ភ្នំពេញៈ ​លោក​ សំហេង បុរស រដ្ឋ​លេខា​ធិ​ការ​ក្រសួង​សង្គម​កិច្ច អតីត​យុទ្ធជន ​និង​យុវនីតិ​សម្ប​ទា និង​ជា​ប្រធាន​ក្រុម​ប្រឹក្សា​ភិបាល​នៃ​មូល​និធិ​ជាតិ​ជំនួយ​សង្គម​ថ្លែង​ថា និវត្តន៍​ជន​ពិត​ជា​បាន​រួម​ចំណែក​ក្នុង​ការ​កសាង​ប្រទេស​ជាតិ​ឱ្យ​រីក​ចម្រើន ​និង​សន្តិ​ភាព​រហូត​មក​ទល់​ថ្ងៃ​នេះ ​ហេតុ​នេះ​ពួក​គាត់​គួរតែ​ទទួល​បាន​ការ​យក​ចិត្ត​ទុកដា​ក់​ពី​សង្គម​ជាតិ​វិញ​ឱ្យ​បាន​សម​រម្យ​។

​លោក​ សំហេង បុរស បាន​លើក​ឡើង​បែបនេះ ​ក្នុង​ពិ​ធី​បើក​វគ្គ​បណ្តុះ​បណ្តាល​ស្តីពី «​នីតិ​វិធី​ផ្តល់​តាវកា​លិក​កម្មវិធី​ជំនួយ​សង្គម​ និង​របប​ឧបត្ថម្ភ​គោល​នយោបា​យ​សម្រាប់​អតីត​មន្ត្រី​រាជការ​ស៊ីវិល និង​អតីត​យុទ្ធជន​» ដែល​ធ្វើឡើង​នៅ​សាល​ប្រជុំ​ធំ​ទីស្តីការ​របស់​ក្រសួង​សង្គម​កិច្ច អតីត​យុទ្ធ​ជន និង​យុវ​នីតិ​សម្បទា ថ្ងៃទី ១២​ ខែកញ្ញា ដោយ​មាន​អ្នក​ចូល​រួម​សរុប​ ជាង​ ១១០ ​នាក់​។

​លោក​ថ្លែង​ថា​៖ «​និវត្តន៍​ជន​របស់​យើង​ពិត​ជា​បានរួម​ចំ​ណែ​ក្នុង​ការ​កសាងប្រទេស​ជាតិ​បាន​រីក​ចម្រើន​ និង​សុខ​សន្តិ​ភាព​រហូត​ដូច​សព្វ​ថ្ងៃ​នេះ ដូច​នេះ​ពួក​គាត់​គួរតែ​ត្រូវ​បាន​យក​ចិត្ត​ទុកដាក់​ ទោះក្នុង​តម្លៃ​ណាក៏​ដោយ​​»។

​លោក​បាន​ឱ្យ​ដឹង​ថា​ មន្ត្រីរាជ​ការ​ស៊ីវិល​គិត​ត្រឹម​អាយុ ​៦០​ ឆ្នាំ នឹង​ត្រូវ​ដល់​អាយុ​ចូល​និវត្តន៍។ដោយ​ឡែក​កង​កម្លាំ​ងប្រដាប់​អាវុធ​ទាំង​ខាង​ក្រសួង​ការ​ពារ​ជាតិ ​និង​ក្រសួង​មហាផ្ទៃ​ នឹងត្រូវ​ដល់​អាយុ​ចូល​និវត្តន៍​ទៅ​តាម​ប្រភេទ​ឋានន្ត​រស័ក្តិ​តែ​មិន​លើស​អាយុ​ ៦០​ ឆ្នាំ​ទេ​។

