ភ្នំពេញៈ ក្រុមបច្ចេកទេស Malcolm របស់អូស្ត្រាលីនឹងមកបណ្តុះបណ្តាលបន្ថែមដល់មន្ត្រីអគ្គនាយកដ្ឋាន ក.ប.ប. អំពីការត្រួតពិនិត្យរកសារធាតុអាសបេស្តុសក្នុងផលិតផលនានា ខណៈអ្នកបច្ចេកទេសពីស្ថាប័នពាក់ព័ន្ធបន្តជជែកគ្នាក្នុងក្របខ័ណ្ឌគោលនយោបាយ ដើម្បីបង្កើតច្បាប់ហាមឃាត់ការប្រើប្រាស់ និងការនាំចូលផលិតផលដែលមានផ្ទុកសារធាតុអាសបេស្តុស។
គិតមកទល់បច្ចុប្បន្ន កម្ពុជាពុំទាន់មានច្បាប់ហាមឃាត់ការប្រើប្រាស់ និងការនាំចូលផលិតផលដែលមានផ្ទុកសារធាតុអាសបេស្តុសនៅឡើយទេ។ បើទោះជាបែបនេះក្ដី អគ្គនាយកដ្ឋានក.ប.ប.ទើបតែទទួលបានមន្ទីរ
ពិសោធន៍ក្នុងការវិភាគរកសារធាតុអាសបេស្តុសជាលើកដំបូងក្រោមជំនួយឧបត្ថម្ភរបស់រដ្ឋាភិបាលអូស្ត្រាលី កាលពីពេលថ្មីៗនេះ។
កាលពីថ្ងៃទី ១៣ ខែកញ្ញា មន្ត្រីអគ្គនាយកដ្ឋាន ក.ប.ប. បានជួបពិភាក្សាជាមួយតំណាងអង្គការ APHEDA និងទីភ្នាក់ងាររដ្ឋបាលប្រទេសអូស្ត្រាលី ដើម្បីលុបបំបាត់សារធាតុអាសបេស្តុស (ASEA) នៅកម្ពុជា ហើយជំនួបនេះ ក៏ដើម្បីបញ្ជាក់ពីសមត្ថភាព និងសក្តានុពលរបស់មន្ទីរពិសោធន៍អគ្គនាយកដ្ឋាន ក.ប.ប. ក្នុងការវិភាគរកសារធាតុអាសបេស្តុសនេះផងដែរ។
លោក ផាន អូន ប្រតិភូរាជរដ្ឋាភិបាលទទួលបន្ទុកជាអគ្គនាយ ក.ប.ប. បានប្រាប់ ភ្នំពេញ ប៉ុស្តិ៍ នៅថ្ងៃទី ១៤ កញ្ញាថា នៅខែតុលាខាងមុខ ក្រុមបច្ចេកទេស Malcolm របស់អូស្ត្រាលី នឹងមកបណ្តុះបណ្តាលមន្ត្រី ក.ប.ប. អំពីបច្ចេកទេសថ្មីៗ និងការវិភាគរកសារធាតុអាសបេស្តុស។
លោកបានបន្តថា ការបណ្តុះបណ្តាលនេះ គឺផ្តោតទៅលើជំនាញបច្ចេកទេសក្នុងការប្រើប្រាស់មន្ទីរពិសោធន៍ដែលរដ្ឋាភិបាលអូស្ត្រាលីបានផ្តល់ឱ្យកម្ពុជាកន្លងមក ដើម្បីចៀសវាងការភាន់ច្រឡំ។ ក្នុងនោះលោកអះអាងថា កម្ពុជា ក៏មានបំណងស្នើឱ្យរដ្ឋាភិបាលអូស្ត្រាលីផ្តល់នូវបច្ចេកវិទ្យាថ្មីនៃមន្ទីរពិសោធន៍សម្រាប់ធ្វើការវិភាគរកសារធាតុនេះមកកម្ពុជាផងដែរ។
លោកបានបញ្ជាក់ថា៖ «យើងចង់ឱ្យគាត់មកបង្រៀនយើងឱ្យបានលម្អិតបន្ថែមទៀតក្នុងការប្រើប្រាស់មន្ទីរពិសោធន៍នេះ។ បើមិនអ៊ីចឹងទេយើងក៏នឹងស្នើសុំឱ្យផ្តល់ឧបករណ៍មួយទៀត ដែលទំនើបជាងហ្នឹងព្រោះបើថ្ងៃក្រោយគាត់
អាចជួយយើងបាននោះនឹងធ្វើឱ្យយើងកាន់តែពង្រឹងបានផ្នែកសមត្ថភាពរបស់ក.ប.ប.យើង»។
បើតាមលោក ផាន អូន ក្នុងវិស័យសំណង់មិនទាន់មានការសិក្សាលម្អិតនៅឡើយទេ ចំពោះផលិតផលដែលកំពុងមានវត្តមាននៅកម្ពុជា ខណៈផលិតផលក្នុងវិស័យគ្រឿងសម្អាង ត្រូវបានហាមឃាត់មិនឱ្យប្រើប្រាស់សារធាតុអាសបេស្តុសនោះឡើយ។លោកថា ក្នុងដំណាក់កាលនេះ ក្រុមអ្នកបច្ចេកទេសមកពីស្ថាប័នពាក់ព័ន្ធ ក៏កំពុងជជែកគ្នាក្នុងក្របខ័ណ្ឌគោលនយោបាយដើម្បីបង្កើតច្បាប់គ្រប់គ្រងសារធាតុនេះដែរ។
