.jpg)
លោកនាយករដ្ឋមន្ត្រី ហ៊ុន សែន ថ្លែងផ្ដល់ប្រាក់ឧបត្ថម្ភដល់មន្ត្រីរាជការម្នាក់ ៥ ម៉ឺនរៀល សម្រាប់ភ្ជុំបិណ្ឌ កាលពីថ្ងៃទី ១៣ ខែកញ្ញា។ រូបថត SPM
ភ្នំពេញៈ រាជរដ្ឋាភិបាលសម្រេចផ្តល់ប្រាក់ឧបត្ថម្ភចំនួន ៥ ម៉ឺនរៀលក្នុងឱកាសពិធីបុណ្យភ្ជុំបិណ្ឌជូនដល់មន្ត្រីរាជការស៊ីវិល មន្ត្រីជាប់កិច្ចសន្យា និវត្តជនគ្រប់មុខសញ្ញា និងមន្ត្រីកងកម្លាំងប្រដាប់អាវុធគ្រប់ប្រភេទ ខណៈពិធីបុណ្យនេះនឹងប្រព្រឹត្តទៅរយៈពេល ៣ ថ្ងៃពីថ្ងៃទី ២៤ ដល់ថ្ងៃទី ២៦ កញ្ញា ឆ្នាំនេះ។
យោងតាមសេចក្តីសម្រេចចុះហត្ថលេខាដោយលោកនាយករដ្ឋមន្ត្រី ហ៊ុន សែន ដែលត្រូវបានផ្សព្វផ្សាយនៅថ្ងៃទី ១៣ ខែកញ្ញា បានឱ្យដឹងថា ការបើកផ្តល់ប្រាក់ឧបត្ថម្ភខាងលើត្រូវបានអនុវត្តឱ្យបានមុនថ្ងៃបុណ្យភ្ជុំបិណ្ឌ។ ជាមួយគ្នានេះ ប្រាក់ឧបត្ថម្ភនេះក៏នឹងត្រូវផ្តល់ជូនក្នុងឱកាសបុណ្យចូលឆ្នាំថ្មីប្រពៃណីជាតិខ្មែរផងដែរ។
លោក ផៃ ស៊ីផាន អ្នកនាំពាក្យរាជរដ្ឋាភិបាលប្រាប់ភ្នំពេញប៉ុស្តិ៍នៅថ្ងៃទី ១៣ ខែកញ្ញា ថា ការផ្តល់ប្រាក់ឧបត្ថម្ភនេះគឺជាទំនៀមទម្លាប់មួយ សម្រាប់ឱកាសពិធីបុណ្យជាតិសំខាន់ទៅតាមលទ្ធភាពដែលរាជរដ្ឋាភិបាលបានសន្សំសំចៃ ដើម្បីចែករំលែកដល់មន្ត្រីរាជការគ្រប់ប្រភេទ។
លោកបន្តថា ការផ្តល់ប្រាក់ឧបត្ថម្ភចំនួន ៥ ម៉ឺនរៀលនេះមិនជាច្រើនទេ ប៉ុន្តែបើធៀបជាមួយនឹងការចំណាយថវិការបស់រាជរដ្ឋាភិបាលគឺមានចំនួនច្រើន និងបង្ហាញពីព្រហ្មវិហារធម៌របស់លោកនាយករដ្ឋមន្ត្រី ហ៊ុន សែន។
លោកថ្លែងថា៖ «ប្រាប់ឧបត្ថម្ភនេះនឹងត្រូវបានផ្តល់ទៅឱ្យមន្ត្រីទាំងអស់ដែលស្ថិតក្រោមការគ្រប់គ្រង និងទទួលបានប្រាក់បៀវត្សរ៍ពីរាជរដ្ឋាភិបាល»។
លោក យក់ ប៊ុនណា រដ្ឋលេខាធិការក្រសួងមុខងារសាធារណៈ ប្រាប់ភ្នំពេញប៉ុស្តិ៍នៅថ្ងៃទី ១៣ ខែកញ្ញាថា ការផ្តល់ប្រាក់ឧបត្ថម្ភទាំងពិធីបុណ្យភ្ជុំបិណ្ឌ និងចូលឆ្នាំនេះបានចាប់ផ្តើមតាំងពីអាណត្តិមុនៗក្នុងពិធីបុណ្យនីមួយៗមានការជួបជុំគ្រួសារ និងកម្មវិធីផ្សេងៗដែលមានការចំណាយច្រើនផងដែរ។
លោកថា៖ «នេះគឺជាការលើកទឹកចិត្តរបស់រាជរដ្ឋាភិបាល ក៏ដូចជា សម្តេចតេជោ ហ៊ុន សែន។ មិនត្រឹមតែផ្តល់ប្រាក់ឧបត្ថម្ភនៅក្នុងពិធីបុណ្យជាតិតែប៉ុណ្ណោះទេ យើងឃើញនៅក្នុងស្ថានភាពលំបាកក្នុងពេលកើតកូវីដក៏ដោយ ក៏ប៉ុន្តែសម្តេចនៅតែផ្តល់ប្រាក់ឧបត្ថម្ភ»។
បើតាម លោក យក់ ប៊ុនណា មន្ត្រីរាជការស្ថិតក្នុងក្របខ័ណ្ឌសរុបទាំងអស់មានប្រមាណជាង ៤០ ម៉ឺននាក់ ដែលនឹងទទួលបាននូវប្រាក់ឧបត្ថម្ភនេះ។
អ្នកគ្រូ ណុប ស្រីហាក់ គ្រូបង្រៀនសាលាបឋមសិក្សា ១ ក្នុងខេត្តកំពង់ស្ពឺប្រាប់ភ្នំពេញប៉ុស្តិ៍ថា អ្នកគ្រូមានក្ដីរីករាយ និងអរគុណរាជរដ្ឋាភិបាលចំពោះការផ្តល់ប្រាក់ឧបត្ថម្ភក្នុងពិធីបុណ្យជាតិនេះ។ អ្នកគ្រូថ្លែងថា ទោះបីជាប្រាក់ឧបត្ថម្ភនេះមានចំនួនតិចតួច ប៉ុន្តែក៏បានចូលរួមការចំណាយផ្សេងៗផងដែរ៕
