មានតែសកម្មជន ៤ រូបប៉ុណ្ណោះ ដែលបានចូលរួមស្ដាប់សាលដីកា។
យ៉ាងណាក្ដី អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃលោក នុត សវនា ធ្លាប់បានថ្លែងបកស្រាយចំពោះការចោទប្រកាន់ ជុំវិញការប្រើប្រាស់ហិង្សាលើសកម្មជននយោបាយជាប់ឃុំនៅត្រពាំងផ្លុង។ លោកថា រឿងហេតុកន្លងមក ផ្ដើមចេញជម្លោះរវាងអ្នកទោស និងអ្នកទោស ពោលគឺមិនមែនជាការចាត់តាំងឡើយ។
យ៉ាងណាមិញ ក្រុមគ្រួសារសកម្មជនជាប់ឃុំ ចាត់ទុកការឃុំខ្លួនប្ដី ឬឪពុកពួកគេថា ជារឿងនយោបាយសុទ្ធសាធ។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានច្រានចោលការចោទប្រកាន់បែបនេះដោយលោកថ្លែងដូច្នេះថា៖ «គ្មានចរចាឱ្យមានការដោះលែងទេ ធ្វើបែបនេះរំលោភច្បាប់ បើតុលាការកាត់ទោសជារឿងច្បាប់។ អ៊ីចឹងរកមេធាវីពូកែៗមកតតាំងក្ដីជាមួយតុលាការ ហើយគាត់ចេះតែស្រែកថាជារឿងនយោបាយ ហើយប្ដីគាត់អត់ខុស បើអត់ខុសគេចាប់ខ្លួនធ្វើអី»។
ចំណែកលោក ជិន ម៉ាលីន អ្នកនាំពាក្យក្រសួងយុត្តិធម៌ បានប្រាប់ ភ្នំពេញ ប៉ុស្តិ៍ថា ការសម្រេចកោរសក់របស់ក្រុមស្ត្រីថ្ងៃសុក្រ ២ នាក់ ដែលជាភរិយាសកម្មជនជាប់ឃុំនៅក្នុងពន្ធនាគារត្រពាំងផ្លុងនេះ គឺសិទ្ធិ និងសេរីភាពរបស់ពួកគាត់ និងជាសារនយោបាយប៉ុណ្ណោះ ប៉ុន្តែវាមិនមែនមធ្យោបាយតាមផ្លូវច្បាប់ក្នុងការការពារជនជាប់ចោទនោះទេ។
លោកបន្តថា ៖«សកម្មភាពនេះ គ្មានឥទ្ធិពលដល់ការសម្រេចរបស់តុលាការនោះទេ ហើយយើងសុំស្នើឱ្យមានការចូលរួមក្នុងដំណើការនីតិវិធី និងការការពារខ្លួនតាមផ្លូវច្បាប់ និងបង្ហាញទឡ្ហីករណ៍ និងអំណះអំណាងតាមផ្លូវច្បាប់ក្នុងការដោះបន្ទុក គឺជាមធ្យោបាយតែមួយគត់ក្នុងការជួយដល់ជនជាប់ចោទ»។
សាលាឧទ្ធរណ៍រាជធានីភ្នំពេញនៅថ្ងៃទី ១៣ ខែកញ្ញា បានបើកសវនាការលើបណ្ដឹងឧទ្ធរណ៍របស់មេធាវីការពារក្ដីឱ្យសកម្មជនបក្សសង្គ្រោះជាតិ បន្ទាប់ពីពួកគេមិនសុខចិត្តនឹងសេចក្ដីសម្រេចសាលាដំបូងរាជធានីភ្នំពេញដែលកាត់ទោសឱ្យជាប់ពន្ធនាគារជាប់ពន្ធនាគារ ៥ ឆ្នាំ និងអនុវត្តទោសក្នុងពន្ធនាគារចំនួន៣ឆ្នាំ ៨ ខែ។
សាលាដំបូងរាជធានីភ្នំពេញកាលពីថ្ងៃទី ១៧ ខែមីនា ឆ្នាំ ២០២២ បានផ្ដន្ទាទោសថ្នាក់ដឹកនាំនិងសកម្មជនអតីតគណបក្សសង្គ្រោះជាតិ ២១ នាក់ ឱ្យជាប់ពន្ធនាគារចន្លោះ ៥ ដល់ ១០ ឆ្នាំ ពាក់ព័ន្ធគម្រោងចូលស្រុករបស់លោក សម រង្ស៊ី កាលពីថ្ងៃទី ៩ ខែវិច្ឆិកា ឆ្នាំ ២០១៩។
ក្នុងចំណោមមនុស្ស ២១ នាក់ មាន ៧ នាក់ ត្រូវបានតុលាការសម្រេចផ្ដន្ទាទោសចំនួន ១០ ឆ្នាំ ក្រោមបទចោទប្រកាន់ «ញុះញង់ឱ្យប្រព្រឹត្តបទឧក្រិដ្ឋជាអាទិ៍ ញុះញង់ឱ្យយោធិនមិនស្ដាប់បញ្ជា និងរួមគំនិតក្បត់»។ ចំណែក ១២នាក់ និងអតីតមន្ត្រីក្រសួងមហាផ្ទៃម្នាក់ដាក់ពន្ធនាគារម្នាក់ៗ ៥ ឆ្នាំ ក្រោមបទ «រួមគំនិតក្បត់ និងញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម» ប៉ុន្តែអនុវត្តទោសក្នុងពន្ធនាគារចំនួន ៣ ឆ្នាំ ៨ ខែ៕
