.jpg)
មន្ត្រីកបប ចុះពិនិត្យទីតាំងលក់ទំនិញ ដើម្បីធានាពីសុវត្ថិភាពចំណីអាហារ នាថ្ងៃទី ១២ កញ្ញា នៅខេត្តរតនគិរី។ រូបថត CCF
ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (កបប) បង្កើនការចុះត្រួតពិនិត្យនៅតាមទីផ្សារ និងទីតាំងអាជីវកម្មម្ហូបអាហារនៅទូទាំងប្រទេស ដើម្បីធានាសុវត្ថិភាពចំណីអាហារក្នុងឱកាសបុណ្យកាន់បិណ្ឌ និងភ្ជុំបិណ្ឌ បន្ទាប់ពីរយៈពេល ៨ ខែកន្លងមកនេះ មន្ត្រីស៊ើបអង្កេតបានបង្ក្រាប និងដកហូតទំនិញមិនអនុ លោមតាមច្បាប់ជាង ៣ ០០០ តោន។
របាយការណ៍របស់អគ្គនាយកដ្ឋាន ក.ប.ប. ដែល ភ្នំពេញ ប៉ុស្តិ៍ ទទួលបាន នៅថ្ងៃទី ១៣ កញ្ញា ឱ្យដឹងថា ក្នុងរយៈពេល ៨ ខែ ឆ្នាំ ២០២២ នេះ មន្ត្រីស៊ើបអង្កេតរបស់អគ្គនាយកដ្ឋាន ក.ប.ប. បានបង្ក្រាបទំនិញខូចគុណភាព គ្មានស្លាកសញ្ញា ឬស្លាកសញ្ញាមិនអនុលោមតាមបញ្ញត្តិ មានសារធាតុគីមីហាមឃាត់ ឬហួសកាលបរិច្ឆេទប្រើប្រាស់ជាង ១៩ តោន យកមកកម្ទេចចោល។
បើតាមរបាយការណ៍ដដែល ក្នុងរយៈពេល ៨ ខែ មន្ត្រីបានចុះបង្ក្រាបទំនិញពាក់ព័ន្ធនឹងការបំពានម៉ាក ចំនួន ១១៦ លើក ដោយបានឃាត់ទុកបណ្តោះអាសន្នទំនិញប្រមាណ៣ ២៧២ តោន ដើម្បីអនុវត្តនីតិវិធីបន្ត ខណៈបទល្មើសពាក់ព័ន្ធនឹងទំនិញក្លែងក្លាយ មន្ត្រីបានធ្វើការពិន័យអន្តរការណ៍ ទៅតាមនីតិវិធីជាធរមាន ដោយមិនទាន់មានករណីបណ្តឹងទៅតុលាការនៅឡើយ។
របាយការណ៍របស់អគ្គនាយកដ្ឋាន ក.ប.ប. បញ្ជាក់ថា៖ «រហូតមកដល់ពេលនេះ ទំនិញក្លែងក្លាយនៅតែមានចរាចរណ៍លើទីផ្សារនៃប្រទេសកម្ពុជានៅឡើយ ដោយយោងលើកត្តាច្បាប់ និងការអនុវត្តច្បាប់នៅប្រទេសកម្ពុជា ទើបតែចាប់ផ្តើមក្នុងរយៈពេលខ្លី បើប្រៀបធៀបជាមួយបណ្តាប្រទេសនៅលើពិភពលោក»។
របាយការណ៍បន្តថា៖ «ការយល់ដឹងពាក់ព័ន្ធនឹងទំនិញ និងសិទ្ធិអំណាចពាក់ព័ន្ធនឹងផលប្រយោជន៍ ដែលប្រជាពលរដ្ឋដែលជាអ្នកប្រើប្រាស់ទទួលបាននៅមានកម្រិត។ ប្រជាពលរដ្ឋនៃប្រទេសកម្ពុជាមានកម្រិតជីវភាពក្រីក្រ ងាយស្រួលនឹងទទួលការបោកបញ្ឆោតរបស់អាជីវករខិលខូចមួយចំនួន»។
