ភ្នំពេញៈ គិតមកដល់ពេលនេះ ក្រសួងមហាផ្ទៃបានទទួលបណ្តឹង និងការរាយការណ៍ពាក់ព័ន្ធបញ្ហាជួញដូរមនុស្សសរុបចំនួន ១៨៦ ករណី។ នេះបើតាមរដ្ឋមន្ត្រីក្រសួងមហាផ្ទៃលោក ស ខេង ថ្លែងនៅក្នុងកិច្ចប្រជុំត្រួតពិនិត្យការប្រយុទ្ធប្រឆាំងគ្រប់ទម្រង់នៃអំពើជួញដូរមនុស្ស ជួញដូរពលកម្ម និងអាជីវកម្មផ្លូវភេទនៅខេត្តព្រះសីហនុកាលពីថ្ងៃទី ១២ ខែកញ្ញា ឆ្នាំ ២០២២។
នៅក្នុងកិច្ចប្រជុំទាក់ទិននឹងបញ្ហាទប់ស្កាត់បទល្មើសជួញដូរមនុស្សនេះដែរ លោក ស ខេង បានសង្កត់ធ្ងន់ទៅលើករណីអំពើជួញដូរមនុស្សនៅកម្ពុជា ដែលកើតមានជាពិសេសក្នុងខេត្តព្រះសីហនុដូច្នេះថា៖ «កិច្ចប្រជុំនាថ្ងៃនេះជាផ្នែកមួយនៃការជួយគាំទ្របន្ថែមទៀតដល់ការងារប្រយុទ្ធប្រឆាំងអំពើជួញដូរមនុស្ស ក្នុងខេត្តព្រះសីហនុដែលមានការប្រឈមទៅនឹងបទល្មើសប្រភេទនេះ»។
គួរបញ្ជាក់ថា កន្លងមក ករណីជួញដូរមនុស្ស ជួញដូរពលកម្ម បានកើតមានច្រើនជាងគេក្នុងភូមិសាស្ត្រខេត្តព្រះសីហនុ ដែលលោក ស ខេង បានឆ្លើយតបទៅកាន់អ្នករាយការណ៍ពិសេសអង្គការសហប្រជាជាតិលោក វីទិត ម៉ុនតាប៊ន (Vitit Muntarbhorn) ថា បទល្មើសជួញដូរមនុស្សកើតមានច្រើនដោយសារឧក្រិដ្ឋជនបរទេសយកទឹកដីកម្ពុជា ជាកន្លែងដើម្បីធ្វើការឆបោកប្រព្រឹត្តអំពើជួញដូរមនុស្សនេះ ជាពិសេសក្នុងខេត្តព្រះសីហនុផ្ទាល់។
លោក អំ សំអាត នាយករងទទួលបន្ទុកផ្នែកសិទ្ធិមនុស្សអង្គការលីកាដូបានសម្ដែងក្ដីព្រួយបារម្ភចំពោះស្ថានភាពជួញដូរមនុស្សគ្រប់ទម្រង់នៅកម្ពុជានាពេលបច្ចុប្បន្ន ទោះបីជាកន្លងមក រដ្ឋាភិបាលបានដាក់ចេញនូវវិធានការទប់ស្កាត់ និងប្រឆាំងលើបទល្មើសមួយនេះរួចហើយក៏ដោយ ជាពិសេសករណីដែលបង្កឡើងដោយឧក្រិដ្ឋជនបរទេសលើទឹកដីកម្ពុជា ដែលជាហេតុបណ្ដាលឱ្យប្រទេសផ្សេងៗអំពាវនាវដល់ប្រជាជនខ្លួនប្រុងប្រយ័ត្នពីករណីឆបោក និងជួញដូរមនុស្សពីកម្ពុជា។
នារយៈពេលថ្មីៗនេះ រដ្ឋាភិបាលកម្ពុជាតាមរយៈក្រសួងការបរទេសបានបដិសេធពីការលើកឡើងនៃរបាយការណ៍នានា ចំពោះស្ថានភាពនៃអំពើជួញដូរមនុស្ស និងឆបោកនៅកម្ពុជាថា មានសភាពធ្ងន់ធ្ងរ។
លោក អំ សំអាត បន្ថែមថា៖ «យើងមើលឃើញថា នាពេលថ្មីៗនេះ រដ្ឋាភិបាលពិតជាកំពុងបង្កើនយន្តការ និងវិធានការទប់ស្កាត់បញ្ហាជួញដូរមនុស្សនេះពិតមែន ប៉ុន្តែអ្វីជាកត្តាសំខាន់នោះគឺការតាំងចិត្ត និងការប្តេជ្ញាចិត្តអនុវត្តជាក់ស្ដែង»។
មន្ត្រីជាន់ខ្ពស់ផ្នែកសិទ្ធិមនុស្សនៃអង្គការលីកាដូរូបនេះបានអំពាវនាវដល់រដ្ឋាភិបាលកម្ពុជា ពង្រឹងស្មារតីលើការអនុវត្តច្បាប់បន្ថែម លើច្បាប់ និងយន្តការដែលមានស្រាប់ និងជាពិសេសត្រូវហ៊ានវែកមុខអ្នកជាប់ពាក់ព័ន្ធ បើទោះបីពួកគេជាជនមានអំណាចក្តី។ លោកថា ធ្វើនេះ គឺដើម្បីឱ្យកម្ពុជាវិលមកជាទីសុខសុវត្ថិភាព និងដើម្បីមុខមាត់ប្រទេសជាតិដែលបានបាត់បង់ ដោយសារបញ្ហារំលោភសិទ្ធិមនុស្ស និងបទឧក្រិដ្ឋកម្មជួញដូរមនុស្សនេះ។
គួររំឭកថា កាលពីថ្ងៃទី ២០ ខែកក្កដា ឆ្នាំ ២០២២ ក្រសួងការបទេសអាមេរិកបានដាក់កម្ពុជាក្នុងបញ្ជីខ្មៅរបស់ខ្លួនលើផ្នែកជួញដូរមនុស្សនេះ ដោយសហរដ្ឋអាមេរិកអះអាងថា ការជួញដូរជនបរទេសចូលមកក្នុងប្រទេសកម្ពុជាកំពុងមានការកើនឡើងជាលំដាប់។
កាលពីថ្ងៃទី ២៣ ខែកក្កដា ឆ្នាំ ២០២២ រដ្ឋមន្ត្រីក្រសួងមហាផ្ទៃ លោក ស ខេង បានបង្ហាញពីការតាំងចិត្ត ដើម្បីបន្តស្វែងរកមូលហេតុនៅពីក្រោយបញ្ហាជួញដូរមនុស្ស និងការចាត់ថ្នាក់កម្ពុជា ក្នុងបញ្ជីខ្មៅរបស់សហរដ្ឋអាមេរិកដូចនេះ ដើម្បីធ្វើការកែលម្អចំណុចសេសសល់ ដោយបារម្ភថា ចំណាត់ថ្នាក់នេះអាចធ្វើឱ្យកម្ពុជារងនូវការដាក់ទណ្ឌកម្ម និងមានកេរ្តិ៍ឈ្មោះមិនល្អផងដែរ៕