បន្ទាយមានជ័យៈ ក្នុងរយៈពេល ៩ ខែ ក្នុងឆ្នាំ ២០២២ នេះ គ្រោះថ្នាក់ចរាចរណ៍បានកើតឡើង ៧៣ ករណី នៅខេត្តបន្ទាយមានជ័យ បណ្តាលឱ្យមនុស្សស្លាប់ចំនួន ៥៩ នាក់ និងរបួសធ្ងន់ ៥០ នាក់។ នេះបើយោងតាមការចុះផ្សាយរបស់គេហទំព័រអគ្គស្នងការដ្ឋាននគរបាលជាតិ។
គេហទំព័រនេះបានចុះផ្សាយកាលពីថ្ងៃទី ១៦ ខែកញ្ញាថា៖ «រយៈពេល ៩ ខែ ដើមឆ្នាំ ២០២២ នេះ គ្រោះថ្នាក់ចរាចរណ៍បានកើតឡើងចំនួន ៧៣ ករណី បណ្តាលស្លាប់មនុស្សចំនួន ៥៩ នាក់»។
ក្នុងពិធីវេទិកាសប្តាហ៍កាលពីថ្ងៃទី ១៦ ខែកញ្ញា នៅមន្ទីរសាធារណការ និងដឹកជញ្ជូនខេត្តនេះ លោក លី សារី អភិបាលរងខេត្តបន្ទាយមានជ័យ បានជំរុញដល់មន្ត្រីជំនាញត្រូវត្រួតពិនិត្យឱ្យបានតឹងរ៉ឹងបំផុតចំពោះរថយន្តដឹកដី ដែលធ្វើចរាចរណ៍ដឹកដីលើផ្លូវសាធារណៈ មិនគ្របឱ្យបានត្រឹមត្រូវ ហើយត្រូវតែចាត់វិធានការរដ្ឋបាល។
យោងតាមគេហទំព័រដដែល លោកក៏បានជំរុញដល់មន្ត្រីជំនាញត្រូវត្រួតពិនិត្យឱ្យបានដិតដល់ផងដែរចំពោះរថយន្តកែច្នៃខុសលក្ខណៈបច្ចេកទេស៕