ដើម្បីកាត់បន្ថយបាននូវការចរាចរទំនិញក្លែងក្លាយ រំលោភកម្មសិទ្ធិបញ្ញា អគ្គនាយកដ្ឋាន ក.ប.ប. បានដាក់ចេញនូវផែនការសកម្មភាពរបស់ខ្លួន បង្កើនសកម្មភាពត្រួតពិនិត្យ ស៊ើបអង្កេតតាមបណ្តាផ្សារ ឃ្លាំងស្តុក និងទីតាំងផ្សេងទៀត និងអនុវត្តវិធានការច្បាប់យ៉ាងតឹងរ៉ឹងបំផុតចំពោះបុគ្គលប្រព្រឹត្តល្មើស។ ជាមួយគ្នានោះ នឹងអនុវត្តការងារផ្សព្វផ្សាយការយល់ដឹងអំពីច្បាប់ដល់ប្រជាពលរដ្ឋដែលជាអ្នកប្រើប្រាស់ ផលិតករ អាជីវករ តាមគ្រប់មធ្យោបាយ។
លោក ផាន អូន ប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋាន កបប ប្រាប់ ភ្នំពេញ ប៉ុស្តិ៍ នៅថ្ងៃទី ១៣ កញ្ញាថា មន្ត្រី កបប រាជធានី-ខេត្ត បានបង្កើនការចុះត្រួតពិនិត្យទំនិញគ្រប់ប្រភេទ ដែលដាក់លក់នៅតាមទីផ្សារ និងទីតាំងអាជីវកម្មម្ហូបអាហារនៅគោលដៅផ្សេងៗគ្នា។ ការបង្កើនការចុះត្រួតពិនិត្យនេះ ដើម្បីធានាការពារនូវការចរាចរលក់ទំនិញដែលមិនមានអនុលោមភាព ជាទំនិញដែលខូចគុណភាព និងហួសកាលបរិច្ឆេទ ដែលធ្វើឱ្យប៉ះពាល់ដល់សុខភាពអ្នកប្រើប្រាស់ ក៏ដូចជាការពារសិទ្ធិរបស់អ្នកប្រើប្រាស់ផងដែរ។
លោកបញ្ជាក់ថា៖ «យើងបង្កើនការចុះមើលតាមបណ្តាស្តង់លក់គ្រឿងសមុទ្រ កន្លែងលក់បន្លែផ្លែឈើ ហើយនិងទ័យ្យទាននៅកន្លែងអ្នកដែលលក់តាមបណ្តាផ្ទះ និងតាមបណ្តាទីផ្សារ សម្រាប់ប្រគេនដល់ព្រះសង្ឃ។ យើងត្រួតពិនិត្យនេះ ដើម្បីធានាឱ្យបានថា គាត់មិនឆ្លៀតឱកាសក្នុងពិធីបុណ្យភ្ជុំបិណ្ឌ ដើម្បីដាក់របស់ដែលខូចគុណភាព ឬអត់គុណភាព ឬហួសកាលបរិច្ឆេទការប្រើប្រាស់ សម្រាប់ព្រះសង្ឃ ដែលទាំងនេះ ជាបច្ច័យមិនល្អរបស់បងប្អូនយើងអ្នករកស៊ី»។
លោក ផាន អូន បង្ហាញក្តីសង្ឃឹមថា អ្នកប្រកបរបររកស៊ី ឬធុរកិច្ចជនទាំងឡាយ នឹងមិនធ្វើអំពើណាមួយដែលមិនសុចរិតក្នុងឱកាសពិធីបុណ្យជាតិនោះទេ។ លោកអំពាវនាវដល់ប្រជាពលរដ្ឋឱ្យមានការប្រុងប្រយ័ត្ន ក្នុងការប្រើប្រាស់ ឬមានការសង្ស័យអាចដាក់ពាក្យបណ្ដឹងមកកាន់អគ្គនាយកដ្ឋាន ក.ប.ប. ដើម្បីរួមគ្នាទប់ស្កាត់ឱ្យបានទាន់ពេលវេលា និងធានាបានសុវត្ថិភាពអ្នកបរិភោគ។
