ភ្នំពេញៈ លោក ហេង សំរិន ប្រធានរដ្ឋសភាកម្ពុជា បានស្នើដល់រដ្ឋសភាវៀតណាម ជួយជំរុញការចែករំលែក និងផ្លាស់ប្តូរបទពិសោធទាក់ទងនឹងបច្ចេកវិទ្យាកសិកម្មជាមួយកម្ពុជា ដើម្បីបង្កើនផលិតកម្មស្បៀងនៅតំបន់មេគង្គ ប្រែក្លាយជាជង្រុកសន្តិសុខស្បៀងតំបន់ និងពិភពលោក។
លោក ហេង សំរិន បានលើកឡើងយ៉ាងដូច្នេះ នៅថ្ងៃទី ១២ ខែកញ្ញា ឆ្នាំ ២០២២ នាឱកាសដែលលោកដឹកនាំគណៈប្រតិភូជាន់ខ្ពស់រដ្ឋសភា ទៅបំពេញទស្សនកិច្ចជាផ្លូវការ និងមិត្តភាព នៅប្រទេសវៀតណាម។
ក្នុងជំនួបពិភាក្សាទ្វេភាគីជាមួយតំណាងរដ្ឋសភាវៀតណាមលោក ហេង សំរិន បានស្នើទៅកាន់ភាគីវៀតណាម ឱ្យចូលរួមពង្រឹងកិច្ចសហប្រតិបត្តិការជាមួយកម្ពុជាលើវិស័យកសិកម្មតាមរយៈការចែករំលែក និងផ្លាស់ប្តូរបទពិសោធអំពីបច្ចេកវិទ្យាកសិកម្ម ដើម្បីផ្លាស់ប្តូរតំបន់មេគង្គទៅជាជង្រុកសន្តិសុខស្បៀងតំបន់ និងពិភពលោក។
ក្រៅពីនេះ លោក ហេង សំរិន បានស្នើដល់រដ្ឋសភាវៀតណាម បន្តជួយបណ្តុះបណ្តាលធនធានមនុស្ស ដល់រដ្ឋសភាកម្ពុជាបន្តទៀត ព្រមទាំងថ្លែងអំណរគុណជាថ្មីម្តងទៀត ចំពោះរដ្ឋាភិបាលនិងប្រជាជនវៀតណាម ដែលបានផ្តល់ជំនួយឥតសំណងក្នុងការសាងសង់អគាររដ្ឋបាលថ្មីសម្រាប់រដ្ឋសភាកម្ពុជា ដែលមកដល់ពេលនេះ ការសាងសង់អគាររដ្ឋបាលថ្មីនេះ អាចនឹងបញ្ចប់ការសាង់សង់រួចរាល់នៅដើមឆ្នាំ ២០២៤ ខាងមុខ។
សូមបញ្ជាក់ថា លោក ហេង សំរិន បានដឹកនាំគណៈប្រតិភូជាន់ខ្ពស់រដ្ឋសភា ទៅបំពេញទស្សនកិច្ចផ្លូវការនិងមិត្តភាពនៅប្រទេសវៀតណាម និងឡាវ ចាប់ពីថ្ងៃទី ១២ ដល់ថ្ងៃទី ១៦ ខែកញ្ញា ឆ្នាំ ២០២២។
ឆ្លើយតបនឹងប្រធានរដ្ឋសភាកម្ពុជា សមភាគីវៀតណាម គឺលោក វឿន ឌិញហ្វេ (VuongDinh Hue) បានសម្តែងក្តីសោមនស្សរីករាយចំពោះចំណងមិត្តភាព និងកិច្ចសហប្រតិបត្តិការកម្ពុជា-វៀតណាម មានការរីកចម្រើន ក្នុងឱកាសដែលប្រទេសទំាង ២ កំពុងអបអរសាទរខួប ៥៥ ឆ្នាំ នៃការបង្កើតចំណងទំនាក់ទំនងមិត្តភាពរវាងគ្នា។
ភាគីទាំង ២ បានឯកភាពគ្នាបន្តជំរុញអនុវត្តនូវកិច្ចព្រមព្រៀង ដែលរដ្ឋសភាទាំង ២ ប្រទេសបានឯកភាពគ្នាកន្លងមក និងពិនិត្យលទ្ធភាពបន្ថែម ដើម្បីពង្រីកកិច្ចសហប្រតិបត្តិការជាមួយគ្នា ក៏ដូចជាពិនិត្យកែសម្រួលកិច្ចព្រមព្រៀង ដែលមានស្រាប់ ឱ្យកាន់តែមានភាពឆ្លើយតបខ្ពស់ជាងមុន ទៅនឹងស្ថានភាពជាក់ស្តែង៕