.jpg)
បន្ទះសូឡាត្រូវបានតម្លើងប្រើប្រាស់នៅខេត្តតាកែវ។ ហេង ជីវ័ន
កម្ពុជាបាននិងកំពុងប្រើប្រាស់ថាមពលកកើតឡើងវិញប្រមាណ ៤០% នៃតម្រូវការថាមពលសរុបនៅក្នុងស្រុក ដែលរួមមានថាមពលពីវារីអគ្គិសនី ពន្លឺព្រះអាទិត្យ និងថាមពលជីវម៉ាស់។ រដ្ឋាភិបាលកម្ពុជានឹងជំរុញលើការប្រើប្រាស់ថាមពលកកើតឡើងបន្ថែមទៀត ដើម្បីកាត់បន្ថយការប្រើប្រាស់ឥន្ធនៈហ្វូស៊ីល។
នៅថ្ងៃទី ១៥ ខែកញ្ញា ឆ្នាំ ២០២២ ក្នុងកិច្ចប្រជុំរដ្ឋមន្ត្រីថាមពលអាស៊ានលើកទី ៤០ និងកិច្ចប្រជុំពាក់ព័ន្ធរួមទាំងវេទិកាធុរកិច្ចថាមពលអាស៊ានឆ្នាំ ២០២២ ក្នុងនាមកម្ពុជាជាប្រធានអាស៊ាន លោកនាយករដ្ឋមន្ត្រី ហ៊ុន សែន បានថ្លែងសុន្ទរកថាបើកកម្មវិធីប្រជុំទាក់ទងនឹងបញ្ហាថាមពលសកល និងស្ថានភាពថាមពលរបស់កម្ពុជា។
លោក ហ៊ុន សែន បានគូសបញ្ជាក់ក្នុងសុន្ទរកថា កម្ពុជាបាននិងកំពុងខិតខំយ៉ាងសកម្មក្នុងការបញ្ចូលថាមពលកកើតឡើងវិញ ទៅក្នុងល្បាយនៃប្រភពថាមពលរបស់ខ្លួន ហើយក្នុងឆ្នាំ ២០២១ កន្លងទៅនេះ ថាមពលកកើតឡើងវិញប្រមាណ ៤០% នៃថាមពលសរុបក្នុងស្រុកបានចរាចរផ្គត់ផ្គង់តម្រូវការ។
ក្នុងនាមកម្ពុជាជាប្រធានអាស៊ានឆ្នាំ ២០២២ លោកនាយករដ្ឋមន្ត្រី ហ៊ុន សែន បានបន្ថែមជុំវិញការជំរុញឱ្យប្រើប្រាស់ថាមពលកកើតឡើងវិញ ដូច្នេះថា៖ «សម្រាប់ទិសដៅទៅមុខ កម្ពុជានឹងបន្តជំរុញការយកចិត្តទុកដាក់លើការអភិវឌ្ឍប្រសិទ្ធភាពថាមពល និងថាមពលកកើតឡើងវិញឱ្យបានអតិបរមា និងជាបន្តបន្ទាប់ទៅតាមលទ្ធភាពទទួលបានរបស់ប្រព័ន្ធផ្គត់ផ្គង់ថាមពលកម្ពុជាជាមួយនឹងការកាត់បន្ថយការអភិវឌ្ឍគម្រោងប្រភពថាមពល ដែលប្រើប្រាស់ឥន្ធនៈហ្វូស៊ីលដែលមានធ្យូងថ្ម និងប្រេងជាដើម»។
គួរបញ្ជាក់ថា ថាមពលកកើតឡើងវិញ សំដៅលើថាមពលទាំងឡាយណាដែលបានមកពីប្រភពដែលអាចកកើតឡើងសាថ្មីបានដូចជាពន្លឺព្រះអាទិត្យ ខ្យល់ ជំនោរសមុទ្រ រលកសមុទ្រ កំដៅផែនដី ថាមពលជីវម៉ាស់ ឬជីវថាមពលជាដើម ឬអាចនិយាយម្យ៉ាងទៀតថាថាមពលស្អាតស្អំ។
លោកនាយករដ្ឋមន្ត្រី ហ៊ុន សែន បានលើកឡើងពីកំណើននៃសេចក្តីត្រូវការផ្នែកថាមពលនៅលើពិភពលោក ខណៈអស្ថិរភាពនៃថ្លៃប្រេងឥន្ធនៈនៅលើទីផ្សារអន្តរជាតិ បាននិងកំពុងបង្កឱ្យមានអតិផរណាខ្ពស់ ស្របពេលគោលនយោបាយរូបិយវត្ថុពីធនាគារកណ្តាលនៃបណ្តាប្រទេសជាច្រើនបានរឹតបន្តឹងដាក់សម្ពាធមកលើកំណើនសេដ្ឋកិច្ចសកល។ ជាមួយនឹងវិបត្តិនៃការប្រែប្រួលអាកាសធាតុ និងគ្រោះធម្មជាតិ ដែលបានយាយីរំខានដល់សេដ្ឋកិច្ច ខ្សែច្រវ៉ាក់តម្លៃ និងផលិតភាពសកល លោកនាយករដ្ឋមន្ត្រីកម្ពុជា សង្កត់ធ្ងន់ថា អាស៊ាន និងពិភពលោកចាំបាច់យកចិត្តទុកដាក់លើអន្តរកាលថាមពល។
ដើម្បីសម្រេចបានការប្រើប្រាស់ថាមពលកកើតឡើងវិញជាអតិបរមានាថ្ងៃខាងមុខ កម្ពុជាកំពុងសហការជាមួយដៃគូអភិវឌ្ឍន៍នានាក្នុងការសិក្សា និងរៀបចំផែនការមេអភិវឌ្ឍន៍វិស័យថាមពលកម្ពុជារហូតដល់ឆ្នាំ ២០៤០ គោលនយោបាយជាតិស្តីពីប្រសិទ្ធភាពថាមពល ផែនទីបង្ហាញផ្លូវស្តីពីការអភិវឌ្ឍអន្តរកាល ថាមពលស្អាតឆ្ពោះទៅធ្វើតុល្យភាពកាបូន និងគោលនយោបាយអភិវឌ្ឍន៍ថាមពលពន្លឺព្រះអាទិត្យ។
គួររំឭកថា ជុំវិញការកាត់បន្ថយការប្រើប្រាស់ថាមពលប្រេងឥន្ធនៈហ្វូស៊ីលនេះ កាលពីខែកុម្ភៈ ឆ្នាំ ២០២២ កន្លងទៅ រដ្ឋាភិបាលបានដាក់ចេញយុទ្ធសាស្ត្ររយៈពេលវែងមួយស្តីពីអព្យាក្រឹតកាបូន (LTS4CN) ដែលរំពឹងសម្រេចបាននៅឆ្នាំ ២០៥០ ស្របតាមកិច្ចព្រមព្រៀងទីក្រុងប៉ារីស ស្ដីពីការប្រែប្រួលអាកាសធាតុ៕
