បន្ទាយមានជ័យ/ឧត្តរមានជ័យៈ ជំនន់​ទឹក​ភ្លៀង​បាន​បង្កការ​ជន់​លិច​និង​ប៉ះពាល់​ដល់​ការរស់​នៅ​របស់​ប្រជាពលរដ្ឋ​ចំនួន​ ២៥ ​គ្រួសារ នៅ​ស្រុក​ចុង​កាល់ និង​ស្រុក​ត្រពាំង​ប្រាសាទ ខេត្ត​ឧត្តរ​មាន​ជ័យ ខណៈ​នៅស្រុក​មង្គល​បុរី ខេត្ត​បន្ទាយ​មាន​ជ័យ ជន់​លិច​ប៉ះ​ពាល់​ប្រជាពល​រដ្ឋ​​​ចំនួន ​៥០ ​គ្រួសារ​។ នេះបើ​យោង​តាម មន្ត្រី​ជំនាញ​និង​អាជ្ញាធរ​មូល​ដ្ឋាន។

លោក ញើន កួន ប្រធាន​មន្ទីរធន​ធាន​ទឹក​ និង​ឧតុនិយម​ខេត្ត​ឧត្តរ​មាន​ជ័យ បាន​ប្រាប់​ ភ្នំពេញ ​ប៉ុស្តិ៍ នៅ​ថ្ងៃ​ទី​ ១៨ ខែកញ្ញា​ថា ផ្ទះ​ប្រជា​ពលរដ្ឋ​ចំនួន​ ២៥ ​ខ្នង និង​កំណាត់​ផ្លូវ​លំមួយ​ចំនួន​ ស្ថិត​នៅ​ក្នុង​ឃុំចុង​កាល់ ស្រុក​ចុង​កាល់ និង​ឃុំ​ព្រះប្រឡាយ ក្នុង​ស្រុក​ត្រពាំង​ប្រាសាទ ​បាន​រងការ​ជន់​លិច​ដោយ​ជំនន់​ទឹក​ភ្លៀង បន្ទាប់​ពីមាន​ភ្លៀង​ធ្លាក់​ខ្លាំង​កាល​ពី​យប់​ថ្ងៃទី​ ១៦ ខែ​កញ្ញា ឆ្នាំ​ ២០២២។

ការ​ជន់​លិច​នេះ គឺ​បណ្ដាល​មកពី​ប្រព័ន្ធ​លូតូច​ចង្អៀត ខណៈ​បរិមាណ​ទឹក​ភ្លៀង​ ដែល​បាន​ធ្លាក់​ក្នុង​កម្រិត​ពី​ ១​៣៥-​២៤៤ មិល្លី​ម៉ែត្រ ។

លោក​បាន​ថ្លែងថា​៖ «ដោយសារ​តំបន់​នោះ​ ជាតំបន់​ភ្នំនិង​ខ្ពង់​រាប ការ​ជន់លិច​ដោយ​ជំនន់​ទឹក​ភ្លៀង​គឺ​ មិន​យូរ​នោះ​ទេ។ ឥឡូវ​នេះ​ទឹក​វាបាន​ស្រក​ទៅវិញ​ជា​បណ្ដើរៗ​ហើយ​»។

ចំណែក​លោក រ័ត្ន ដាស៊ី​ណង់ អភិបាល​ស្រុក​មង្គល​បុរី នៃ​ខេត្តបន្ទាយ​មាន​ជ័យបាន​ប្រាប់​ ភ្នំពេញ​ ប៉ុស្តិ៍​ថា ទឹក​ដែល​បាន​ហូរ​ធ្លាក់​ពី​ស្រុក​បវេល ខេត្ត​បាត់​ដំបង និ​ង​ទឹក​ដែល​ហូរធ្លាក់​ពី​ស្រុក​ម៉ាឡៃ ខេត្ត​បន្ទាយ​មាន​ជ័យ បាន​បង្ក​ឱ្យមាន​ការ​ជន់​លិច​ផ្លូវ​និង​លំនៅ​ឋាន​ប្រជា​ពលរដ្ឋ​ជាច្រើន​គ្រួសារ​។

លោក​ថ្លែង​ថា៖ «នៅ​ពេល​នេះទឹ​ក​បាន​ជន់​លិច​ប៉ះពាល់​ផ្ទះប្រជាព​លរដ្ឋ​ប្រមាណ ​៥០ ​គ្រួសារ នៅក្នុង​ឃុំ ចំនួន​ ៣ គឺ ឃុំ​សឿ ឃុំ​រហាត់​ទឹក និងឃុំ​ចំណោម។ ប៉ុន្តែ​នៅ​មិន​ទាន់​ធ្ងន់​ធ្ងរ នៅ​ឡើយ​ទេ​»។

បើតាម​លោក​ ដាស៊ីណង់ នៅ​ពេល​នេះ ស្ថាន​ភាព​ទឹក​ហាក់​ដូចជា​នៅទ្រឹង ហើយ​អា​កាសធាតុ​ផ្ទៃ​មេឃ​ស្រឡះ មិន​មាន​ភ្លៀង​ធ្លាក់​នោះ​ទេ៕