បើ​តាម​លោក​ សំហេង ​បុរស ក្នុង​ពេល​ថ្មីៗ​នេះ​ លោក​នាយក​រដ្ឋ​មន្ត្រី ​ហ៊ុន ​សែន បាន​ចុះ​ហត្ថ​លេខា​លើ​អនុ​ក្រឹត្យ​លេខ​ ១៦២ ​អនក្រ​.​បក ចុះ​ថ្ងៃ​ទី ​១១ ​ខែសីហា ឆ្នាំ​ ២០២២ ស្តីពី​ការ​បន្ថែម​របប​សន្តិ​សុខ​សង្គមសម្រាប់​អតីត​មន្ត្រី​រាជការ​ស៊ីវិលនិង​អតីត​យុទ្ធជន​ និង​ឧបត្ថម្ភ​អ្នក​បម្រើ​ជូន​ជន​ពិការ ​និង​ជន​បាត់​បង់​សមត្ថ​ភាព​ការ​ងារ​ថ្នាក់​ទី​១ ​ដែល​ការ​បន្ថែម​នេះ​បែង​ចែក​ជា ​២​ ។

​ទី​១ កម្រិត​របប​សន្តិ​សុខ​សង្គម​ដែល​ត្រូវ​បន្ថែម​សម្រាប់​អតីត​មន្ត្រី​រាជការ​ស៊ីវិល និង​អតីត​យុទ្ធ​ជន​៖ ក្នុង​នោះ​កម្រិត​១​របប​សន្តិ​សុខ​សង្គម​សរុប​ប្រចាំ​ខែ​បច្ចុប្បន្ន​ទាប​ជាង​ឬ​ស្មើ ​៦៧​០​ ០០០ រៀល ត្រូវ​បន្ថែម​ឱ្យ​ដល់​ត្រឹម​ ៦៩០ ​០០០​ រៀល ​ក្នុង ​១ ​ខែ​។ កម្រិត​ ២ របប​សន្តិ​សុខ​សង្គម​ប្រចាំ​ខែ​បច្ចុប្បន្ន​ក្នុង​ចន្លោះ​ចាប់​ពី​ ៦៧០ ​០០១ រៀលដល់​ត្រឹម​ ៨០០ ​០០០​ រៀល ​ត្រូវ​ផ្តល់​ជូន​បន្ថែម​ចំនួន ២០ ​០០០​ រៀល ក្នុង​ ១ ខែ​។

​ចំណែក​កម្រិត​ ៣ របប​សន្តិ​សុខ​សង្គម​ប្រចាំ​ខែ​បច្ចុប្បន្ន​ក្នុង​ចន្លោះ​ចាប់​ពី ​៨០០ ​០០១ រៀល​ដល់​ត្រឹម ៨១០ ​០០០ រៀល ​ត្រូវ​បន្ថែម​ឱ្យ​ដល់​ចំនួន ៨២០ ​០០០​ រៀល​ ក្នុង​ ១​ ខែ និ​ង កម្រិត ​៤ របប​សន្តិ​សុខ​សង្គម​ប្រចាំខែ​បច្ចុប្បន្ន​ក្នុង​ចន្លោះ​ចាប់ពី​ ៨១០ ​០០១ រៀល ឡើង​ទៅ​ ត្រូវ​ផ្តល់​ជូន​បន្ថែម​ចំនួន​ ១០ ​០០០​ រៀល ក្នុង ​១​ ខែ ។

​ដោយ​ឡែក​ការ​បន្ថែម​ទី​២ ​ឧបត្ថម្ភ​ចំពោះ​ជនពិការ​និង​ជន​បាត់​បង់​សមត្ថ​ភាព​ការងារ​ថ្នាក់​ទី​១ ជា​អតីត​យុទ្ធ​ជន​ដែល​បាន​ធ្វើ​សមា​រណ​កម្មមុន​ឆ្នាំ​ ២០១៥ ត្រូវ​បន្ថែម​របប​ឧបត្ថម្ភ​ជូន​អ្នក​បម្រើ​ក្នុង​ ១​ នាក់​ ២០០ ​០០០ រៀល ក្នុង​ ១​ ខែ​។​

