កណ្តាលៈ ស្រុកស្អាងបានជាប់ជាស្រុកបញ្ឈប់ការបន្ទោបង់ពាសវាលពាសកាល (ODF) នៅក្នុងខេត្តកណ្តាល បន្ទាប់ពីមន្ទីរអភិវឌ្ឍន៍ជនបទខេត្តនេះបានចុះផ្ទៀងផ្ទាត់អំពីស្ថានភាពនៃការបញ្ឈប់ការបន្ទោបង់ពាសវាលពាសកាល។
លោកស្រី ជី ថាវី ប្រធានមន្ទីរអភិវឌ្ឍន៍ជនបទខេត្តកណ្តាលបានបញ្ជាក់ថា ស្រុកស្អាងគឺជាស្រុកចុងក្រោយ ដែលត្រូវបានជាប់ជាស្រុក ODF ថ្នាក់ខេត្ត ក្នុងចំណោមក្រុង ស្រុកចំនួន ៥ ផ្សេងទៀត ដែលបានជាប់ជាក្រុង ស្រុកថ្នាក់ខេត្ត រួមមាន ស្រុកកោះធំ ស្រុកមុខកំពូល ស្រុកពញាឮ ក្រុងតាខ្មៅ និងស្រុកកៀនស្វាយ ខណៈស្រុកចំនួន ៤ ផ្សេងទៀត បានប្រកាសទទួលស្គាល់ជាផ្លូវការដោយក្រសួងអភិវឌ្ឍន៍ រួមមាន ស្រុកអង្គស្នួល កណ្តាលស្ទឹង លើកដែក និងស្រុកខ្សាច់កណ្តាល។
លោកស្រីបានបញ្ជាក់ដូច្នេះ ក្នុងពេលចុះផ្ទៀងផ្ទាត់អំពីស្ថានភាពនៃការបញ្ឈប់ការបន្ទោបង់ពាសវាលពាសកាលនៅស្រុកស្អាងកាលពីថ្ងៃទី ១៦ ខែកញ្ញា។
ហ្វេសប៊ុករដ្ឋបាលខេត្តកណ្តាលបានដកស្រង់សម្ដី លោកស្រី ជី ថាវី ថា ការចុះផ្ទៀងផ្ទាត់នេះគឺជាការចុះវាយតម្លៃដោយថ្នាក់ខេត្ត ហើយនៅពេលបន្តិចទៀតនេះ ក្រសួងអភិវឌ្ឍន៍ជនបទនឹងចុះវាយតម្លៃខេត្តវិញម្ដង ដោយលោកស្រីបញ្ជាក់ថា៖ «នៅក្នុងការចុះនោះ ក្រសួងមិនបានឱ្យយើងបានដឹងមុនថាត្រូវចុះនៅទីតាំង ភូមិ ឃុំ ស្រុកណាមួយនោះទេ»។
លោកស្រីបន្តថា អាជ្ញាធរ ភូមិ ឃុំ ស្រុក ត្រូវត្រៀមខ្លួនឱ្យរួចរាល់គ្រប់លក្ខខណ្ឌដែលជាសូចណាកររបស់ក្រសួងក្នុងការចុះវាយតម្លៃ ហើយត្រូវប្រាកដថាក្នុងមូលដ្ឋានរបស់ខ្លួន ពោលគឺនៅតាមខ្នងផ្ទះរបស់ប្រជាពលរដ្ឋ សាលារៀន សាលាឃុំ សាលាស្រុក មន្ទីរពេទ្យ តាមភោជនីយដ្ឋាន ត្រូវមានបង្គន់អនាម័យប្រើប្រាស់បានត្រឹមត្រូវ មានភាពស្អាត មិនមានក្លិន មានទឹក និងសាប៊ូ មានបរិស្ថានស្អាត ទាំងការចិញ្ចឹមសត្វពាហនៈ ជ្រូកមាន់ទាក៏ត្រូវមានទ្រុងដាក់សំអាតលាមកជាប្រចាំ។
លោកស្រី ជី ថាវី ការធ្វើដូច្នេះគឺដើម្បីធ្វើឱ្យការចុះវាយតម្លៃ ODF ក្នុងខេត្តកណ្ដាលទទួលបានលទ្ធផលល្អប្រសើរ ក្លាយជាខេត្ត ODF ជាប់ចំណាត់ថ្នាក់លេខ ៣ ទូទាំងប្រទេសតាមការគ្រោងទុក៕