លោកបានបញ្ជាក់ថា៖ «ទោះជាយ៉ាងនេះក៏ដោយ អគ្គនាយកដ្ឋាន ក.ប.ប.បានផ្សព្វផ្សាយ និងលើកទឹកចិត្តដល់ធុរជនដែលផលិតនិងនាំចូលផលិតផលគ្រឿងសំណង់យកផលិលផលខ្លួនមកវិភាគរកវត្តមានសារធាតុអាសបេស្តុសនៅមន្ទីរពិសោធន៍អគ្គនាយកដ្ឋាន ក.ប.ប. តាមគោលការណ៍ស្មគ្រចិត្ត ដើម្បីផ្តល់ទំនុកចិត្តដល់អ្នកប្រើប្រាស់ថាផលិតផលដែលបានចែកចាយមិនមានវត្តមានសារធាតុអាសបេស្តុស»។
លោក សុខ គីន ប្រធានសហព័ន្ធសហជីពកម្មករសំណង់ និងព្រៃឈើកម្ពុជាបានថ្លែងថា ការដែលកម្ពុជាមានមន្ទីរពិសោធន៍ដើម្បីវិភាគរកសាធាតុអាសបេស្តុស គឺជាចំណុចវិជ្ជមានមួយដែលនាំឱ្យមានភាពល្អប្រសើរក្នុងការគ្រប់គ្រង ឬទប់ស្កាត់ការផលិតផល និងការនាំចូលសារធាតុអាសបេស្តុស។
លោកបានបន្តថា ផលប៉ះពាល់ដែលបណ្តាលមកពីសារធាតុនេះ មិនត្រូវបានផ្សព្វផ្សាយឱ្យបានទូលំទូលាយនោះទេ ខណៈការសិក្សាមួយបានរកឃើញថា មានផលិតផលជាង ៣ ០០០ ប្រភេទ ត្រូវបានផលិតឡើងដោយសារធាតុអាសបេស្តុស។
លោកបានបញ្ជាក់ថា៖ «ខ្ញុំមិនច្បាស់ថា កម្ពុជាមានការប្រើប្រាស់ផលិតផលមានសារធាតុអាសបេស្តុសប៉ុន្មាននោះទេ។ ប៉ុន្តែកម្ពុជាមានអត្រានាំចូលផលិតផលមានផ្ទុកសារធាតុនេះខ្ពស់។ នេះបើតាមការបញ្ជាក់របស់កាំកុង
ត្រួល។ យើងត្រូវសិក្សា និងទទួលយកបទពិសោធពីប្រទេសដែលគេលែងហ៊ានប្រើប្រាស់សារធាតុអាសបេស្តុសនេះ ដើម្បីជំរុញឱ្យរដ្ឋាភិបាលមានច្បាប់ ឬបទដ្ឋានគតិយុត្តណាមួយឱ្យបានជាក់លាក់ក្នុងការហាមឃាត់ការនាំចូលសារធាតុអាសបេស្តុសមកកម្ពុជាតែម្តង»។
លោក សុខ គីន បានបន្ថែមថា ផលប៉ះពាល់ពីប្រើប្រាស់ផលិតផលដែលមានសារធាតុនេះ គឺមិនមានអ្នកណាគេចផុតនោះទេ គឺទាំងអ្នកប្រើប្រាស់ផ្ទាល់ និងអ្នកប្រើប្រាស់ដោយប្រយោល ដូចជាកម្មករក្នុងវិស័យសំណង់ និងក្រុមគ្រួសាររបស់ពួកគេ ព្រមទាំងម្ចាស់គេហដ្ឋានដែលមានវត្តមានផលិតផលផលិតពីអាសបេស្តុសនេះ។
លោក គីន បានពន្យល់ថា៖ «សារធាតុអាសបេស្តុស គឺជាសារធាតុម្យ៉ាងមានកប់នៅក្រោមដី ហើយសារធាតុនេះ មិនទាន់មានថ្នាំឬសារធាតុណាដែលអាចព្យាបាលវាបាននៅឡើយទេ។ នៅពេលវាបានជ្រាបចូលទៅក្នុងខ្លួនមនុស្សតាមរយៈផ្លូវដង្ហើម ប្រឈមមុខនឹងការកើតជំងឺមហារីកសួត ដែលអាចនឹងស្លាប់ ក្នុងរយៈពេល ២០ ទៅ ៣០ ឆ្នាំខាងមុខ»។
នៅថ្ងៃទី ១៥ កញ្ញា ឆ្នាំ ២០២២ ក្រសួងការងារ និងបណ្តុះបណ្តាលវិជ្ជាជីវៈបានរៀបចំសិក្ខាសាលាមួយស្តីពីការរៀបចំសេចក្តីព្រាងផែនទីបង្ហាញផ្លូវស្តីពីការកាត់បន្ថយផលប៉ះពាល់និងហានិភ័យនៃជំងឺដោយសារសារធាតុអាសបេស្តុសនៅកម្ពុជា។ នេះបើតាមរបៀបវារៈនៃសិក្ខាសាលាដែលត្រូវបានផ្សព្វផ្សាយ។
សិក្ខាសាលានេះ មានការចូលរួមពីមន្ត្រីបច្ចេកទេសមកពីក្រសួងពាក់ព័ន្ធ ដៃគូអភិវឌ្ឍន៍ អង្គការសង្គមស៊ីវិល សហជីព និយោជក ដើម្បីជជែកពិភាក្សា និងបង្ហាញពីការស្រាវជ្រាវជុំវិញសេចក្តីព្រាងផែនទីបង្ហាញផ្លូវ ដែលមានសកម្មភាពជាតិក្នុងការលុបបំបាត់ជំងឺ ដែលពាក់ព័ន្ធនឹងសារធាតុអាសបេស្តុសនៅកម្ពុជា៕