​លោក សំហេង បុរស បាន​លើក​ឡើង​ផង​ដែរ​ថា វគ្គ​បណ្តុះ​បណ្តាល​នេះ ជា​វគ្គ​បណ្តុះ​បណ្តាល​ផ្ទៃក្នុងដែល​មាន​គោល​បំណង​លើក​កម្ពស់​ការ​យល់​ដឹង​ពី​កម្មវិធី​នានា ​ដែល​ក្រុម​ការងារ​អតីត​នាយក​ដ្ឋាន​សុខុមាល​ភាព​សង្គម ​បេឡា​ជាតិ​សន្តិ​សុខ​សង្គម​សម្រាប់​មន្ត្រី​រាជ​ការ​ស៊ីវិល ប​.​ជ​.​ស​. និងបេឡា​ជាតិ​អតីត​យុទ្ធ​ជន ប​.​ជ​.​អ​. បាន​និងកំពុង​អនុវត្ត ដូច​នេះ​បន្ទាប់ពី​ចប់​វគ្គ​បណ្តុះ​បណ្តាល​នេះ សិក្ខា​កាមនឹង​ទទួល​បាន​នូវ​ចំណេះ​ដឹង​គ្រប់​ផ្នែក​ទាំង​អស់​​។​

​លោក​ថ្លែង​ថា​៖ «​ខ្ញុំ​សូម​សម្តែង​នូវ​ការ​កោត​សើរ និង​វាយត​ម្លៃ​ខ្ពស់​ចំពោះ​ការ​ខិតខំ​ប្រឹង​ប្រែង​របស់ ​ឯកឧត្តម ​លោក​ជំទាវ ​លោក លោកស្រី​ នាពេល​កន្លង​ទៅ​។ ​ការ​រួម​ចំណែក​របស់​ឯក​ឧត្តម ​លោក​ជំទាវ ​លោក ​លោក​ស្រី ក្រុម​ការងារ​ទាំង​អស់ ​ពិតជា​បាន​ធ្វើឱ្យ​កម្ម​វិធី​នានា​សម្រេច​បាន​នូវ​លទ្ធ​ផល​គួរ​ជាទី​មោ​ទនៈ​»។​

​លោក ឈួ​រ សុ​បញ្ញា ប្រតិភូ​រាជរដ្ឋា​ភិបាល​ទទួល​បន្ទុក​ជា​អគ្គ​នាយក​នៃ​មូល​និធិ​ជាតិ​ជំនួយ​សង្គមថ្លែងថា ​គោល​ដៅ​សំខាន់​ នៃ​ការ​ច្របាច់​បញ្ចូល​គ្នា​នូវ​ស្ថា​ប័ន​ចំនួន​ ៣ ​បង្កើត​បាន​ជា​មូលនិធិ​ជាតិ ​ជំនួយ​សង្គម គឺ​សំដៅ​បង្កើន​ប្រសិទ្ធ​ភាពនៃ​កា​រផ្តល់​សេវា​ជូន​ក្រុម​ជន​គោល​ដៅជា​ពិសេស​និវត្តន៍​ជន​ ២ ​ប្រភេទ ​គឺ​អតីត​យុទ្ធ​ជននិង​អតីត​មន្ត្រី​រាជ​ការ​ស៊ីវិលក៏ដូច​ជា ​ជនរង​គ្រោះនិង​ងាយ​រង​គ្រោះ​ផ្សេង​ទៀត​។ នេះ​ជា​ភាព​ចាំ​បាច់ក្នុង​ការ​ពង្រឹង​សមត្ថភាព​មន្ត្រី​មូល​និធិ​ជាតិ​ជំនួយ​ស​ង្គ​មឱ្យ​កាន់​តែ​មាន​ប្រសិទ្ធ​ភាព​ថែម​ទៀត​៕