ជាមួយគ្នានេះ ក្រសួងទេសចរណ៍ ក៏បានចេញសេចក្តីណែនាំស្តីពីការរៀបចំគ្រប់គ្រងក្នុងចរន្តភ្ញៀវទេសចរ និងការពង្រឹងគុណភាពផលិតផលទេសចរណ៍ក្នុងឱកាសបុណ្យភ្ជុំបិណ្ឌប្រពៃណីជាតិ ដែលនឹងចាប់ផ្តើមពីថ្ងៃទី ២៤-២៦ ខែកញ្ញា។
ក្រសួងទេសចរណ៍ ណែនាំដល់មន្ទីរទេសចរណ៍ទូទាំងរាជធានី-ខេត្ត ត្រូវបន្តជំរុញការអនុវត្តឱ្យបានយ៉ាងខ្ជាប់ខ្ជួន និងម៉ឺងម៉ាត់នូវវិធានការទាំងឡាយ ដែលបានដាក់ចេញដោយរាជរដ្ឋាភិបាល ក្នុងការទប់ស្កាត់ការរីករាលដាលជំងឺកូវីដ ១៩ ព្រមទាំងពង្រឹងការអនុវត្តវិធានសុវត្ថិភាពទេសចរណ៍ និងនីតិវិធីស្តង់ដា ប្រតិបត្តិអប្បបរមា (SOP) តាមគន្លងប្រក្រតីភាពថ្មីផងដែរ។
ក្រសួងបញ្ជាក់ថា៖ «ណែនាំទៅដល់មន្ទីរទេសចរណ៍ទូទាំងរាជធានី-ខេត្ត ត្រូវបន្តជំរុញឱ្យម្ចាស់អាជីវកម្ម និងគោលដៅទេសចរណ៍នានា រៀបចំឱ្យមានកម្មវិធីលើកទឹកចិត្តចំពោះភ្ញៀវទេសចរ ដែលបានចាក់វ៉ាក់សាំង ខណៈដែលបុគ្គលិកបម្រើការទាំងអស់ ត្រូវទទួលបានការចាក់វ៉ាក់សាំងតាមការកំណត់របស់ក្រសួងសុខាភិបាល»។
ក្រៅពីនេះ ក្រសួងទេសចរណ៍ ក៏បានណែនាំឱ្យអាជ្ញាធរ ក្រោមចំណុះក្រសួង ត្រូវសហការជាមួយអាជីវករ និងប្រតិបត្តិករទេសចរណ៍ ក្នុងការពង្រឹងគុណភាពផលិតផលទេសចរណ៍ ថែរក្សាបរិស្ថាន អនាម័យ រក្សាតម្លៃផលិតផល និងសេវាឱ្យបានសមរម្យ។ ត្រូវណែនាំម្ចាស់ទូកដ កាណូតទេសចរណ៍ និងមធ្យោបាយដឹកជញ្ជូនទេសចរណ៍តាមផ្លូវទឹកនានា ដែលធ្វើអាជីវកម្មដឹកភ្ញៀវទេសចរកាត់សមុទ្រ ទន្លេ ស្ទឹង និងបឹង មិនឱ្យផ្ទុកលើសចំណុះ និងត្រូវបំពាក់សម្ភារសង្គ្រោះចាំបាច់នានា។
ក្រសួងទេសចរណ៍បញ្ជាក់ថា៖ «រាល់តម្លៃស្នាក់នៅ ម្ហូបអាហារ និងសេវាផ្សេងៗត្រូវសរសេរឱ្យបានច្បាស់ដាក់ក្នុងតារាង ដើម្បីជម្រាបជូនភ្ញៀវឱ្យបានដឹងជាមុន ចៀសវាងការកំណត់ថ្លៃខ្ពស់ហួសហេតុ។ ករណីមិនអនុវត្តតាមតារាងដែលបានបិទផ្សាយ ម្ចាស់មូលដ្ឋានអាជីវកម្ម ត្រូវទទួលខុសត្រូវចំពោះមុខច្បាប់ជាធរមាន»៕
