កណ្តាលៈ សមាគមគ្រូពេទ្យស្ម័គ្រចិត្តយុវជនសម្ដេចតេជោ (TYDA) បានចុះពិនិត្យព្យាបាលជំងឺជូនប្រជាពលរដ្ឋដោយឥតគិតថ្លៃចំនួន ៣ ០០០ នាក់ នាថ្ងៃទី ១៧ ខែកញ្ញា នៅក្នុងបរិវេណវិទ្យាល័យ ជ័យសាន់នីវូ ឃុំសំរោងធំ ស្រុកកៀនស្វាយ ខេត្តកណ្ដាល។
លោក គង់ សោភ័ណ្ឌ អភិបាលខេត្តកណ្តាលថ្លែងថា នេះគឺជាសកម្មភាពមនុស្សធម៌ដ៏ល្អប្រពៃរបស់ TYDA ក្នុងការលះបង់កម្លាំងកាយ កម្លាំងចិត្ត និងពេលវេលាក្នុងការចុះពិនិត្យ និងជួយពិនិត្យព្យាបាលជំងឺជូនប្រជាពលរដ្ឋគ្រប់មជ្ឈដ្ឋានដោយឥតគិតថ្លៃ ពិសេសដល់ប្រជាពលរដ្ឋក្នុងស្រុកកៀនស្វាយ ចំនួន ៣ ០០០ នាក់។
បើតាមហ្វេសប៊ុករដ្ឋបាលខេត្តកណ្តាល លោកថ្លែងថា៖ «នេះជាការចូលរួមចំណែកក្នុងការបំពេញបេសកកម្មការងារប្រកបដោយឆន្ទៈដ៏ស្រួចស្រាល់ និងបង្ហាញពីស្មារតីផូរផង់ សម្រាប់ជាគំរូដល់យុវជនជំនាន់ក្រោយក្នុងការអភិវឌ្ឍប្រទេសជាតិ នៅក្នុងបុព្វហេតុនានា ពិសេសក្នុងវិស័យសុខាភិបាល ដោយមិនប្រកាន់ពូជសាសន៍ សាសនា ឬនិន្នាការនយោបាយណាមួយឡើយ»៕