ភ្នំពេញៈ គិតចាប់តាំងពីដើមរដូវវស្សា ក្នុងឆ្នាំ ២០២២ នេះ មានប្រជាពលរដ្ឋចំនួន៩នាក់បានស្លាប់ និងជាង ៨ ម៉ឺននាក់ បានទទួលរងគ្រោះដោយសារគ្រោះទឹកជំនន់ទឹកភ្លៀង ក្នុងនោះបានធ្វើឱ្យដំណាំស្រូវ ៤៥ ០០០ ហិកតា និងផ្ទះសំបែងរបស់ប្រជាពលរដ្ឋចំនួនជាង ៤ ពាន់ខ្នងនៅទូទាំងប្រទេស បានរងផលប៉ះពាល់។
លោក សុទ្ធ គឹមកុលមុន្នី អ្នកនាំពាក្យគណៈកម្មាធិការជាតិ គ្រប់គ្រងគ្រោះមហន្តរាយ បានប្រាប់កាលពីថ្ងៃទី ១៣ ខែកញ្ញថា គិតចាប់តាំងពីដើមរដូវវស្សា រហូតមកដល់ពេលនេះ ស្ថានភាពជំនន់ទឹកភ្លៀងបានធ្វើឱ្យមានការជន់លិចនៅតាមបណ្តាខេត្តចំនួន ១៩ ដោយក្នុងនោះមានផលប៉ះពាល់កម្រិតសា្រល និងកម្រិតមធ្យម។
ជំនន់ទឹកភ្លៀងនេះ បានធ្វើឱ្យប្រជាជនរងគ្រោះប្រមាណជាង ៨ ម៉ឺននាក់ ដោយមានស្លាប់ចំនួន ៩ នាក់ ហើយប្រជាជនជម្លៀសទៅទីទួលសុវត្ថិភាពមានចំនួនប្រមាណជាង ១ ពាន់នាក់។ ចំណែកលំនៅឋានលិចទឹកមានចំនួនជាង ៣ ២០០ ខ្នង ក្នុងនោះខូចខាតចំនួន៤ខ្នង។ ចំពោះវិស័យកសិកម្មវិញក៏មានរងផលប៉ះពាល់ផងដែរ ជាពិសេសដំណាំស្រូវចំនួន ៤៥ ០០០ ហិកតា ត្រូវបានទឹកជន់លិច ក្នុងនោះខូចខាតចំនួនជិត ២ ម៉ឺនហិកតា។
លោកថ្លែងដូច្នេះថា៖ «ជារួមតាមការវាយតម្លៃពីស្ថានភាពជន់លិច នៅតាមបណ្តាខេត្តទាំងអស់ មកដល់ពេលនេះ គឺមិនទាន់មានស្ថានភាពធ្ងន់ធ្ងរនៅឡើយនោះទេ។ ប៉ុន្តែខេត្តកំពង់ធំ ជាខេត្តដែលរងគ្រោះខ្លាំងដែលធ្វើឱ្យប៉ះពាល់ទៅលើដំណាំស្រូវច្រើនជាងគេ ដោយសារស្ថានភាពទឹកនៅយូរ ហើយមកដល់ពេលនេះស្ថានភាពនៅតែមានក្នុងកម្រិតប្រកាសឱ្យប្រុងប្រយ័ត្ននៅឡើយ»។
យោងតាមការព្យាករណ៍របស់ក្រសួងធនធានទឹក និងឧតុនិយមបានឱ្យដឹងថា ភ្លៀងនឹងបន្តមានក្នុងរយៈពេល២ខែទៀត ក្នុងបរិមាណពីមធ្យមទៅច្រើននៅទូទាំងប្រទេស ដែលអាចនឹងបង្កឱ្យមានជំនន់ទឹកភ្លៀងតាមតំបន់ទំនាប និងអាចមានផលខូចខាតក្នុងចំនួនកាន់តែច្រើន ព្រោះតាមវាលទំនាបមានទឹកដក់ពេញក្នុងកម្រិតហានិភ័យខ្ពស់។
លោក សុទ្ធ គឹមកុលមុន្នី បញ្ជាក់ថា៖ «គណៈកម្មាធិការជាតិគ្រប់គ្រងគ្រោះមហន្តរាយ សូមអំពាវនាវដល់អាជ្ញាធរគ្រប់ជាន់ថ្នាក់ទាំងអស់ បន្តយកចិត្តទុកដាក់ និងខិតខំប្រឹងប្រែងតាមដានសភាពការណ៍ ដោយមានការទទួលខុសត្រូវខ្ពស់ ដើម្បីទប់ទល់នឹងគ្រោះទឹកជំនន់ កាត់បន្ថយការលំបាក និងការប៉ះពាល់ទ្រព្យសម្បត្តិ អាយុជីវិតរបស់ប្រជាពលរដ្ឋ។
ជាមួយគ្នានេះដែរ ប្រជាពលរដ្ឋត្រូវតាមដានព័ត៌មាននានាទាក់ទងនឹងទឹកជំនន់ ត្រៀមបម្រុងស្បៀងអាហារ ត្រៀមរៀបចំសម្ភារ និងឯកសារសំខាន់ៗ ត្រៀមមធ្យោបាយធ្វើដំណើរ និងជាពិសេសត្រូវយកចិត្តទុកដាក់ចំពោះស្ត្រីមានផ្ទៃពោះ ចាស់ជរា ជនពិការ និងកុមារ»។
លោកបញ្ជាក់ថា ដើម្បីទប់ស្កាត់ និងកាត់បន្ថយផលប៉ះពាល់ទៅលើអាយុជីវិតប្រជាជន គណៈកម្មាធិការជាតិគ្រប់គ្រងគ្រោះមហន្តរាយ បានត្រៀមលក្ខណៈជានិច្ច ដោយមានរៀបចំកម្លាំង មធ្យោបាយប្រចាំការ តាមដានសភាពការណ៍ និងត្រៀមចេញសង្គ្រោះប្រជាជន ក្នុងករណីមានទឹកជំនន់កើតឡើងភ្លាមៗ។
លោកថ្លែងដូច្នេះថា៖ «យើងមានលេខាធិដ្ឋានគ្រប់គ្រងគ្រោះមហន្តរាយ នៃក្រសួងការពារជាតិ កងរាជអាវុធហត្ថ និងក្រុមរុករកសង្គ្រោះ ដែលបានត្រៀមលក្ខណៈជាស្រេចនៅតាមភូមិសាស្ត្រឈរជើង ទាំងកម្លាំង សម្ភារ ក្រុមគ្រូពេទ្យ សម្រាប់ចេញអន្តរាគមន៍សង្គ្រោះបន្ទាន់ពេលមានទឹកជំនន់កើតឡើងជាយថាហេតុ»។
សេចក្តីជូនដំណឹងរបស់ក្រសួងធនធានទឹក និងឧតុនិយមចុងក្រោយបង្អស់ បានឱ្យដឹងថា កម្ពុជានឹងបន្តរងឥទ្ធិពលពីជ្រលងនៃប្រព័ន្ធសម្ពាធ ដែលនឹងបណ្តាលឱ្យភ្លៀងបន្តធ្លាក់ទូទាំងប្រទេសពីកម្រិតតិចទៅច្រើន លាយឡំដោយផ្គរ រន្ទះ និងខ្យល់កន្ត្រាក់ ចាប់ពីថ្ងៃទី ១៤ ដល់ថ្ងៃទី ២០ ខែកញ្ញា៕